अध्याय 275: चित्रकूट में जनक और श्रीराम का मिलन

भाइ सचिव गुरु पुरजन साधा । आगें गवन कीन्ह रघुनाथा ॥
गिरिवर, दीख जनकपति जबहीं । करि प्रनाम रथ त्यागेउ तबहीं ॥

bhāi saciva guru purajana sādhā | āgeṃ gavana kīnha raghunāthā ||
girivara, dīkha janakapati jabahīṃ | kari pranāma ratha tyāgeu tabahīṃ ||

राम-दरस लालसा उछाहू । पथ-श्रम लेस कलेस न काहू ॥
मन तहँ जहँ रघुबर बैदेही । बिनु मन तन दुख-सुख सुधि केही ॥

rāma-darasa lālasā uchāhū | patha-śrama lesa kalesa na kāhū ||
mana taham̐ jaham̐ raghubara baidehī | binu mana tana dukha-sukha sudhi kehī ||

आवत जनक चले एहि भाँती । सहित समाज प्रेम-मति माती ॥
आये निकट देखि अनुरागे । सादर मिलन परसपर लागे ॥

āvata janaka cale ehi bhām̐tī | sahita samāja prema-mati mātī ||
āye nikaṭa dekhi anurāge | sādara milana parasapara lāge ||

लगे जनक मुनिजन-पद बन्दन । रिषिन्ह प्रनाम कीन्ह रघुनन्दन ॥
भाइन्ह सहित राम मिलि राजहि । चले लवाइ समेत समाजहि ॥

lage janaka munijana-pada bandana | riṣinha pranāma kīnha raghunandana ||
bhāinha sahita rāma mili rājahi | cale lavāi sameta samājahi ||