Rishi: वसिष्ठो मैत्रावरुणिः · Devata: पवमानः सोमः · Metre: त्रिष्टुप्
6 verses · 90 of 114
Vasishtha Maitravaruni gives six trishtubh verses to Soma Pavamana. The begetter of heaven and earth sets out like a chariot to win the prize, goes to Indra sharpening his weapons, and holds all goods in his two hands. Voices low towards the three-backed bull. Soma is praised as a hero with sharp weapons and a swift bow, unconquered in battle, the winner of riches. He is asked for wide pastures, freedom from fear, the waters, the dawns and the light. The fifth verse runs through the devas he gladdens: Varuna, Mitra, Indra, Vishnu, the Marut host. It closes with the Vasishtha refrain, protect us always with blessings.
प्र हि॑न्वा॒नो ज॑नि॒ता रोद॑स्यो॒ रथो॒ न वाजं॑ सनि॒ष्यन्न॑यासीत् ।
इन्द्रं॒ गच्छ॒न्नायु॑धा सं॒शिशा॑नो॒ विश्वा॒ वसु॒ हस्त॑योरा॒दधा॑नः
pra hinvāno janitā rodasyo ratho na vājaṃ saniṣyannayāsīt |
indraṃ gacchannāyudhā saṃśiśāno viśvā vasu hastayorādadhānaḥ
अ॒भि त्रि॑पृ॒ष्ठं वृष॑णं वयो॒धामा॑ङ्गू॒षाणा॑मवावशन्त॒ वाणी॑ः ।
वना॒ वसा॑नो॒ वरु॑णो॒ न सिन्धू॒न्वि र॑त्न॒धा द॑यते॒ वार्या॑णि
abhi tripṛṣṭhaṃ vṛṣaṇaṃ vayodhāmāṅgūṣāṇāmavāvaśanta vāṇīḥ |
vanā vasāno varuṇo na sindhūnvi ratnadhā dayate vāryāṇi
शूर॑ग्राम॒ः सर्व॑वीर॒ः सहा॑वा॒ञ्जेता॑ पवस्व॒ सनि॑ता॒ धना॑नि ।
ति॒ग्मायु॑धः क्षि॒प्रध॑न्वा स॒मत्स्वषा॑ळ्हः सा॒ह्वान्पृत॑नासु॒ शत्रू॑न्
śūragrāmaḥ sarvavīraḥ sahāvāñjetā pavasva sanitā dhanāni |
tigmāyudhaḥ kṣipradhanvā samatsvaṣāḻhaḥ sāhvānpṛtanāsu śatrūn
उ॒रुग॑व्यूति॒रभ॑यानि कृ॒ण्वन्स॑मीची॒ने आ प॑वस्वा॒ पुरं॑धी ।
अ॒पः सिषा॑सन्नु॒षस॒ः स्व१॒॑र्गाः सं चि॑क्रदो म॒हो अ॒स्मभ्यं॒ वाजा॑न्
urugavyūtirabhayāni kṛṇvansamīcīne ā pavasvā puraṃdhī |
apaḥ siṣāsannuṣasaḥ svargāḥ saṃ cikrado maho asmabhyaṃ vājān
मत्सि॑ सोम॒ वरु॑णं॒ मत्सि॑ मि॒त्रं मत्सीन्द्र॑मिन्दो पवमान॒ विष्णु॑म् ।
मत्सि॒ शर्धो॒ मारु॑तं॒ मत्सि॑ दे॒वान्मत्सि॑ म॒हामिन्द्र॑मिन्दो॒ मदा॑य
matsi soma varuṇaṃ matsi mitraṃ matsīndramindo pavamāna viṣṇum |
matsi śardho mārutaṃ matsi devānmatsi mahāmindramindo madāya
ए॒वा राजे॑व॒ क्रतु॑माँ॒ अमे॑न॒ विश्वा॒ घनि॑घ्नद्दुरि॒ता प॑वस्व ।
इन्दो॑ सू॒क्ताय॒ वच॑से॒ वयो॑ धा यू॒यं पा॑त स्व॒स्तिभि॒ः सदा॑ नः
evā rājeva kratumām̐ amena viśvā ghanighnadduritā pavasva |
indo sūktāya vacase vayo dhā yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
