प्रेष्ठं॑ वो॒ अति॑थिं स्तु॒षे मि॒त्रमि॑व प्रि॒यम् ।
अ॒ग्निं रथं॒ न वेद्य॑म्
preṣṭhaṃ vo atithiṃ stuṣe mitramiva priyam |
agniṃ rathaṃ na vedyam
Mandala 8
Sukta 84: Agni, the dearest guest
Rishi: उशना काव्यः · Devata: अग्निः · Metre: गायत्री
9 verses · 84 of 103
What happens in this chapter
Agni, the dearest guest
Ushana Kavya praises Agni, the dearest guest, beloved like a friend, to be known like a chariot. The gods set him among mortals as a wise seer. Youngest one, guard the men who give, hear our songs, protect our children. Then come the rishi's questions: with what praise shall we serve you, Angiras, son of strength? With whose mind shall we offer, and when shall I speak this salutation? Make every dwelling good for us. The man Agni protects dwells secure; no one slays him, and he prospers with good sons.
क॒विमि॑व॒ प्रचे॑तसं॒ यं दे॒वासो॒ अध॑ द्वि॒ता ।
नि मर्त्ये॑ष्वाद॒धुः
kavimiva pracetasaṃ yaṃ devāso adha dvitā |
ni martyeṣvādadhuḥ
त्वं य॑विष्ठ दा॒शुषो॒ नॄँः पा॑हि शृणु॒धी गिर॑ः ।
रक्षा॑ तो॒कमु॒त त्मना॑
tvaṃ yaviṣṭha dāśuṣo nṝm̐ḥ pāhi śṛṇudhī giraḥ |
rakṣā tokamuta tmanā
कया॑ ते अग्ने अङ्गिर॒ ऊर्जो॑ नपा॒दुप॑स्तुतिम् ।
वरा॑य देव म॒न्यवे॑
kayā te agne aṅgira ūrjo napādupastutim |
varāya deva manyave
दाशे॑म॒ कस्य॒ मन॑सा य॒ज्ञस्य॑ सहसो यहो ।
कदु॑ वोच इ॒दं नम॑ः
dāśema kasya manasā yajñasya sahaso yaho |
kadu voca idaṃ namaḥ
अधा॒ त्वं हि न॒स्करो॒ विश्वा॑ अ॒स्मभ्यं॑ सुक्षि॒तीः ।
वाज॑द्रविणसो॒ गिर॑ः
adhā tvaṃ hi naskaro viśvā asmabhyaṃ sukṣitīḥ |
vājadraviṇaso giraḥ
कस्य॑ नू॒नं परी॑णसो॒ धियो॑ जिन्वसि दम्पते ।
गोषा॑ता॒ यस्य॑ ते॒ गिर॑ः
kasya nūnaṃ parīṇaso dhiyo jinvasi dampate |
goṣātā yasya te giraḥ
तं म॑र्जयन्त सु॒क्रतुं॑ पुरो॒यावा॑नमा॒जिषु॑ ।
स्वेषु॒ क्षये॑षु वा॒जिन॑म्
taṃ marjayanta sukratuṃ puroyāvānamājiṣu |
sveṣu kṣayeṣu vājinam
क्षेति॒ क्षेमे॑भिः सा॒धुभि॒र्नकि॒र्यं घ्नन्ति॒ हन्ति॒ यः ।
अग्ने॑ सु॒वीर॑ एधते
kṣeti kṣemebhiḥ sādhubhirnakiryaṃ ghnanti hanti yaḥ |
agne suvīra edhate
Text source: Wikisource · CC BY-SA 4.0 (Wikisource transcription of a public-domain text)