अध्याय 145: कुन्ती ने स्वयं को कर्ण की माता बताया

राधेयोऽहमाधिरथिः कर्णस्त्वामभिवादये ।
प्राप्ता किमर्थं भवती ब्रूहि किं करवामि ते

rādheyo'hamādhirathiḥ karṇastvāmabhivādaye |
prāptā kimarthaṃ bhavatī brūhi kiṃ karavāmi te

कौन्तेयस्त्वं न राधेयो न तवाधिरथः पिता ।
नासि सूतकुले जातः कर्ण तद्विद्धि मे वचः

kaunteyastvaṃ na rādheyo na tavādhirathaḥ pitā |
nāsi sūtakule jātaḥ karṇa tadviddhi me vacaḥ

कानीनस्त्वं मया जातः पूर्वजः कुक्षिणा धृतः ।
कुन्तिराजस्य भवने पार्थस्त्वमसि पुत्रक

kānīnastvaṃ mayā jātaḥ pūrvajaḥ kukṣiṇā dhṛtaḥ |
kuntirājasya bhavane pārthastvamasi putraka

प्रकाशकर्मा तपनो योऽयं देवो विरोचनः ।
अजीजनत्त्वां मय्येष कर्ण शस्त्रभृतां वरम्

prakāśakarmā tapano yo'yaṃ devo virocanaḥ |
ajījanattvāṃ mayyeṣa karṇa śastrabhṛtāṃ varam

कुण्डली बद्धकवचो देवगर्भः श्रिया वृतः ।
जातस्त्वमसि दुर्धर्ष मया पुत्र पितुर्गृहे

kuṇḍalī baddhakavaco devagarbhaḥ śriyā vṛtaḥ |
jātastvamasi durdharṣa mayā putra piturgṛhe

स त्वं भ्रातॄनसंबुद्ध्य मोहद्यदुपसेवसे ।
धार्तराष्ट्रान्न तद्युक्तं त्वयि पुत्र विशेषतः

sa tvaṃ bhrātṝnasaṃbuddhya mohadyadupasevase |
dhārtarāṣṭrānna tadyuktaṃ tvayi putra viśeṣataḥ

एतद्धर्मफलं पुत्र नराणां धर्मनिश्चये ।
यत्तुष्यन्त्यस्य पितरो माता चाप्येकदर्शिनी

etaddharmaphalaṃ putra narāṇāṃ dharmaniścaye |
yattuṣyantyasya pitaro mātā cāpyekadarśinī

अर्जुनेनार्जितां पूर्वं हृतां लोभादसाधुभिः ।
आच्छिद्य धार्तराष्ट्रेभ्यो भुङ्क्ष यौधिष्ठिरीं श्रियम्

arjunenārjitāṃ pūrvaṃ hṛtāṃ lobhādasādhubhiḥ |
ācchidya dhārtarāṣṭrebhyo bhuṅkṣa yaudhiṣṭhirīṃ śriyam

अद्य पश्यन्तु कुरवः कर्णार्जुनसमागमम् ।
सौभ्रात्रेण समालक्ष्य संनमन्तामसाधवः ।

adya paśyantu kuravaḥ karṇārjunasamāgamam |
saubhrātreṇa samālakṣya saṃnamantāmasādhavaḥ |

कर्णार्जुनौ वै भवतां यथा रामजनार्दनौ ।
असाध्यं किं नु लोके स्याद्युवयोः संहितात्मनोः

karṇārjunau vai bhavatāṃ yathā rāmajanārdanau |
asādhyaṃ kiṃ nu loke syādyuvayoḥ saṃhitātmanoḥ

कर्ण शोभिष्यसे नूनं पञ्चमिर्भ्रातृभिर्वृतः ।
देवैः परिवृतो ब्रह्मा वेद्यामिव महाध्वरे

karṇa śobhiṣyase nūnaṃ pañcamirbhrātṛbhirvṛtaḥ |
devaiḥ parivṛto brahmā vedyāmiva mahādhvare

उपपद्यो गुणैः सर्वैर्ज्येष्ठः श्रेष्ठेषु बन्धुषु ।
सूतपुत्रेति मा शब्दः पार्थस्त्वमसि वीर्यवान्

upapadyo guṇaiḥ sarvairjyeṣṭhaḥ śreṣṭheṣu bandhuṣu |
sūtaputreti mā śabdaḥ pārthastvamasi vīryavān