अ॒यं सोम॑ इन्द्र॒ तुभ्यं॑ सुन्वे॒ तुभ्यं॑ पवते॒ त्वम॑स्य पाहि ।
त्वं ह॒ यं च॑कृ॒षे त्वं व॑वृ॒ष इन्दुं॒ मदा॑य॒ युज्या॑य॒ सोम॑म्
ayaṃ soma indra tubhyaṃ sunve tubhyaṃ pavate tvamasya pāhi |
tvaṃ ha yaṃ cakṛṣe tvaṃ vavṛṣa induṃ madāya yujyāya somam
Mandala 9
Sukta 88: Soma likened to Vayu, Ashvins and Pushan
Rishi: उशना काव्यः · Devata: पवमानः सोमः · Metre: त्रिष्टुप्
8 verses · 88 of 114
What happens in this chapter
Soma likened to Vayu, Ashvins and Pushan
Eight trishtubh verses to Soma Pavamana by Ushana, here called Kanva. The pressing is for Indra: drink it, for you chose this drop as your companion in joy. Soma is yoked like a chariot to win wealth; he comes like Vayu with his teams, kindly as the Nasatyas to a call, quick of thought as Pushan, a breaker of forts like Indra, a slayer of serpents like the steed of Pedu. Like Agni loosed in the forest he shows his force in the rivers. The pressed drops pass the woollen sieve into the kalashas as rivers run to the sea.
स ईं॒ रथो॒ न भु॑रि॒षाळ॑योजि म॒हः पु॒रूणि॑ सा॒तये॒ वसू॑नि ।
आदीं॒ विश्वा॑ नहु॒ष्या॑णि जा॒ता स्व॑र्षाता॒ वन॑ ऊ॒र्ध्वा न॑वन्त
sa īṃ ratho na bhuriṣāḻayoji mahaḥ purūṇi sātaye vasūni |
ādīṃ viśvā nahuṣyāṇi jātā svarṣātā vana ūrdhvā navanta
वा॒युर्न यो नि॒युत्वाँ॑ इ॒ष्टया॑मा॒ नास॑त्येव॒ हव॒ आ शम्भ॑विष्ठः ।
वि॒श्ववा॑रो द्रविणो॒दा इ॑व॒ त्मन्पू॒षेव॑ धी॒जव॑नोऽसि सोम
vāyurna yo niyutvām̐ iṣṭayāmā nāsatyeva hava ā śambhaviṣṭhaḥ |
viśvavāro draviṇodā iva tmanpūṣeva dhījavano'si soma
इन्द्रो॒ न यो म॒हा कर्मा॑णि॒ चक्रि॑र्ह॒न्ता वृ॒त्राणा॑मसि सोम पू॒र्भित् ।
पै॒द्वो न हि त्वमहि॑नाम्नां ह॒न्ता विश्व॑स्यासि सोम॒ दस्यो॑ः
indro na yo mahā karmāṇi cakrirhantā vṛtrāṇāmasi soma pūrbhit |
paidvo na hi tvamahināmnāṃ hantā viśvasyāsi soma dasyoḥ
अ॒ग्निर्न यो वन॒ आ सृ॒ज्यमा॑नो॒ वृथा॒ पाजां॑सि कृणुते न॒दीषु॑ ।
जनो॒ न युध्वा॑ मह॒त उ॑प॒ब्दिरिय॑र्ति॒ सोम॒ः पव॑मान ऊ॒र्मिम्
agnirna yo vana ā sṛjyamāno vṛthā pājāṃsi kṛṇute nadīṣu |
jano na yudhvā mahata upabdiriyarti somaḥ pavamāna ūrmim
ए॒ते सोमा॒ अति॒ वारा॒ण्यव्या॑ दि॒व्या न कोशा॑सो अ॒भ्रव॑र्षाः ।
वृथा॑ समु॒द्रं सिन्ध॑वो॒ न नीची॑ः सु॒तासो॑ अ॒भि क॒लशाँ॑ असृग्रन्
ete somā ati vārāṇyavyā divyā na kośāso abhravarṣāḥ |
vṛthā samudraṃ sindhavo na nīcīḥ sutāso abhi kalaśām̐ asṛgran
शु॒ष्मी शर्धो॒ न मारु॑तं पव॒स्वान॑भिशस्ता दि॒व्या यथा॒ विट् ।
आपो॒ न म॒क्षू सु॑म॒तिर्भ॑वा नः स॒हस्रा॑प्साः पृतना॒षाण्न य॒ज्ञः
śuṣmī śardho na mārutaṃ pavasvānabhiśastā divyā yathā viṭ |
āpo na makṣū sumatirbhavā naḥ sahasrāpsāḥ pṛtanāṣāṇna yajñaḥ
राज्ञो॒ नु ते॒ वरु॑णस्य व्र॒तानि॑ बृ॒हद्ग॑भी॒रं तव॑ सोम॒ धाम॑ ।
शुचि॒ष्ट्वम॑सि प्रि॒यो न मि॒त्रो द॒क्षाय्यो॑ अर्य॒मेवा॑सि सोम
rājño nu te varuṇasya vratāni bṛhadgabhīraṃ tava soma dhāma |
śuciṣṭvamasi priyo na mitro dakṣāyyo aryamevāsi soma
Text source: Wikisource · CC BY-SA 4.0 (Wikisource transcription of a public-domain text)