Sukta 65: Soma pressed in distant and nearby lands

हि॒न्वन्ति॒ सूर॒मुस्र॑य॒ः स्वसा॑रो जा॒मय॒स्पति॑म् ।
म॒हामिन्दुं॑ मही॒युव॑ः

hinvanti sūramusrayaḥ svasāro jāmayaspatim |
mahāminduṃ mahīyuvaḥ

पव॑मान रु॒चारु॑चा दे॒वो दे॒वेभ्य॒स्परि॑ ।
विश्वा॒ वसू॒न्या वि॑श

pavamāna rucārucā devo devebhyaspari |
viśvā vasūnyā viśa

आ प॑वमान सुष्टु॒तिं वृ॒ष्टिं दे॒वेभ्यो॒ दुव॑ः ।
इ॒षे प॑वस्व सं॒यत॑म्

ā pavamāna suṣṭutiṃ vṛṣṭiṃ devebhyo duvaḥ |
iṣe pavasva saṃyatam

वृषा॒ ह्यसि॑ भा॒नुना॑ द्यु॒मन्तं॑ त्वा हवामहे ।
पव॑मान स्वा॒ध्य॑ः

vṛṣā hyasi bhānunā dyumantaṃ tvā havāmahe |
pavamāna svādhyaḥ

आ प॑वस्व सु॒वीर्यं॒ मन्द॑मानः स्वायुध ।
इ॒हो ष्वि॑न्द॒वा ग॑हि

ā pavasva suvīryaṃ mandamānaḥ svāyudha |
iho ṣvindavā gahi

यद॒द्भिः प॑रिषि॒च्यसे॑ मृ॒ज्यमा॑नो॒ गभ॑स्त्योः ।
द्रुणा॑ स॒धस्थ॑मश्नुषे

yadadbhiḥ pariṣicyase mṛjyamāno gabhastyoḥ |
druṇā sadhasthamaśnuṣe

प्र सोमा॑य व्यश्व॒वत्पव॑मानाय गायत ।
म॒हे स॒हस्र॑चक्षसे

pra somāya vyaśvavatpavamānāya gāyata |
mahe sahasracakṣase

यस्य॒ वर्णं॑ मधु॒श्चुतं॒ हरिं॑ हि॒न्वन्त्यद्रि॑भिः ।
इन्दु॒मिन्द्रा॑य पी॒तये॑

yasya varṇaṃ madhuścutaṃ hariṃ hinvantyadribhiḥ |
indumindrāya pītaye

तस्य॑ ते वा॒जिनो॑ व॒यं विश्वा॒ धना॑नि जि॒ग्युष॑ः ।
स॒खि॒त्वमा वृ॑णीमहे

tasya te vājino vayaṃ viśvā dhanāni jigyuṣaḥ |
sakhitvamā vṛṇīmahe

वृषा॑ पवस्व॒ धार॑या म॒रुत्व॑ते च मत्स॒रः ।
विश्वा॒ दधा॑न॒ ओज॑सा

vṛṣā pavasva dhārayā marutvate ca matsaraḥ |
viśvā dadhāna ojasā

तं त्वा॑ ध॒र्तार॑मो॒ण्यो॒३॒॑ः पव॑मान स्व॒र्दृश॑म् ।
हि॒न्वे वाजे॑षु वा॒जिन॑म्

taṃ tvā dhartāramoṇyoḥ pavamāna svardṛśam |
hinve vājeṣu vājinam

अ॒या चि॒त्तो वि॒पानया॒ हरि॑ः पवस्व॒ धार॑या ।
युजं॒ वाजे॑षु चोदय

ayā citto vipānayā hariḥ pavasva dhārayā |
yujaṃ vājeṣu codaya

आ न॑ इन्दो म॒हीमिषं॒ पव॑स्व वि॒श्वद॑र्शतः ।
अ॒स्मभ्यं॑ सोम गातु॒वित्

ā na indo mahīmiṣaṃ pavasva viśvadarśataḥ |
asmabhyaṃ soma gātuvit

आ क॒लशा॑ अनूष॒तेन्दो॒ धारा॑भि॒रोज॑सा ।
एन्द्र॑स्य पी॒तये॑ विश

ā kalaśā anūṣatendo dhārābhirojasā |
endrasya pītaye viśa

यस्य॑ ते॒ मद्यं॒ रसं॑ ती॒व्रं दु॒हन्त्यद्रि॑भिः ।
स प॑वस्वाभिमाति॒हा

yasya te madyaṃ rasaṃ tīvraṃ duhantyadribhiḥ |
sa pavasvābhimātihā

राजा॑ मे॒धाभि॑रीयते॒ पव॑मानो म॒नावधि॑ ।
अ॒न्तरि॑क्षेण॒ यात॑वे

rājā medhābhirīyate pavamāno manāvadhi |
antarikṣeṇa yātave

आ न॑ इन्दो शत॒ग्विनं॒ गवां॒ पोषं॒ स्वश्व्य॑म् ।
वहा॒ भग॑त्तिमू॒तये॑

ā na indo śatagvinaṃ gavāṃ poṣaṃ svaśvyam |
vahā bhagattimūtaye

आ न॑ः सोम॒ सहो॒ जुवो॑ रू॒पं न वर्च॑से भर ।
सु॒ष्वा॒णो दे॒ववी॑तये

ā naḥ soma saho juvo rūpaṃ na varcase bhara |
suṣvāṇo devavītaye

अर्षा॑ सोम द्यु॒मत्त॑मो॒ऽभि द्रोणा॑नि॒ रोरु॑वत् ।
सीद॑ञ्छ्ये॒नो न योनि॒मा

arṣā soma dyumattamo'bhi droṇāni roruvat |
sīdañchyeno na yonimā

अ॒प्सा इन्द्रा॑य वा॒यवे॒ वरु॑णाय म॒रुद्भ्य॑ः ।
सोमो॑ अर्षति॒ विष्ण॑वे

apsā indrāya vāyave varuṇāya marudbhyaḥ |
somo arṣati viṣṇave

इषं॑ तो॒काय॑ नो॒ दध॑द॒स्मभ्यं॑ सोम वि॒श्वत॑ः ।
आ प॑वस्व सह॒स्रिण॑म्

iṣaṃ tokāya no dadhadasmabhyaṃ soma viśvataḥ |
ā pavasva sahasriṇam

ये सोमा॑सः परा॒वति॒ ये अ॑र्वा॒वति॑ सुन्वि॒रे ।
ये वा॒दः श॑र्य॒णाव॑ति

ye somāsaḥ parāvati ye arvāvati sunvire |
ye vādaḥ śaryaṇāvati

य आ॑र्जी॒केषु॒ कृत्व॑सु॒ ये मध्ये॑ प॒स्त्या॑नाम् ।
ये वा॒ जने॑षु प॒ञ्चसु॑

ya ārjīkeṣu kṛtvasu ye madhye pastyānām |
ye vā janeṣu pañcasu

ते नो॑ वृ॒ष्टिं दि॒वस्परि॒ पव॑न्ता॒मा सु॒वीर्य॑म् ।
सु॒वा॒ना दे॒वास॒ इन्द॑वः

te no vṛṣṭiṃ divaspari pavantāmā suvīryam |
suvānā devāsa indavaḥ

पव॑ते हर्य॒तो हरि॑र्गृणा॒नो ज॒मद॑ग्निना ।
हि॒न्वा॒नो गोरधि॑ त्व॒चि

pavate haryato harirgṛṇāno jamadagninā |
hinvāno goradhi tvaci

प्र शु॒क्रासो॑ वयो॒जुवो॑ हिन्वा॒नासो॒ न सप्त॑यः ।
श्री॒णा॒ना अ॒प्सु मृ॑ञ्जत

pra śukrāso vayojuvo hinvānāso na saptayaḥ |
śrīṇānā apsu mṛñjata

तं त्वा॑ सु॒तेष्वा॒भुवो॑ हिन्वि॒रे दे॒वता॑तये ।
स प॑वस्वा॒नया॑ रु॒चा

taṃ tvā suteṣvābhuvo hinvire devatātaye |
sa pavasvānayā rucā

आ ते॒ दक्षं॑ मयो॒भुवं॒ वह्नि॑म॒द्या वृ॑णीमहे ।
पान्त॒मा पु॑रु॒स्पृह॑म्

ā te dakṣaṃ mayobhuvaṃ vahnimadyā vṛṇīmahe |
pāntamā puruspṛham

आ म॒न्द्रमा वरे॑ण्य॒मा विप्र॒मा म॑नी॒षिण॑म् ।
पान्त॒मा पु॑रु॒स्पृह॑म्

ā mandramā vareṇyamā vipramā manīṣiṇam |
pāntamā puruspṛham

आ र॒यिमा सु॑चे॒तुन॒मा सु॑क्रतो त॒नूष्वा ।
पान्त॒मा पु॑रु॒स्पृह॑म्

ā rayimā sucetunamā sukrato tanūṣvā |
pāntamā puruspṛham