अध्याय 105: तीर्थराज प्रयाग का राजरूप वर्णन

तेहि दिन भयउ बिटप तर बासू । लखन सखाँ सब कीन्ह सुपासू ॥
प्रात प्रातकृत करि रघुराई । तीरथराज दीख प्रभु जाई ॥

tehi dina bhayau biṭapa tara bāsū | lakhana sakhām̐ saba kīnha supāsū ||
prāta prātakṛta kari raghurāī | tīratharāja dīkha prabhu jāī ||

सचिव सत्य श्रध्दा प्रिय नारी । माधव सरिस मीत हितकारी ॥
चारि पदारथ भरा भँडारु । पुन्य प्रदेस देस अति चारु ॥

saciva satya śradhdā priya nārī | mādhava sarisa mīta hitakārī ||
cāri padāratha bharā bham̐ḍāru | punya pradesa desa ati cāru ||

छेत्र अगम गढ़ गाढ़ सुहावा । सपनेहुँ नहिं प्रतिपच्छिन्ह पावा ॥
सेन सकल तीरथ बर बीरा । कलुष अनीक दलन रनधीरा ॥

chetra agama gar̤ha gār̤ha suhāvā | sapanehum̐ nahiṃ pratipacchinha pāvā ||
sena sakala tīratha bara bīrā | kaluṣa anīka dalana ranadhīrā ||

सङ्गम सिंहासनु सुठि सोहा । छत्र अखयबटु मुनि मन मोहा ॥
चवँर जमुन अरु गङ्ग तरङ्गा । देखि होहिं दुख दारिद भङ्गा ॥

saṅgama siṃhāsanu suṭhi sohā | chatra akhayabaṭu muni mana mohā ||
cavam̐ra jamuna aru gaṅga taraṅgā | dekhi hohiṃ dukha dārida bhaṅgā ||