अध्याय 29: भरत को तिलक, श्रीराम को चौदह वर्ष वन

सुनहु प्रान-प्रिय भावत जी का । देहु एक बर भरतहि टीका ॥
माँगउँ दूसर बर कर जोरी । पुरवहु नाथ मनोरथ मोरी ॥

sunahu prāna-priya bhāvata jī kā | dehu eka bara bharatahi ṭīkā ||
mām̐gaum̐ dūsara bara kara jorī | puravahu nātha manoratha morī ||

तापस-बेष बिसेष उदासी । चौदह बरिस राम बन-बासी ॥
सुनि मृदु बचन भूप हियँ सोकू । ससि-कर छुअत बिकल जिमि कोकू ॥

tāpasa-beṣa biseṣa udāsī | caudaha barisa rāma bana-bāsī ||
suni mṛdu bacana bhūpa hiyam̐ sokū | sasi-kara chuata bikala jimi kokū ||

गयउ सहमि नहिँ कछु कहि आवा । जनु सचान बन झपटेउ लावा ॥
बिबरन भयउ निपट नरपालू । दामिनि हनेउ मनहुँ तरु तालू ॥

gayau sahami nahim̐ kachu kahi āvā | janu sacāna bana jhapaṭeu lāvā ||
bibarana bhayau nipaṭa narapālū | dāmini haneu manahum̐ taru tālū ||

माथे हाथ मूदि दोउ लोचन । तनु धरि सोच लाग जनु सोचन ॥
मोर मनोरथ सुरतरु-फूला । फरत करिनि जिमि हतेउ समूला ॥

māthe hātha mūdi dou locana | tanu dhari soca lāga janu socana ||
mora manoratha surataru-phūlā | pharata karini jimi hateu samūlā ||

अवध उजारि कीन्हि कैकेईं । दीन्हसि अचल बिपति के नेईं ॥

avadha ujāri kīnhi kaikeīṃ | dīnhasi acala bipati ke neīṃ ||