अध्याय 85: सोती प्रजा को छोड़ श्रीराम का प्रस्थान

रघुपति प्रजा प्रेम-बस देखी । सदय हृदयँ दुख भयउ बिसेखी ॥
करुनामय रघुनाथ गोसाँई । बेगि पाइअहिं पीर पराई ॥

raghupati prajā prema-basa dekhī | sadaya hṛdayam̐ dukha bhayau bisekhī ||
karunāmaya raghunātha gosām̐ī | begi pāiahiṃ pīra parāī ||

कहि सप्रेम मृदु बचन सुहाये । बहु बिधि राम लोग समुझाये ॥
किये धरम-उपदेस घनेरे । लोग प्रेम बस फिरहिँ न फेरे ॥

kahi saprema mṛdu bacana suhāye | bahu bidhi rāma loga samujhāye ||
kiye dharama-upadesa ghanere | loga prema basa phirahim̐ na phere ||

सील-सनेह छाड़ि नहिं जाई । असमञ्जस-बस भे रघुराई ॥
लोग सोग-श्रम-बस गये सोई । कछुक देव-माया मति मोई ॥

sīla-saneha chār̤i nahiṃ jāī | asamañjasa-basa bhe raghurāī ||
loga soga-śrama-basa gaye soī | kachuka deva-māyā mati moī ||

जबहिं जाम जुग, जामिनि बीती । राम सचिव सन कहेउ सप्रीती ॥
खोज मारि रथ हाँकहु ताता । आन उपायँ बनिहि नहिँ बाता ॥

jabahiṃ jāma juga, jāmini bītī | rāma saciva sana kaheu saprītī ||
khoja māri ratha hām̐kahu tātā | āna upāyam̐ banihi nahim̐ bātā ||