अध्याय 189: गुह का संदेह, भरत राम को मारने आए

सई तीर बसि चले बिहाने । सृंगबेरपुर सब निअराने ॥
समाचार सब सुने निषादा । हृदयँ बिचार करइ सबिषादा ॥

saī tīra basi cale bihāne | sṛṃgaberapura saba niarāne ||
samācāra saba sune niṣādā | hṛdayam̐ bicāra karai sabiṣādā ||

कारन कवन भरत बन जाहीँ । है कछु कपट-भाउ मन माहीं ॥
जौं पै जियँ न होति कुटिलाई । तौ कत लीन्ह सङ्ग कटकाई ॥

kārana kavana bharata bana jāhīm̐ | hai kachu kapaṭa-bhāu mana māhīṃ ||
jauṃ pai jiyam̐ na hoti kuṭilāī | tau kata līnha saṅga kaṭakāī ||

जानहिँ सानुज रामहि मारी । करउँ अकंटक राज सुखारी ॥
भरत न राजनीति उर आनी । तब कलङ्क अब जीवन हानी ॥

jānahim̐ sānuja rāmahi mārī | karaum̐ akaṃṭaka rāja sukhārī ||
bharata na rājanīti ura ānī | taba kalaṅka aba jīvana hānī ||

सकल-सुरासुर जुरहिँ जुझारा । रामहि समर न जीतनिहारा ॥
का आचरज भरत अस करहीं । नहिँ बिष बेलि अमिय फल फरहीं ॥

sakala-surāsura jurahim̐ jujhārā | rāmahi samara na jītanihārā ||
kā ācaraja bharata asa karahīṃ | nahim̐ biṣa beli amiya phala pharahīṃ ||