अध्याय 177: नारद द्वारा अर्जुन के अस्त्र प्रदर्शन पर रोक

तस्यां रात्र्यां व्यतीतायां धर्मराजो युधिष्ठिरः ।
उत्थायावश्यकार्याणि कृतवान्भ्रातृभिः सह

tasyāṃ rātryāṃ vyatītāyāṃ dharmarājo yudhiṣṭhiraḥ |
utthāyāvaśyakāryāṇi kṛtavānbhrātṛbhiḥ saha

ततः संचोदयामास सोऽर्जुनं मातृनन्दनम् ।
दर्शयास्त्राणि कौन्तेय यैर्जिता दानवास्त्वया

tataḥ saṃcodayāmāsa so'rjunaṃ mātṛnandanam |
darśayāstrāṇi kaunteya yairjitā dānavāstvayā

ततो धनंजयो राजन्देवैर्दत्तानि पाण्डवः ।
अस्त्राणि तानि दिव्यानि दर्शयामास भारत

tato dhanaṃjayo rājandevairdattāni pāṇḍavaḥ |
astrāṇi tāni divyāni darśayāmāsa bhārata

यथान्यायं महातेजाः शौचं परममास्थितः ।
नमस्कृत्य त्रिनेत्राय वासवाय च पाण्डवः

yathānyāyaṃ mahātejāḥ śaucaṃ paramamāsthitaḥ |
namaskṛtya trinetrāya vāsavāya ca pāṇḍavaḥ

गिरिकूबरपादाक्षं शुभवेणु त्रिवेणुमत् ।
पार्थिवं रथमास्थाय शोभमानो धनंजयः

girikūbarapādākṣaṃ śubhaveṇu triveṇumat |
pārthivaṃ rathamāsthāya śobhamāno dhanaṃjayaḥ

दिव्येन संवृतस्तेन कवचेन सुवर्चसा ।
धनुरादाय गाण्डीवं देवदत्तं स वारिजम्

divyena saṃvṛtastena kavacena suvarcasā |
dhanurādāya gāṇḍīvaṃ devadattaṃ sa vārijam

शोशुभ्यमानः कौन्तेय आनुपूर्व्यान्महाभुजः ।
अस्त्राणि तानि दिव्यानि दर्शनायोपचक्रमे

śośubhyamānaḥ kaunteya ānupūrvyānmahābhujaḥ |
astrāṇi tāni divyāni darśanāyopacakrame

अथ प्रयोक्ष्यमाणेषु दिव्येष्वस्त्रेषु तेषु वै ।
समाक्रान्ता मही पद्भ्यां समकम्पत सद्रुमा

atha prayokṣyamāṇeṣu divyeṣvastreṣu teṣu vai |
samākrāntā mahī padbhyāṃ samakampata sadrumā

क्षुभिताः सरितश्चैव तथैव च महोदधिः ।
शैलाश्चापि व्यदीर्यन्त न ववौ च समीरणः

kṣubhitāḥ saritaścaiva tathaiva ca mahodadhiḥ |
śailāścāpi vyadīryanta na vavau ca samīraṇaḥ

न बभासे सहस्रांशुर्न जज्वाल च पावकः ।
न वेदाः प्रतिभान्ति स्म द्विजातीनां कथंचन

na babhāse sahasrāṃśurna jajvāla ca pāvakaḥ |
na vedāḥ pratibhānti sma dvijātīnāṃ kathaṃcana

अन्तर्भूमिगता ये च प्राणिनो जनमेजय ।
पीड्यमानाः समुत्थाय पाण्डवं पर्यवारयन्

antarbhūmigatā ye ca prāṇino janamejaya |
pīḍyamānāḥ samutthāya pāṇḍavaṃ paryavārayan

वेपमानाः प्राञ्जलयस्ते सर्वे विकृताननाः ।
दह्यमानास्तदाऽस्त्रैस्ते याचन्ति स्म धनंजयम्

vepamānāḥ prāñjalayaste sarve vikṛtānanāḥ |
dahyamānāstadā'straiste yācanti sma dhanaṃjayam

ततो ब्रह्मर्षयश्चैव सिद्धा ये च महर्षयः ।
जङ्गमानि च भूतानि सर्वाण्येवावतस्थिरे

tato brahmarṣayaścaiva siddhā ye ca maharṣayaḥ |
jaṅgamāni ca bhūtāni sarvāṇyevāvatasthire

देवर्षयश्च प्रवरास्तथैव च दिवौकसः ।
यक्षराक्षसगन्धर्वास्तथैव च पतत्रिणः ।
खेचराणि च भूतानि सर्वाण्येवावतस्थिरे

devarṣayaśca pravarāstathaiva ca divaukasaḥ |
yakṣarākṣasagandharvāstathaiva ca patatriṇaḥ |
khecarāṇi ca bhūtāni sarvāṇyevāvatasthire

ततः पितामहश्चैव लोकपालाश्च सर्वशः ।
भगवांश्च महादेवः सगणोऽभ्याययौ तदा

tataḥ pitāmahaścaiva lokapālāśca sarvaśaḥ |
bhagavāṃśca mahādevaḥ sagaṇo'bhyāyayau tadā

ततो वायुर्महाराज दिव्यैर्माल्यैः समन्वितः ।
अभितः पाण्डवंचित्रैरवचक्रे समन्ततः

tato vāyurmahārāja divyairmālyaiḥ samanvitaḥ |
abhitaḥ pāṇḍavaṃcitrairavacakre samantataḥ

जगुश्च गाथा विविधा गन्धर्वाः सुरचोदिताः ।
ननृतुः सङ्घशश्चैव राजन्नप्सरसां गणाः

jaguśca gāthā vividhā gandharvāḥ suracoditāḥ |
nanṛtuḥ saṅghaśaścaiva rājannapsarasāṃ gaṇāḥ

तस्मिंश्च तादृशे काले नारदश्चोदितः सुरैः ।
आगम्याह वचः पार्थं श्रवणीयमिदं नृप

tasmiṃśca tādṛśe kāle nāradaścoditaḥ suraiḥ |
āgamyāha vacaḥ pārthaṃ śravaṇīyamidaṃ nṛpa

अर्जुनार्जुन मा युङ्क्ष दिव्यान्यस्त्राणि भारत ।
नैतानि निरधिष्ठाने प्रयुज्यन्ते कथंचन

arjunārjuna mā yuṅkṣa divyānyastrāṇi bhārata |
naitāni niradhiṣṭhāne prayujyante kathaṃcana

अधिष्ठाने न वाऽनार्तः प्रयुञ्जीत कदाचन ।
प्रयोगेषु महान्दोषो ह्यस्त्राणां कुरुनन्दन

adhiṣṭhāne na vā'nārtaḥ prayuñjīta kadācana |
prayogeṣu mahāndoṣo hyastrāṇāṃ kurunandana

एतानि रक्ष्यमाणानि धनंजय यथागमम् ।
बलवन्ति सुखार्हाणि भविष्यन्ति न संशयः

etāni rakṣyamāṇāni dhanaṃjaya yathāgamam |
balavanti sukhārhāṇi bhaviṣyanti na saṃśayaḥ

अरक्ष्यमाणान्येतानि त्रैलोक्यस्यापि पाण्डव ।
भवन्ति स्म विनाशाय मैवं भूयः कृथाः क्वचित्

arakṣyamāṇānyetāni trailokyasyāpi pāṇḍava |
bhavanti sma vināśāya maivaṃ bhūyaḥ kṛthāḥ kvacit

अजातशत्रो त्वं चैव द्रक्ष्यसे तानि संयुगे ।
योज्यमानानि पार्थे नद्विषतामवमर्दने

ajātaśatro tvaṃ caiva drakṣyase tāni saṃyuge |
yojyamānāni pārthe nadviṣatāmavamardane

निवार्याथ ततः पार्थं सर्वे देवा यथागतम् ।
जग्मुरन्ये च ये तत्र रसमाजग्मुर्नरर्षभ

nivāryātha tataḥ pārthaṃ sarve devā yathāgatam |
jagmuranye ca ye tatra rasamājagmurnararṣabha

तेषु सर्वेषु कौरव्य प्रतियातेषु पाण्डवाः ।
तस्मिननेव वने हृष्टास्त ऊषुः सह कृष्णया

teṣu sarveṣu kauravya pratiyāteṣu pāṇḍavāḥ |
tasminaneva vane hṛṣṭāsta ūṣuḥ saha kṛṣṇayā