अध्याय 219: बृहस्पति की इन्द्र को सीख

सुनु सुरेस उपदेस हमारा । रामहि सेवक परम-पियारा ॥
मानत सुख सेवक सेवकाई । सेवक-बैर बैर-अधिकाई ॥

sunu suresa upadesa hamārā | rāmahi sevaka parama-piyārā ||
mānata sukha sevaka sevakāī | sevaka-baira baira-adhikāī ||

जद्यपि सम नहिँ राग न रोषू । गहहिँ न पाय पुन्य गुन दोषू ॥
करम-प्रधान बिस्व करि राखा । जो जस करइ सो तस फल चाखा ॥

jadyapi sama nahim̐ rāga na roṣū | gahahim̐ na pāya punya guna doṣū ||
karama-pradhāna bisva kari rākhā | jo jasa karai so tasa phala cākhā ||

तदपि करहिँ सम विषम बिहारा । भगत अभगत हृदय अनुसारा ॥
अगुन अलेप अमान एकरस । राम सगुन भये भगत-पेम-बस ॥

tadapi karahim̐ sama viṣama bihārā | bhagata abhagata hṛdaya anusārā ||
aguna alepa amāna ekarasa | rāma saguna bhaye bhagata-pema-basa ||

राम सदा सेवक रुचि राखी । बेद पुरान साधु सुर साखी ॥
अस जियँ जानि तजहु कुटिलाई । करहु भरत-पद-प्रीति सुहाई ॥

rāma sadā sevaka ruci rākhī | beda purāna sādhu sura sākhī ||
asa jiyam̐ jāni tajahu kuṭilāī | karahu bharata-pada-prīti suhāī ||