अध्याय 6: दुर्योधन द्रोण से सेनापति बनने की प्रार्थना करता है

कर्णस्य वचनं श्रुत्वा राजा दुर्योधनस्तदा ।
सेनामध्यगतं द्रोणमिदं वचनमब्रवीत्

karṇasya vacanaṃ śrutvā rājā duryodhanastadā |
senāmadhyagataṃ droṇamidaṃ vacanamabravīt

वर्णश्रैष्ठ्यात्कुलोत्पत्त्या श्रुतेन वयसा धिया ।
वीर्याद्दाक्ष्यादधृष्यत्वादर्थज्ञानान्नयाज्जयात्

varṇaśraiṣṭhyātkulotpattyā śrutena vayasā dhiyā |
vīryāddākṣyādadhṛṣyatvādarthajñānānnayājjayāt

तपसा च कृतज्ञत्वाद्वृद्धः सर्वगुणैरपि ।
युक्तो भवत्सश्रो गोप्ता राज्ञामन्यो न विद्यते

tapasā ca kṛtajñatvādvṛddhaḥ sarvaguṇairapi |
yukto bhavatsaśro goptā rājñāmanyo na vidyate

स भवान्पातु नः सर्वान्देवानिव शतक्रतुः ।
भवन्नेत्राः पराञ्जेतुमिच्छामो द्विजसत्तम

sa bhavānpātu naḥ sarvāndevāniva śatakratuḥ |
bhavannetrāḥ parāñjetumicchāmo dvijasattama

रुद्राणामिव कापालिर्वसूनामिव पावकः ।
कुबेर इव यक्षाणां मरुतामिव वासवः

rudrāṇāmiva kāpālirvasūnāmiva pāvakaḥ |
kubera iva yakṣāṇāṃ marutāmiva vāsavaḥ

वसिष्ठ इव विप्राणां तेजसामिव भास्करः ।
पितॄणामिव धर्मेन्द्रो यादसामिव चाम्बुराट्

vasiṣṭha iva viprāṇāṃ tejasāmiva bhāskaraḥ |
pitṝṇāmiva dharmendro yādasāmiva cāmburāṭ

नक्षत्राणामिव शशी दितिजानामिवोशनाः ।
सर्वेषामिव लोकानां विश्वस्य च यथा क्षयः

nakṣatrāṇāmiva śaśī ditijānāmivośanāḥ |
sarveṣāmiva lokānāṃ viśvasya ca yathā kṣayaḥ

विश्वोत्पत्तिस्थितिलये श्रेष्ठो नारायणः प्रभुः ।
एवं सेनाप्रणेतॄणां मम सेनापतिर्भव

viśvotpattisthitilaye śreṣṭho nārāyaṇaḥ prabhuḥ |
evaṃ senāpraṇetṝṇāṃ mama senāpatirbhava

अक्षौहिण्यो दशैका च वशगाः सन्तु तेऽनघ ।
ताभिः शत्रून्प्रतिव्यूह्य जहीन्द्रो दानवानिव

akṣauhiṇyo daśaikā ca vaśagāḥ santu te'nagha |
tābhiḥ śatrūnprativyūhya jahīndro dānavāniva

प्रयातु नो भवानग्रे देवानामिव पावकिः ।
अनुयास्यामहे त्वाऽऽजौ सौरभेया इवर्षभम्

prayātu no bhavānagre devānāmiva pāvakiḥ |
anuyāsyāmahe tvā''jau saurabheyā ivarṣabham

उग्रधन्वा महेष्वासो दिव्यं विष्फारयन्धनुः ।
दृष्ट्वा भवन्तं सङ्ग्रामे नार्जुनः प्रहरिष्यति

ugradhanvā maheṣvāso divyaṃ viṣphārayandhanuḥ |
dṛṣṭvā bhavantaṃ saṅgrāme nārjunaḥ prahariṣyati

ध्रुवं युधिष्ठिरं सङ्ख्ये सानुबन्धं सबान्धवम् ।
जेष्यामि पुरुषव्याघ्र भवान्सेनापतिर्यदि

dhruvaṃ yudhiṣṭhiraṃ saṅkhye sānubandhaṃ sabāndhavam |
jeṣyāmi puruṣavyāghra bhavānsenāpatiryadi

एवमुक्ते ततो द्रोणं जयेत्यूचुर्नराधिपाः ।
सिंहनादेन महता हर्षयन्तस्तवात्मजम्

evamukte tato droṇaṃ jayetyūcurnarādhipāḥ |
siṃhanādena mahatā harṣayantastavātmajam

सैनिकाश्च मुदा युक्ता वर्धयन्ति द्विजोत्तमम् ।
दुर्योधनं पुरस्कृत्य प्रार्थयन्तो महद्यशः ।
दुर्योधनं ततो राजन्द्रोणो वचनमब्रवीत्

sainikāśca mudā yuktā vardhayanti dvijottamam |
duryodhanaṃ puraskṛtya prārthayanto mahadyaśaḥ |
duryodhanaṃ tato rājandroṇo vacanamabravīt