Chapter 3: Rudra is one; there is no second

य एको जालवानीशत ईशनीभिः सर्वांल्लोकानीशत ईशनीभिः ।
य एवैक उद्भवे सम्भवे च य एतद्विदुरमृतास्ते भवन्ति

ya eko jālavānīśata īśanībhiḥ sarvāṃllokānīśata īśanībhiḥ |
ya evaika udbhave sambhave ca ya etadviduramṛtāste bhavanti

The One who holds the net of Maya rules by His powers; He rules all the worlds by His powers. He alone stands at their rise and their unfolding. Those who know Him become immortal.

एको हि रुद्रो न द्वितीयाय तस्थुर्य इमांल्लोकानीशत ईशनीभिः ।
प्रत्यङ्जनास्तिष्ठति सञ्चुकोचान्तकाले संसृज्य विश्वा भुवनानि गोपाः

eko hi rudro na dvitīyāya tasthurya imāṃllokānīśata īśanībhiḥ |
pratyaṅjanāstiṣṭhati sañcukocāntakāle saṃsṛjya viśvā bhuvanāni gopāḥ

Rudra is One; the knowers do not admit a second. He rules these worlds by His powers. He dwells within every being. Having created all the worlds and guarded them, He draws them back into Himself at the time of dissolution.

विश्वतश्चक्षुरुत विश्वतोमुखो विश्वतोबाहुरुत विश्वतस्पात् ।
सम्बाहुभ्यां धमति सम्पतत्रैर्द्यावाभूमी जनयन्देव एकः

viśvataścakṣuruta viśvatomukho viśvatobāhuruta viśvataspāt |
sambāhubhyāṃ dhamati sampatatrairdyāvābhūmī janayandeva ekaḥ

His eyes are everywhere, His faces everywhere, His arms everywhere, His feet everywhere. The one God, bringing forth heaven and earth, shapes them with His arms and with wings.

यो देवानां प्रभवश्चोद्भवश्च विश्वाधिपो रुद्रो महर्षिः ।
हिरण्यगर्भं जनयामास पूर्वं स नो बुद्ध्या शुभया संयुनक्तु

yo devānāṃ prabhavaścodbhavaśca viśvādhipo rudro maharṣiḥ |
hiraṇyagarbhaṃ janayāmāsa pūrvaṃ sa no buddhyā śubhayā saṃyunaktu

He who is the source and origin of the gods, Lord of all, Rudra, the great Seer, who in the beginning brought forth Hiranyagarbha: may He endow us with a pure understanding.

या ते रुद्रा शिवा तनूरघोराऽपापकाशिनी ।
तया नस्तनुवा शन्तमया गिरिशन्ताभिचाकशीहि

yā te rudrā śivā tanūraghorā'pāpakāśinī |
tayā nastanuvā śantamayā giriśantābhicākaśīhi

O Rudra, dweller on the mountain, look upon us with that form of Yours which is auspicious, gentle, never fierce, revealing only what is holy, that most blessed form.

यामिषुं गिरिशतं हस्ते बिभर्ष्यस्तवे ।
शिवां गिरित्र तां कुरु मा हिंसीः पुरुषं जगत्

yāmiṣuṃ giriśataṃ haste bibharṣyastave |
śivāṃ giritra tāṃ kuru mā hiṃsīḥ puruṣaṃ jagat

O dweller on the mountain, the arrow You hold in Your hand to let fly, make it gracious, O protector of the mountain. Do not harm man or the moving world.

ततः परं ब्रह्म परं बृहन्तं यथा निकायं सर्वभूतेषु गूढम् ।
विश्वस्यैकं परिवेष्टितारमीशं तं ज्ञात्वाऽमृता भवन्ति

tataḥ paraṃ brahma paraṃ bṛhantaṃ yathā nikāyaṃ sarvabhūteṣu gūḍham |
viśvasyaikaṃ pariveṣṭitāramīśaṃ taṃ jñātvā'mṛtā bhavanti

Higher than this is the supreme Brahman, vast, hidden in all beings according to their bodies, the One who encompasses the universe. Knowing Him as the Lord, people become immortal.

वेदाहमेतं पुरुषं महान्तमादित्यवर्णं तमसः परस्तात् ।
तमेव विदित्वातिमृत्युमेति नान्यः पन्था विद्यतेऽयनाय

vedāhametaṃ puruṣaṃ mahāntamādityavarṇaṃ tamasaḥ parastāt |
tameva viditvātimṛtyumeti nānyaḥ panthā vidyate'yanāya

I know that great Purusha, radiant as the sun, beyond all darkness. Only by knowing Him does one pass beyond death; there is no other path to go.

यस्मात्परं नापरमस्ति किंचिद्यस्मान्नणीयो न ज्यायोऽस्ति कश्चित् ।
वृक्ष इव स्तब्धो दिवि तिष्ठत्येकस्तेनेदं पूर्णं पुरुषेण सर्वम्

yasmātparaṃ nāparamasti kiṃcidyasmānnaṇīyo na jyāyo'sti kaścit |
vṛkṣa iva stabdho divi tiṣṭhatyekastenedaṃ pūrṇaṃ puruṣeṇa sarvam

Nothing is higher than Him, nothing other than Him; nothing smaller, nothing greater. Like a tree He stands firm in heaven, the One. By that Purusha all this is filled.

ततो यदुत्तरतरं तदरूपमनामयम् ।
य एतद्विदुरमृतास्ते भवन्त्यथेतरे दुःखमेवापियन्ति

tato yaduttarataraṃ tadarūpamanāmayam |
ya etadviduramṛtāste bhavantyathetare duḥkhamevāpiyanti

That which is beyond this world is without form and without sorrow. Those who know it become immortal; the others go only to sorrow.

सर्वाननशिरोग्रीवः सर्वभूतगुहाशयः ।
सर्वव्यापी स भगवांस्तस्मात्सर्वगतः शिवः

sarvānanaśirogrīvaḥ sarvabhūtaguhāśayaḥ |
sarvavyāpī sa bhagavāṃstasmātsarvagataḥ śivaḥ

His are all faces, heads and necks. He dwells in the heart of every being. He pervades all; He is Bhagavan. Therefore Shiva is present everywhere.

महान्प्रभुर्वै पुरुषः सत्वस्यैष प्रवर्तकः ।
सुनिर्मलामिमां प्राप्तिमीशानो ज्योतिरव्ययः

mahānprabhurvai puruṣaḥ satvasyaiṣa pravartakaḥ |
sunirmalāmimāṃ prāptimīśāno jyotiravyayaḥ

That Purusha is the great Lord, who sets the mind in motion toward the stainless attainment. He is the Ruler, the light that never fades.

अङ्गुष्ठमात्रः पुरुषोऽन्तरात्मा सदा जनानां हृदये सन्निविष्टः ।
हृदा मनीषा मनसाभिक्लृप्तो य एतद्विदुरमृतास्ते भवन्ति

aṅguṣṭhamātraḥ puruṣo'ntarātmā sadā janānāṃ hṛdaye sanniviṣṭaḥ |
hṛdā manīṣā manasābhiklṛpto ya etadviduramṛtāste bhavanti

The Purusha, the size of a thumb, the inner Self, ever dwells in the hearts of beings. He is grasped by the heart, by insight and by the mind. Those who know this become immortal.

सहस्रशीर्षा पुरुषः सहस्राक्षः सहस्रपात् ।
स भूमिं विश्वतो वृत्वाऽत्यतिष्ठद्दशाङ्गुलम्

sahasraśīrṣā puruṣaḥ sahasrākṣaḥ sahasrapāt |
sa bhūmiṃ viśvato vṛtvā'tyatiṣṭhaddaśāṅgulam

The Purusha has a thousand heads, a thousand eyes, a thousand feet. Covering the earth on every side, He extends beyond it by ten fingers' breadth.

पुरुष एवेदँसर्वं यद्भूतं यच्च भव्यम् ।
उतामृतत्वस्येशानो यदन्नेनातिरोहति

puruṣa evedam̐sarvaṃ yadbhūtaṃ yacca bhavyam |
utāmṛtatvasyeśāno yadannenātirohati

The Purusha alone is all this, what has been and what will be. He is the lord of immortality, and of all that grows by food.

सर्वतः पाणिपादं तत्सर्वतोऽक्षिशिरोमुखम् ।
सर्वतः श्रुतिमल्लोके सर्वमावृत्य तिष्ठति

sarvataḥ pāṇipādaṃ tatsarvato'kṣiśiromukham |
sarvataḥ śrutimalloke sarvamāvṛtya tiṣṭhati

Its hands and feet are everywhere, its eyes, heads and faces everywhere, its ears everywhere in the world. It stands enveloping all.

सर्वेन्द्रियगुणाभासं सर्वेन्द्रियविवर्जितम् ।
सर्वस्य प्रभुमीशानं सर्वस्य शरणं सुहृत्

sarvendriyaguṇābhāsaṃ sarvendriyavivarjitam |
sarvasya prabhumīśānaṃ sarvasya śaraṇaṃ suhṛt

Shining through the functions of all the senses, yet free of every sense; the master and ruler of all, the refuge and friend of all.

नवद्वारे पुरे देही हंसो लेलायते बहिः ।
वशी सर्वस्य लोकस्य स्थावरस्य चरस्य च

navadvāre pure dehī haṃso lelāyate bahiḥ |
vaśī sarvasya lokasya sthāvarasya carasya ca

Dwelling in the city of nine gates, the body, the swan, the embodied Self, flutters outward. He is master of the whole world, of all that stands still and all that moves.

अपाणिपादो जवनो ग्रहीता पश्यत्यचक्षुः स शृणोत्यकर्णः ।
स वेत्ति वेद्यं न च तस्यास्ति वेत्ता तमाहुरग्र्यं पुरुषं महान्तम्

apāṇipādo javano grahītā paśyatyacakṣuḥ sa śṛṇotyakarṇaḥ |
sa vetti vedyaṃ na ca tasyāsti vettā tamāhuragryaṃ puruṣaṃ mahāntam

Without hands He grasps, without feet He moves swiftly; He sees without eyes and hears without ears. He knows all that is to be known, yet none knows Him. They call Him the first, the great Purusha.

अणोरणीयान्महतो महीयानात्मा गुहायां निहितोऽस्य जन्तोः ।
तमक्रतुः पश्यति वीतशोको धातुः प्रसादान्महिमानमीशम्

aṇoraṇīyānmahato mahīyānātmā guhāyāṃ nihito'sya jantoḥ |
tamakratuḥ paśyati vītaśoko dhātuḥ prasādānmahimānamīśam

Smaller than the smallest, greater than the greatest, the Self is set in the heart of every creature. Free of desire and of sorrow, one beholds that Lord and His glory by the grace of the Creator.

वेदाहमेतमजरं पुराणं सर्वात्मानं सर्वगतं विभुत्वात् ।
जन्मनिरोधं प्रवदन्ति यस्य ब्रह्मवादिनो हि प्रवदन्ति नित्यम्

vedāhametamajaraṃ purāṇaṃ sarvātmānaṃ sarvagataṃ vibhutvāt |
janmanirodhaṃ pravadanti yasya brahmavādino hi pravadanti nityam

I know Him, unageing, ancient, the Self of all, present everywhere by His vastness. The teachers of Brahman declare that for Him there is no birth; they call Him eternal.