अध्याय 160: अश्वत्थामा का क्रोध, अर्जुन से कर्ण की पराजय

तथा परुषितं दृष्ट्वा सूतपुत्रेण मातुलम् ।
खङ्गमुद्यम्य वेगेन द्रौणिरभ्यपतद्द्रुतम्

tathā paruṣitaṃ dṛṣṭvā sūtaputreṇa mātulam |
khaṅgamudyamya vegena drauṇirabhyapataddrutam

ततः परमसङ्क्रुद्धः सिंहो मत्तमिव द्विपम् ।
प्रेक्षतः कुरुराजस्य द्रौणिः कर्णं समभ्ययात्

tataḥ paramasaṅkruddhaḥ siṃho mattamiva dvipam |
prekṣataḥ kururājasya drauṇiḥ karṇaṃ samabhyayāt

यदर्युनगुणांस्तथ्यान्कीर्तयानं नराधम ।
शूरं द्वेषात्सुदुर्बुद्धे त्वं भर्त्सयसि मातुलम्

yadaryunaguṇāṃstathyānkīrtayānaṃ narādhama |
śūraṃ dveṣātsudurbuddhe tvaṃ bhartsayasi mātulam

विकत्थमानः शौर्येण सर्वलोकधनुर्धरम् ॥
दर्पोत्सेधगृहीतोऽद्य न कञ्चिद्गणयन्मृधे

vikatthamānaḥ śauryeṇa sarvalokadhanurdharam ||
darpotsedhagṛhīto'dya na kañcidgaṇayanmṛdhe

क्व ते वीर्यं क्व चास्त्राणि यं त्वां निर्जित्य संयुगे ।
गाण्डीवधन्वा हतवान्प्रेक्षतस्ते जयद्रथम्

kva te vīryaṃ kva cāstrāṇi yaṃ tvāṃ nirjitya saṃyuge |
gāṇḍīvadhanvā hatavānprekṣataste jayadratham

येन साक्षान्महादेवो योधितः समरे पुरा ।
तमिच्छसि वृथा जेतुं सूताधम मनोरथैः

yena sākṣānmahādevo yodhitaḥ samare purā |
tamicchasi vṛthā jetuṃ sūtādhama manorathaiḥ

यं हि कृष्णेन सहितं सर्वशस्त्रभृतां वरम् ।
जेतुं न शक्ताः सहिताः सेन्द्रा अपि सुरासुराः

yaṃ hi kṛṣṇena sahitaṃ sarvaśastrabhṛtāṃ varam |
jetuṃ na śaktāḥ sahitāḥ sendrā api surāsurāḥ

लोकैकवीरमजितमर्जुनं सूत संयुगे ।
किं पुनस्त्वं सुदुर्बुद्धे सहैभिर्वसुधाधिपैः

lokaikavīramajitamarjunaṃ sūta saṃyuge |
kiṃ punastvaṃ sudurbuddhe sahaibhirvasudhādhipaiḥ

कर्ण पश्य सुदुर्बुद्धे तिष्ठेदानीं नराधम ।
एष तेऽद्य शिरः कायादुद्धरामि सुदुर्मते ॥
सञ्जय उवाच ।

karṇa paśya sudurbuddhe tiṣṭhedānīṃ narādhama |
eṣa te'dya śiraḥ kāyāduddharāmi sudurmate ||
sañjaya uvāca |

तमुद्यतं तु वेगेन राजा दुर्योधनः स्वयम् ।
न्यवारयन्महातेजाः कृपश्च द्विपदां वरः

tamudyataṃ tu vegena rājā duryodhanaḥ svayam |
nyavārayanmahātejāḥ kṛpaśca dvipadāṃ varaḥ

शूरोऽयं समरश्लाघी दुर्मतिश्च द्विजाधमः ।
आसादयतु मद्वीर्यं मुञ्चेमं कुरुसत्तम

śūro'yaṃ samaraślāghī durmatiśca dvijādhamaḥ |
āsādayatu madvīryaṃ muñcemaṃ kurusattama

तैवतत्क्षम्यतेऽस्माभिः सूतात्मज सुदुर्मते ।
दर्पमुत्सिक्तमेतत्ते फल्गुनो नाशयिष्यति

taivatatkṣamyate'smābhiḥ sūtātmaja sudurmate |
darpamutsiktametatte phalguno nāśayiṣyati

अश्वत्थामन्प्रसीदस्व क्षन्तुमर्हसि मानद ।
कोपः खलु न कर्तव्यः सूतपुत्रं कथञ्चन

aśvatthāmanprasīdasva kṣantumarhasi mānada |
kopaḥ khalu na kartavyaḥ sūtaputraṃ kathañcana

त्वयि कर्णे कृपे द्रोणे मद्रराजेऽथ सौबले ।
महत्कार्यं समासक्तं प्रसीद द्विजसत्तम

tvayi karṇe kṛpe droṇe madrarāje'tha saubale |
mahatkāryaṃ samāsaktaṃ prasīda dvijasattama

एते ह्यभिमुखाः सर्वे राधेयेन युयुत्सवः ।
आयान्ति पाण्डवा ब्रह्मन्नाह्वयन्तः समन्ततः

ete hyabhimukhāḥ sarve rādheyena yuyutsavaḥ |
āyānti pāṇḍavā brahmannāhvayantaḥ samantataḥ

प्रसाद्यमानस्तु ततो राज्ञा द्रौणिर्महामनाः ।
प्रससाद महाराज क्रोधवेगसमन्वितः

prasādyamānastu tato rājñā drauṇirmahāmanāḥ |
prasasāda mahārāja krodhavegasamanvitaḥ

ततः कृपोऽप्युवाचेदमाचार्यः सुमहामनाः ।
सौम्यस्वभावाद्राजनेन्द्र क्षिप्रमागतमार्दवः

tataḥ kṛpo'pyuvācedamācāryaḥ sumahāmanāḥ |
saumyasvabhāvādrājanendra kṣipramāgatamārdavaḥ

तवैतत्क्षम्यतेऽस्माभिः सूतात्मज सुदुर्मते ।
दर्पमुत्सिक्तमेतत्ते फल्गुनो नाशयिष्यति

tavaitatkṣamyate'smābhiḥ sūtātmaja sudurmate |
darpamutsiktametatte phalguno nāśayiṣyati

ततस्ते पाण्डवा राजन्पाञ्चालाश्च यशस्विनः ।
आजग्मुः सहिताः कर्णं तर्जयन्तः समन्ततः

tataste pāṇḍavā rājanpāñcālāśca yaśasvinaḥ |
ājagmuḥ sahitāḥ karṇaṃ tarjayantaḥ samantataḥ

कर्णोऽपि रथिनां श्रेष्ठश्चापमुद्यम्य वीर्यवान् ।
कौरवाग्र्यैः परिवृतः शक्रो देवगणैरिव ।
पर्यतिष्ठत तेजस्वी स्वबाहुबलमाश्रितः

karṇo'pi rathināṃ śreṣṭhaścāpamudyamya vīryavān |
kauravāgryaiḥ parivṛtaḥ śakro devagaṇairiva |
paryatiṣṭhata tejasvī svabāhubalamāśritaḥ

ततः प्रववृते युद्धं कर्णस्य सह पाण्डवैः ।
भीषणं सुमहाराज सिंहनादविराजितम्

tataḥ pravavṛte yuddhaṃ karṇasya saha pāṇḍavaiḥ |
bhīṣaṇaṃ sumahārāja siṃhanādavirājitam

ततस्ते पाण्डवा राजन्पाञ्चालाश्च यशस्विनः ।
दृष्ट्वा कर्णं महाबाहुमुच्चैः शब्दमथानदन्

tataste pāṇḍavā rājanpāñcālāśca yaśasvinaḥ |
dṛṣṭvā karṇaṃ mahābāhumuccaiḥ śabdamathānadan

अयं कर्णः कुतः कर्णस्तिष्ठ कर्ण महारणे ।
युध्यस्व सहितोऽस्माभिर्दुरात्मन्पुरुषाधम

ayaṃ karṇaḥ kutaḥ karṇastiṣṭha karṇa mahāraṇe |
yudhyasva sahito'smābhirdurātmanpuruṣādhama

अन्ये तु दृष्ट्वा राधेयं क्रोधरक्रेक्षणाऽब्रुवन् ।
हन्यतामयमुत्सिक्तः सूतपुत्रोऽल्पचेतनः ।
सर्वैः पार्थिवशार्दूलैर्नानेनार्थोऽस्ति जीवता ।

anye tu dṛṣṭvā rādheyaṃ krodharakrekṣaṇā'bruvan |
hanyatāmayamutsiktaḥ sūtaputro'lpacetanaḥ |
sarvaiḥ pārthivaśārdūlairnānenārtho'sti jīvatā |

अत्यन्तवैरी पार्थानां सततं पापपूरुषः ।
एष मूलमनर्थानां दुर्योधनमते स्थितः

atyantavairī pārthānāṃ satataṃ pāpapūruṣaḥ |
eṣa mūlamanarthānāṃ duryodhanamate sthitaḥ

घ्नतैनमिति जल्पन्तः क्षत्रियाः समुपाद्रवन् ।
महता शरवर्षेण च्छादयन्तो महारथाः ।
वधार्थं सूतपुत्रस्य पाण्डवेयेन चोदिताः

ghnatainamiti jalpantaḥ kṣatriyāḥ samupādravan |
mahatā śaravarṣeṇa cchādayanto mahārathāḥ |
vadhārthaṃ sūtaputrasya pāṇḍaveyena coditāḥ

तांस्तु सर्वांस्तथा दृष्ट्वा धावमानान्महारथान् ।
न विव्यथे सूतपुत्रो न च त्रासमगच्छत

tāṃstu sarvāṃstathā dṛṣṭvā dhāvamānānmahārathān |
na vivyathe sūtaputro na ca trāsamagacchata

दृष्ट्वा सागस्कल्पं तमुद्धूतं सैन्यसागरम् ।
पिप्रीषुस्तव पुत्राणां सङ्ग्रामेष्वपराजितः

dṛṣṭvā sāgaskalpaṃ tamuddhūtaṃ sainyasāgaram |
piprīṣustava putrāṇāṃ saṅgrāmeṣvaparājitaḥ

सायकौधेन बलवान्क्षिप्रकारी महाबलः ।
वारयामास तत्सैन्यं समन्ताद्भरतर्पभ

sāyakaudhena balavānkṣiprakārī mahābalaḥ |
vārayāmāsa tatsainyaṃ samantādbharatarpabha

ततस्तु शरवर्षेण पार्थिवास्तमवारयन् ।
धनुम्पि ते विधुन्वानाः शतशोऽथ सहस्रशः ।
अयोधयन्त राधेयं शक्रं दैत्यगणा इव

tatastu śaravarṣeṇa pārthivāstamavārayan |
dhanumpi te vidhunvānāḥ śataśo'tha sahasraśaḥ |
ayodhayanta rādheyaṃ śakraṃ daityagaṇā iva

शरवर्पं तु तत्कर्णः पार्थिवैः समुदीरितम् ।
शरवर्षेण महता समन्ताद्व्यकिरत्प्रभो

śaravarpaṃ tu tatkarṇaḥ pārthivaiḥ samudīritam |
śaravarṣeṇa mahatā samantādvyakiratprabho

तद्युद्धमभवत्तेषां कृतप्रतिकृतैषिणाम् ।
यथा देवासुरे युद्धे शक्रस्य सह दानैवः

tadyuddhamabhavatteṣāṃ kṛtapratikṛtaiṣiṇām |
yathā devāsure yuddhe śakrasya saha dānaivaḥ

तत्राद्भुतमपश्याम सूतपुत्रस्य लाघवम् ।
यदेनं सर्वतो यत्ता नाप्नुवन्ति परे युधि

tatrādbhutamapaśyāma sūtaputrasya lāghavam |
yadenaṃ sarvato yattā nāpnuvanti pare yudhi

निवार्य च शरौघांस्तान्पार्थिवानां महारथः ।
युगेष्वीषासु च्छत्रेषु ध्वजेषु च हयेषु च ।
आत्मनामाङ्कितान्घोरान्राधेयः प्राहिणोच्छरान्

nivārya ca śaraughāṃstānpārthivānāṃ mahārathaḥ |
yugeṣvīṣāsu cchatreṣu dhvajeṣu ca hayeṣu ca |
ātmanāmāṅkitānghorānrādheyaḥ prāhiṇoccharān

ततस्ते व्याकुलीभूता राजानः कर्णपीडिताः ।
बभ्रुमुस्तत्र तत्रैव गावः शीतार्दिता इव

tataste vyākulībhūtā rājānaḥ karṇapīḍitāḥ |
babhrumustatra tatraiva gāvaḥ śītārditā iva

हयानां वध्यमानानां गजानां रथिनां तथा ।
तत्रतत्राभ्यवेक्षाम सङ्घान्कर्णेन ताडितान्

hayānāṃ vadhyamānānāṃ gajānāṃ rathināṃ tathā |
tatratatrābhyavekṣāma saṅghānkarṇena tāḍitān

शिरोभिः पतितै राजन्बाहुभिश्च समन्ततः ।
आस्तीर्णा वसुधा सर्वा शूराणामनिवर्तिनाम्

śirobhiḥ patitai rājanbāhubhiśca samantataḥ |
āstīrṇā vasudhā sarvā śūrāṇāmanivartinām

हतैश्च हन्यमानैश्च निष्टनद्भिश्च सर्वशः ।
बभूवायोधनं रौद्रं वैवस्वतपुरोपमम्

hataiśca hanyamānaiśca niṣṭanadbhiśca sarvaśaḥ |
babhūvāyodhanaṃ raudraṃ vaivasvatapuropamam

ततो दुर्योधनो राजा दृष्ट्वा कर्णस्य विक्रमम् ।
अश्वत्थामानमासाद्य वाक्यमेतदुवाच ह

tato duryodhano rājā dṛṣṭvā karṇasya vikramam |
aśvatthāmānamāsādya vākyametaduvāca ha

युध्यतेऽसौ रणे कर्णो दंशितः सर्वपार्थिवैः

yudhyate'sau raṇe karṇo daṃśitaḥ sarvapārthivaiḥ

पश्यैतां द्रवतीं सेनां कर्णसायकपीडिताम् ।
कार्तिकेयेन विध्वस्तामासुरीं पृतनामिव

paśyaitāṃ dravatīṃ senāṃ karṇasāyakapīḍitām |
kārtikeyena vidhvastāmāsurīṃ pṛtanāmiva

दृष्ट्वैतां निर्जितां सेनां रणे कर्णेन धीमता ।
अभियात्येष बीभत्सुः सूतपुत्रजिघांसया

dṛṣṭvaitāṃ nirjitāṃ senāṃ raṇe karṇena dhīmatā |
abhiyātyeṣa bībhatsuḥ sūtaputrajighāṃsayā

तद्यथा प्रेक्षमाणानां सूतपुत्रं महारथम् ।
न हन्यात्पाण्डवः सङ्ख्ये तथा नीतिर्विधीयतां

tadyathā prekṣamāṇānāṃ sūtaputraṃ mahāratham |
na hanyātpāṇḍavaḥ saṅkhye tathā nītirvidhīyatāṃ

ततो द्रौणिः कृपः शल्यो हार्दिक्यश्च महारथः ।
प्रत्युद्ययुस्तदा पार्थं सूतपुत्रपरीप्सया ।
आयान्तं वीक्ष्य कौन्तेयं शक्रं दैत्यचमूमिव

tato drauṇiḥ kṛpaḥ śalyo hārdikyaśca mahārathaḥ |
pratyudyayustadā pārthaṃ sūtaputraparīpsayā |
āyāntaṃ vīkṣya kaunteyaṃ śakraṃ daityacamūmiva

बीभत्सुरपि राजेन्द्र पाञ्चालैरभिसंवृतः ।
प्रत्युद्ययौ तदा कर्णं यथा वृत्रं शतक्रतुः

bībhatsurapi rājendra pāñcālairabhisaṃvṛtaḥ |
pratyudyayau tadā karṇaṃ yathā vṛtraṃ śatakratuḥ

संरब्धं फल्गुनं दृष्ट्वा कालान्तकयमोपमम् ।
कर्णो वैकर्तनः सूत प्रत्यपद्यत्किमुत्तरम्

saṃrabdhaṃ phalgunaṃ dṛṣṭvā kālāntakayamopamam |
karṇo vaikartanaḥ sūta pratyapadyatkimuttaram

यो ह्यस्पर्धत पार्थेन नित्यमेव महारथः ।
आशंसते च बीभत्सुं युद्धे जेतुं सुदारुणम्

yo hyaspardhata pārthena nityameva mahārathaḥ |
āśaṃsate ca bībhatsuṃ yuddhe jetuṃ sudāruṇam

स तु तं सहसा प्राप्तं नित्यमत्यन्तवैरिणम् ।
कर्णो वैकर्तनः सूत किमुत्तरमपद्यत

sa tu taṃ sahasā prāptaṃ nityamatyantavairiṇam |
karṇo vaikartanaḥ sūta kimuttaramapadyata

आयान्तं पाण्डव दृष्ट्वा गजं प्रतिगजो यथा ।
असम्भ्रान्तो रणे कर्णः प्रत्युदीयाद्धनञ्जयम्

āyāntaṃ pāṇḍava dṛṣṭvā gajaṃ pratigajo yathā |
asambhrānto raṇe karṇaḥ pratyudīyāddhanañjayam

तमापतन्तं वेगेन वैकर्तनमजिह्मगैः ।
छादयामास पार्थोऽथ कर्णस्तु विजयं शरैः

tamāpatantaṃ vegena vaikartanamajihmagaiḥ |
chādayāmāsa pārtho'tha karṇastu vijayaṃ śaraiḥ

स कर्णं शरजालेन च्छादयामास पाण्‍डवः ।
ततः कर्णः सुसंरब्धः शरैस्त्रिभिरविध्यत

sa karṇaṃ śarajālena cchādayāmāsa pāṇ‍ḍavaḥ |
tataḥ karṇaḥ susaṃrabdhaḥ śaraistribhiravidhyata

तस्य तल्लाघवं पार्थो नामृष्यत महाबलः

tasya tallāghavaṃ pārtho nāmṛṣyata mahābalaḥ

तस्मै बाणाञ्शिलाधौतान्प्रसन्नाग्रानजिह्मगान् ।
प्राहिणोत्सूतपुत्राय त्रिशतं शत्रुतापनः

tasmai bāṇāñśilādhautānprasannāgrānajihmagān |
prāhiṇotsūtaputrāya triśataṃ śatrutāpanaḥ

विव्याध चैनं संरब्धो बाणेनैकेन वीर्यवान् ।
सव्ये भुजाग्रे बलवान्नाराचेन हसन्निव

vivyādha cainaṃ saṃrabdho bāṇenaikena vīryavān |
savye bhujāgre balavānnārācena hasanniva

तस्य विद्धस्य बाणेन कराच्चापं पपात ह

tasya viddhasya bāṇena karāccāpaṃ papāta ha

पुनरादाय तच्चापं निमेषार्धान्महाबलः ।
छादयामास बाणौघैः फल्गुनं कृतहस्तवत्

punarādāya taccāpaṃ nimeṣārdhānmahābalaḥ |
chādayāmāsa bāṇaughaiḥ phalgunaṃ kṛtahastavat

शरवृष्टिं तु तां मुक्तां सूतपुत्रेण भारत ।
व्यधमच्छरवर्षेण स्मयन्निव धनञ्जयः

śaravṛṣṭiṃ tu tāṃ muktāṃ sūtaputreṇa bhārata |
vyadhamaccharavarṣeṇa smayanniva dhanañjayaḥ

तौ परस्परमासाद्य शरवर्षेण पार्थिव ।
छादयेतां महेष्वासौ कृतप्रतिकृतैषिणौ

tau parasparamāsādya śaravarṣeṇa pārthiva |
chādayetāṃ maheṣvāsau kṛtapratikṛtaiṣiṇau

तदद्भुतं महद्युद्धं कर्णपाण्डवयोर्मृधे ।
क्रुद्धयोर्वासिताहेतोर्वन्ययोर्गजयोरिव

tadadbhutaṃ mahadyuddhaṃ karṇapāṇḍavayormṛdhe |
kruddhayorvāsitāhetorvanyayorgajayoriva

ततः पार्थो महेष्वासो दृष्ट्वा कर्णस्य विक्रमम् ।
मुष्टिदेशे धनुस्तस्य चिच्छेद त्वरयाऽन्वितः

tataḥ pārtho maheṣvāso dṛṣṭvā karṇasya vikramam |
muṣṭideśe dhanustasya ciccheda tvarayā'nvitaḥ

अश्वांश्च चतुरो भल्लैरनयद्यमसादनम् ।
सारथेश्च शिसः कायादहरच्छत्रुतापनः

aśvāṃśca caturo bhallairanayadyamasādanam |
sāratheśca śisaḥ kāyādaharacchatrutāpanaḥ

अथैनं छिन्नधन्वानं हताश्वं हतसारथिम् ।
विव्याध सायकैः पार्थश्चतुर्भिः पाण्डुनन्दनः

athainaṃ chinnadhanvānaṃ hatāśvaṃ hatasārathim |
vivyādha sāyakaiḥ pārthaścaturbhiḥ pāṇḍunandanaḥ

हताश्वात्तु रथात्तूर्णमवप्लुत्य नरर्षभः ।
आरुरोह रथं तूर्णं कृपस्य शरपीडितः

hatāśvāttu rathāttūrṇamavaplutya nararṣabhaḥ |
āruroha rathaṃ tūrṇaṃ kṛpasya śarapīḍitaḥ

स नुन्नोऽर्जुनबाणौघैराचितः शल्यको यथा ।
जीवितार्थमभिप्रेप्सुः कृपस्य रथमारुहत्

sa nunno'rjunabāṇaughairācitaḥ śalyako yathā |
jīvitārthamabhiprepsuḥ kṛpasya rathamāruhat

राधेयं निर्जितं दृष्ट्वा तावका भरतर्षभ ।
धनञ्जयशरैर्नुन्नाः प्राद्रवन्त दिशो दश

rādheyaṃ nirjitaṃ dṛṣṭvā tāvakā bharatarṣabha |
dhanañjayaśarairnunnāḥ prādravanta diśo daśa

द्रवतस्तान्समालोक्य राजा दुर्योधनो नृप ।
निवर्तयामास तदा वाक्यमेतदुवाच ह

dravatastānsamālokya rājā duryodhano nṛpa |
nivartayāmāsa tadā vākyametaduvāca ha

अलं द्रुतेन वः शूरास्तिष्ठध्वं क्षत्रियर्षभाः ।
एष पार्थवधायाहं स्वयं गच्छामि संयुगे ।
अहं पार्थान्हनिष्यामि सपाञ्चालान्ससोमकान्

alaṃ drutena vaḥ śūrāstiṣṭhadhvaṃ kṣatriyarṣabhāḥ |
eṣa pārthavadhāyāhaṃ svayaṃ gacchāmi saṃyuge |
ahaṃ pārthānhaniṣyāmi sapāñcālānsasomakān

अद्य मे युध्यमानस्य सह गाण्डीवधन्वना ।
द्रक्ष्यन्ति विक्रमं पार्थाः कालस्येव युगक्षये

adya me yudhyamānasya saha gāṇḍīvadhanvanā |
drakṣyanti vikramaṃ pārthāḥ kālasyeva yugakṣaye

अद्य मद्बाणजालानि विमुक्तानि सहस्रशः ।
द्रक्ष्यन्ति समरे योधाः शलभानामिवायतीः

adya madbāṇajālāni vimuktāni sahasraśaḥ |
drakṣyanti samare yodhāḥ śalabhānāmivāyatīḥ

अद्य बाणमयं वर्षं सृजतो मम धन्विनः ।
जीमूतस्येव घर्मान्ते द्रक्ष्यन्ति युधि सैनिकाः

adya bāṇamayaṃ varṣaṃ sṛjato mama dhanvinaḥ |
jīmūtasyeva gharmānte drakṣyanti yudhi sainikāḥ

जेष्याम्यद्य रणे पार्थं सायकैर्नतपर्वभिः ।
तिष्ठध्वं समरे शूरा भयं त्यजत फल्गुनात्

jeṣyāmyadya raṇe pārthaṃ sāyakairnataparvabhiḥ |
tiṣṭhadhvaṃ samare śūrā bhayaṃ tyajata phalgunāt

न हि मद्वीर्यमासाद्य फल्गुनः प्रसहिष्यति ।
यथा वेलां समासाद्य सागरो मकरालयः

na hi madvīryamāsādya phalgunaḥ prasahiṣyati |
yathā velāṃ samāsādya sāgaro makarālayaḥ

इत्युक्त्वा प्रययौ राजा सैन्येन महता वृतः ।
फल्गुनं प्रतिदुर्धर्षः क्रोधात्संरक्तलोचनः

ityuktvā prayayau rājā sainyena mahatā vṛtaḥ |
phalgunaṃ pratidurdharṣaḥ krodhātsaṃraktalocanaḥ

तं प्रयान्तं महाबाहुं दृष्ट्वा शारद्वतस्तदा ।
अश्वत्थामानमासाद्य वाक्यमेतदुवाच ह

taṃ prayāntaṃ mahābāhuṃ dṛṣṭvā śāradvatastadā |
aśvatthāmānamāsādya vākyametaduvāca ha

एष राजा महाबाहुरमर्षी क्रोधमूर्च्छितः ।
पतङ्गवृत्तिमास्थाय फल्गुनं योद्धुमिच्छति

eṣa rājā mahābāhuramarṣī krodhamūrcchitaḥ |
pataṅgavṛttimāsthāya phalgunaṃ yoddhumicchati

यावन्नः पश्यमानानां प्राणान्पार्थेन संगतः ।
न जह्यात्पुरुषव्याघ्रस्तावद्वारय कौरवम्

yāvannaḥ paśyamānānāṃ prāṇānpārthena saṃgataḥ |
na jahyātpuruṣavyāghrastāvadvāraya kauravam

यावत्फल्गुनबाणानां गोचरं नाद्य गच्छति ।
कौरवः पार्थिवो वीरस्तावद्वारय संयुगे

yāvatphalgunabāṇānāṃ gocaraṃ nādya gacchati |
kauravaḥ pārthivo vīrastāvadvāraya saṃyuge

यावत्पार्थशरैर्घोरैर्निर्मुक्तोरगसन्निभैः ।
न भस्मीक्रियते राजा तावद्युद्धान्निवार्यताम्

yāvatpārthaśarairghorairnirmuktoragasannibhaiḥ |
na bhasmīkriyate rājā tāvadyuddhānnivāryatām

अयुक्तमिव पश्यामि तिष्ठत्स्वस्मासु मानद ।
स्वयं युद्धाय यद्राजा पार्थं यात्यसहायवान्

ayuktamiva paśyāmi tiṣṭhatsvasmāsu mānada |
svayaṃ yuddhāya yadrājā pārthaṃ yātyasahāyavān

दुर्लभं जीवितं मन्ये कौरव्यस्य किरीटिना ।
युध्यमानस्य पार्थेन शार्दूलेनेव हस्तिनः

durlabhaṃ jīvitaṃ manye kauravyasya kirīṭinā |
yudhyamānasya pārthena śārdūleneva hastinaḥ

मातुलेनैवमुक्तस्तु द्रौणिः शस्त्रभृतां वरः ।
दुर्योधनमिदं वाक्यं त्वरितः समभाषत

mātulenaivamuktastu drauṇiḥ śastrabhṛtāṃ varaḥ |
duryodhanamidaṃ vākyaṃ tvaritaḥ samabhāṣata

मयि जीवति गान्धारे न युद्धं गन्तुमर्हसि ।
मामनादृत्य कौरव्य तव नित्यं हितैषिणम्

mayi jīvati gāndhāre na yuddhaṃ gantumarhasi |
māmanādṛtya kauravya tava nityaṃ hitaiṣiṇam

न हि सम्भ्रमः कार्यः पार्थस्य विजयं प्रति ।
अहमावारयिष्यामि पार्थं तिष्ठ सुयोधन

na hi sambhramaḥ kāryaḥ pārthasya vijayaṃ prati |
ahamāvārayiṣyāmi pārthaṃ tiṣṭha suyodhana

आचार्यः पाण्डुपुत्रान्वै पुत्रवत्परिरक्षति ।
त्वमप्युपेक्षां कुरुषे तेषु नित्यं द्विजोत्तम्

ācāryaḥ pāṇḍuputrānvai putravatparirakṣati |
tvamapyupekṣāṃ kuruṣe teṣu nityaṃ dvijottam

मम वा मन्दभाग्यत्वान्मन्दस्ते विक्रमो युधि ।
धर्मराजप्नियार्थं वा द्रौपद्या वा न विद्म तत्

mama vā mandabhāgyatvānmandaste vikramo yudhi |
dharmarājapniyārthaṃ vā draupadyā vā na vidma tat

धिगस्तु मम लुब्धस्य यत्कृते सर्वबान्धवाः ।
सुखार्हाः परमं दुःखं प्राप्नुवन्त्यपराजिताः

dhigastu mama lubdhasya yatkṛte sarvabāndhavāḥ |
sukhārhāḥ paramaṃ duḥkhaṃ prāpnuvantyaparājitāḥ

को हि शस्त्रविदां मुख्यो महेश्वरसमो युधि ।
शत्रुं न क्षपयेच्छक्तो यो न स्याद्गौतमीसुतः

ko hi śastravidāṃ mukhyo maheśvarasamo yudhi |
śatruṃ na kṣapayecchakto yo na syādgautamīsutaḥ

अश्वत्थामन्प्रसीदस्व नाशयैतान्ममाहितान् ।
तवास्त्रगोचरे शक्ताः स्थातुं देवा न दानवाः

aśvatthāmanprasīdasva nāśayaitānmamāhitān |
tavāstragocare śaktāḥ sthātuṃ devā na dānavāḥ

पाञ्चालान्सोमकांश्चैव जहि द्रौणे सहानुगान् ।
वयं शेषान्हनिष्यामस्त्वयैव परिरक्षिताः

pāñcālānsomakāṃścaiva jahi drauṇe sahānugān |
vayaṃ śeṣānhaniṣyāmastvayaiva parirakṣitāḥ

एते हि सोमका विप्र पाञ्चालाश्च यशस्विनः ।
मम सैन्येषु सङ्क्रुद्धा विचरन्ति दवाग्निवत्

ete hi somakā vipra pāñcālāśca yaśasvinaḥ |
mama sainyeṣu saṅkruddhā vicaranti davāgnivat

तान्वारय महाबाहो केकयांश्च नरोत्तम ।
पुरा कुर्वन्ति निःशेषं रक्ष्यमाणाः किरीटिना

tānvāraya mahābāho kekayāṃśca narottama |
purā kurvanti niḥśeṣaṃ rakṣyamāṇāḥ kirīṭinā

अश्वत्थामंस्त्वरायुक्तो याहि शीघ्रमरिन्दम ।
आदौ वा यदि वा पश्चात्तवेदं कर्म मारिष

aśvatthāmaṃstvarāyukto yāhi śīghramarindama |
ādau vā yadi vā paścāttavedaṃ karma māriṣa

त्वमुत्पन्नो महाबाहो पाञ्चालानां वधं प्रति ।
करिष्यसि जगत्सर्वमपाञ्चालं किलोद्यतः

tvamutpanno mahābāho pāñcālānāṃ vadhaṃ prati |
kariṣyasi jagatsarvamapāñcālaṃ kilodyataḥ

एवं सिद्धाऽब्रुवन्वाचो भविष्यति च तत्तथा ।
तस्मात्त्वं पुरुषव्याघ्र पाञ्चालाञ्जहि सानुगान्

evaṃ siddhā'bruvanvāco bhaviṣyati ca tattathā |
tasmāttvaṃ puruṣavyāghra pāñcālāñjahi sānugān

न तेऽस्त्रगोचरे शक्ताः स्थातुं देवाः सवासवाः ।
किमु पार्थाः सपाञ्चालाः सत्यमेतद्ब्रवीमि ते

na te'stragocare śaktāḥ sthātuṃ devāḥ savāsavāḥ |
kimu pārthāḥ sapāñcālāḥ satyametadbravīmi te

न त्वां समर्थाः सङ्ग्रामे पाण्डवाः सह सोमकैः ।
बलाद्योधयितुं वीर सत्यमेतद्ब्रवीमि ते

na tvāṃ samarthāḥ saṅgrāme pāṇḍavāḥ saha somakaiḥ |
balādyodhayituṃ vīra satyametadbravīmi te

गच्छगच्छ महाबाहो न नः कालात्ययो भवेत् ।
इयं हि द्रवते सेना पार्तसायकपीडिता

gacchagaccha mahābāho na naḥ kālātyayo bhavet |
iyaṃ hi dravate senā pārtasāyakapīḍitā

शक्तो ह्यसि महाबाहो दिव्येन स्वेन तेजसा ।
निग्रहे पाण्डुपुत्राणां पाञ्चालानां च मानद

śakto hyasi mahābāho divyena svena tejasā |
nigrahe pāṇḍuputrāṇāṃ pāñcālānāṃ ca mānada