अध्याय 116: ग्रामवधुएँ सकुचाती सीता के पास आईं

बरनि न जाइ मनोहर जोरी । सोभा बहुत थोरि मति मोरी ॥
राम लखन सिय सुन्दरताई । सब चितवहिँ चित मन मति लाई ॥

barani na jāi manohara jorī | sobhā bahuta thori mati morī ||
rāma lakhana siya sundaratāī | saba citavahim̐ cita mana mati lāī ||

थके नारि नर प्रेम पिआसे । मनहुँ मृगी मृग देखि दिआ से ॥
सीय समीप ग्रामतिय जाहीँ । पूछत अति सनेहँ सकुचाहीं ॥

thake nāri nara prema piāse | manahum̐ mṛgī mṛga dekhi diā se ||
sīya samīpa grāmatiya jāhīm̐ | pūchata ati saneham̐ sakucāhīṃ ||

बार बार सब लागहिँ पाये । कहहिँ बचन मृदु सरल सुभाये ॥
राजकुमारि बिनय हम करहीँ । तिय-सुभायँ कछु पूछत डरहीं ॥

bāra bāra saba lāgahim̐ pāye | kahahim̐ bacana mṛdu sarala subhāye ||
rājakumāri binaya hama karahīm̐ | tiya-subhāyam̐ kachu pūchata ḍarahīṃ ||

स्वामिनि अबिनय छमबि हमारी । बिलगु न मानब जानि गवाँरी ॥
राजकुअँर दोउ सहज सलोने । इन्ह तेँ लही दुति मरकत सोने ॥

svāmini abinaya chamabi hamārī | bilagu na mānaba jāni gavām̐rī ||
rājakuam̐ra dou sahaja salone | inha tem̐ lahī duti marakata sone ||