अध्याय 216: नंगे पाँव चित्रकूट की ओर

कीन्ह निमज्जन तीरथराजा । नाइ मुनिहि सिर सहित समाजा ॥
रिषि आयसु असीस सिर राखी । करि दंडवत बिनय बहु भाषी ॥

kīnha nimajjana tīratharājā | nāi munihi sira sahita samājā ||
riṣi āyasu asīsa sira rākhī | kari daṃḍavata binaya bahu bhāṣī ||

पथ-गति-कुसल साथ सब लीन्हे । चले चित्रकूटहिं चित दीन्हें ॥
रामसखा-कर दीन्हें लागू । चलत देह धरि जनु अनुरागू ॥

patha-gati-kusala sātha saba līnhe | cale citrakūṭahiṃ cita dīnheṃ ||
rāmasakhā-kara dīnheṃ lāgū | calata deha dhari janu anurāgū ||

नहिँ पद त्रान सीस नहिँ छाया । प्रेम नेम ब्रत धरम अमाया ॥
लखन-राम-सिय पन्थ-कहानी । पूछत सखहि कहत मृदु बानी ॥

nahim̐ pada trāna sīsa nahim̐ chāyā | prema nema brata dharama amāyā ||
lakhana-rāma-siya pantha-kahānī | pūchata sakhahi kahata mṛdu bānī ||

राम-बास-थल बिटप बिलोकें । उर अनुराग रहत नहिँ रोकैं ॥
देखि दसा सुर बरिसहिँ फूला । भइ मृदु महि मग मङ्गल मूला ॥

rāma-bāsa-thala biṭapa bilokeṃ | ura anurāga rahata nahim̐ rokaiṃ ||
dekhi dasā sura barisahim̐ phūlā | bhai mṛdu mahi maga maṅgala mūlā ||