अध्याय 166: इन्द्र के रथ पर अर्जुन का आगमन

ततः कदाचिद्धरिसंप्रयुक्तं
महेन्द्रवाहं सहसोपयातम् ।
विद्युत्प्रभं प्रेक्ष्य महारथानां
हर्षोऽर्जुनं चिन्तयतां बभूव

tataḥ kadāciddharisaṃprayuktaṃ
mahendravāhaṃ sahasopayātam |
vidyutprabhaṃ prekṣya mahārathānāṃ
harṣo'rjunaṃ cintayatāṃ babhūva

स दीप्यमानः सहसाऽन्तरिक्षं
प्रकाशयन्मातलिसंगृहीतः ।
बभौ महोल्केव घनान्तरस्था
शिखेव चाग्नेर्ज्वलिता विधूमा

sa dīpyamānaḥ sahasā'ntarikṣaṃ
prakāśayanmātalisaṃgṛhītaḥ |
babhau maholkeva ghanāntarasthā
śikheva cāgnerjvalitā vidhūmā

तमास्थितः संददृशे किरीटी
स्रग्वी नवान्याभरणानि बिभ्रत् ।
धनंजयो वज्रधरप्रभावः
श्रिया ज्वलन्पर्वतमाजगाम्

tamāsthitaḥ saṃdadṛśe kirīṭī
sragvī navānyābharaṇāni bibhrat |
dhanaṃjayo vajradharaprabhāvaḥ
śriyā jvalanparvatamājagām

स शैलमासाद्य किरीटमाली
महेन्द्रवाहादवरुह्य तस्मात् ।
धौम्यस्य पादावभिवाद्य पूर्व-
मजातशत्रोस्तदनन्तरं च

sa śailamāsādya kirīṭamālī
mahendravāhādavaruhya tasmāt |
dhaumyasya pādāvabhivādya pūrva-
majātaśatrostadanantaraṃ ca

वृकोदरस्यापि च वन्द्य पादौ
माद्रीसुताभ्यामभिवादितश्च ।
समेत्य कृष्णां परिसान्त्व्य चैनां
प्रह्वोऽभवद्भ्रातुरुपह्वरे सः

vṛkodarasyāpi ca vandya pādau
mādrīsutābhyāmabhivāditaśca |
sametya kṛṣṇāṃ parisāntvya caināṃ
prahvo'bhavadbhrāturupahvare saḥ

बभूव तेषां परमः प्रहर्ष-
स्तेनाप्रमेयेण समेत्य तत्र ।
स चापि तान्प्रेक्ष्य किरीटमाली
ननन्द राजानमभिप्रशंसन्

babhūva teṣāṃ paramaḥ praharṣa-
stenāprameyeṇa sametya tatra |
sa cāpi tānprekṣya kirīṭamālī
nananda rājānamabhipraśaṃsan

यमास्थितः सप्त जघान पूगान्
दितेः सुतानां नमुचेर्निहन्ता ।
तमिन्द्रवाहं समुपेत्य पार्थाः
प्रदक्षिणं चक्रुरदीनसत्वाः

yamāsthitaḥ sapta jaghāna pūgān
diteḥ sutānāṃ namucernihantā |
tamindravāhaṃ samupetya pārthāḥ
pradakṣiṇaṃ cakruradīnasatvāḥ

ते मातलेश्चक्रुरतीव हृष्टाः
सत्कारमग्र्यं सुरराजतुल्यम् ।
सर्वं यथावच्च दिवौकसङ्घं
पप्रच्युरेनं कुरुराजपुत्राः

te mātaleścakruratīva hṛṣṭāḥ
satkāramagryaṃ surarājatulyam |
sarvaṃ yathāvacca divaukasaṅghaṃ
papracyurenaṃ kururājaputrāḥ

तानप्यसौ मातलिरभ्यनन्द-
त्पितेव पुत्राननुशिष्य पार्थान् ।
ययौ रथेनाप्रतिमप्रभेण
पुनः सकाशं त्रिदिवेश्वरस्य

tānapyasau mātalirabhyananda-
tpiteva putrānanuśiṣya pārthān |
yayau rathenāpratimaprabheṇa
punaḥ sakāśaṃ tridiveśvarasya

गते तु तस्मिन्वरदेववाहे
शक्रात्मजः सर्वरिपुप्रमाथी ।
साक्षात्सहस्राक्ष इव प्रतीतः
श्रीमान्स्वदेहादवमुच्य जिष्णुः

gate tu tasminvaradevavāhe
śakrātmajaḥ sarvaripupramāthī |
sākṣātsahasrākṣa iva pratītaḥ
śrīmānsvadehādavamucya jiṣṇuḥ

शक्रेण दत्तानिददौ महात्मा
महाधनान्युत्तमरूपवन्ति ।
दिवाकराभाणि विभूषणानि
प्रीतः प्रियायै सुतसोममात्रे

śakreṇa dattānidadau mahātmā
mahādhanānyuttamarūpavanti |
divākarābhāṇi vibhūṣaṇāni
prītaḥ priyāyai sutasomamātre

ततऋः स तेषां कुरुपुङ्गवानां
तेषां च सूर्याग्निसमप्रभाणाम् ।
विप्रर्षभाणामुपविश्य मध्ये
सर्वं यथावत्कथयांबभूव

tataṛḥ sa teṣāṃ kurupuṅgavānāṃ
teṣāṃ ca sūryāgnisamaprabhāṇām |
viprarṣabhāṇāmupaviśya madhye
sarvaṃ yathāvatkathayāṃbabhūva

एवं मयाऽस्त्राण्युपशिक्षितानि
शक्राच्च वायोश्च शिवाच्च साक्षात् ।
तथैव शीलेन समाधिना च
प्रीताः सुरा मे सहिताः सहेन्द्राः

evaṃ mayā'strāṇyupaśikṣitāni
śakrācca vāyośca śivācca sākṣāt |
tathaiva śīlena samādhinā ca
prītāḥ surā me sahitāḥ sahendrāḥ

संक्षेपतो वै स विशुद्धकर्मा
तेभ्यः समाख्याय दिवःप्रवेशम् ।
माद्रीसुताभ्यां सहितः किरीटी
सुष्वाप तामावसतिं प्रतीतः

saṃkṣepato vai sa viśuddhakarmā
tebhyaḥ samākhyāya divaḥpraveśam |
mādrīsutābhyāṃ sahitaḥ kirīṭī
suṣvāpa tāmāvasatiṃ pratītaḥ