अध्याय 43: कैकेयी का कपट स्नेह, राजा की चेतना

रहसी रानि राम रुख पाई । बोली कपट-सनेह जनाई ॥
सपथ तुम्हार भरत कइ आना । हेतु न दूसर मैं कछु जाना ॥

rahasī rāni rāma rukha pāī | bolī kapaṭa-saneha janāī ||
sapatha tumhāra bharata kai ānā | hetu na dūsara maiṃ kachu jānā ||

तुम्ह अपराध जोग नहिँ ताता । जननी जनक बन्धु सुख दाता ॥
राम सत्य सब जो कछु कहहू । तुम्ह पितु-मातु बचन-रत अहहू ॥

tumha aparādha joga nahim̐ tātā | jananī janaka bandhu sukha dātā ||
rāma satya saba jo kachu kahahū | tumha pitu-mātu bacana-rata ahahū ||

पितहि बुझाइ कहहु बलि सोई । चौथे पन जेहिं अजस न होई ॥
तुम्ह सम सुअन सुकृत जेहिं दीन्हे । उचित न तासु निरादर कीन्हे ॥

pitahi bujhāi kahahu bali soī | cauthe pana jehiṃ ajasa na hoī ||
tumha sama suana sukṛta jehiṃ dīnhe | ucita na tāsu nirādara kīnhe ||

लागहिँ कुमुख बचन सुभ कैसे । मगहँ गयादिक तीरथ जैसे ॥
रामहि मातु बचन सब भाये । जिमि सुरसरि-गत सलिल सुहाये ॥

lāgahim̐ kumukha bacana subha kaise | magaham̐ gayādika tīratha jaise ||
rāmahi mātu bacana saba bhāye | jimi surasari-gata salila suhāye ||