अध्याय 129: पूजा करने वालों के हृदय में निवास

प्रभु प्रसाद सुचि सुभग सुबासा । सादर जासु लहइ नित नासा ॥
तुम्हहिँ निबेदित भोजन करहीं । प्रभु-प्रसाद पट भूषन धरहीँ ॥

prabhu prasāda suci subhaga subāsā | sādara jāsu lahai nita nāsā ||
tumhahim̐ nibedita bhojana karahīṃ | prabhu-prasāda paṭa bhūṣana dharahīm̐ ||

सीस नवहिँ सुर-गुरु-द्विज देखी । प्रीति सहित करि बिनय बिसेखी ॥
कर नित करहिं राम-पद-पूजा । राम-भरोस हृदयँ नहिँ दूजा ॥

sīsa navahim̐ sura-guru-dvija dekhī | prīti sahita kari binaya bisekhī ||
kara nita karahiṃ rāma-pada-pūjā | rāma-bharosa hṛdayam̐ nahim̐ dūjā ||

चरन राम-तीरथ चलि जाहीं । राम बसहु तिन्ह के मन माहीं ॥
मन्त्रराज नित जपहिँ तुम्हारा । पूजहिँ तुम्हहिँ सहित परिवारा ॥

carana rāma-tīratha cali jāhīṃ | rāma basahu tinha ke mana māhīṃ ||
mantrarāja nita japahim̐ tumhārā | pūjahim̐ tumhahim̐ sahita parivārā ||

तरपन होम करहिँ बिधि नाना । बिप्र जेवाँइ देहिँ बहु दाना ॥
तुम्ह तेँ अधिक गुरुहि जियँ जानी । सकल भायँ सेवहिँ सनमानी ॥

tarapana homa karahim̐ bidhi nānā | bipra jevām̐i dehim̐ bahu dānā ||
tumha tem̐ adhika guruhi jiyam̐ jānī | sakala bhāyam̐ sevahim̐ sanamānī ||