Sukta 80: Indra, bring our chariot to the front

न॒ह्य१॒॑न्यं ब॒ळाक॑रं मर्डि॒तारं॑ शतक्रतो ।
त्वं न॑ इन्द्र मृळय

nahyanyaṃ baḻākaraṃ marḍitāraṃ śatakrato |
tvaṃ na indra mṛḻaya

यो न॒ः शश्व॑त्पु॒रावि॒थामृ॑ध्रो॒ वाज॑सातये ।
स त्वं न॑ इन्द्र मृळय

yo naḥ śaśvatpurāvithāmṛdhro vājasātaye |
sa tvaṃ na indra mṛḻaya

किम॒ङ्ग र॑ध्र॒चोद॑नः सुन्वा॒नस्या॑वि॒तेद॑सि ।
कु॒वित्स्वि॑न्द्र ण॒ः शक॑ः

kimaṅga radhracodanaḥ sunvānasyāvitedasi |
kuvitsvindra ṇaḥ śakaḥ

इन्द्र॒ प्र णो॒ रथ॑मव प॒श्चाच्चि॒त्सन्त॑मद्रिवः ।
पु॒रस्ता॑देनं मे कृधि

indra pra ṇo rathamava paścāccitsantamadrivaḥ |
purastādenaṃ me kṛdhi

हन्तो॒ नु किमा॑ससे प्रथ॒मं नो॒ रथं॑ कृधि ।
उ॒प॒मं वा॑ज॒यु श्रव॑ः

hanto nu kimāsase prathamaṃ no rathaṃ kṛdhi |
upamaṃ vājayu śravaḥ

अवा॑ नो वाज॒युं रथं॑ सु॒करं॑ ते॒ किमित्परि॑ ।
अ॒स्मान्सु जि॒ग्युष॑स्कृधि

avā no vājayuṃ rathaṃ sukaraṃ te kimitpari |
asmānsu jigyuṣaskṛdhi

इन्द्र॒ दृह्य॑स्व॒ पूर॑सि भ॒द्रा त॑ एति निष्कृ॒तम् ।
इ॒यं धीरृ॒त्विया॑वती

indra dṛhyasva pūrasi bhadrā ta eti niṣkṛtam |
iyaṃ dhīrṛtviyāvatī

मा सी॑मव॒द्य आ भा॑गु॒र्वी काष्ठा॑ हि॒तं धन॑म् ।
अ॒पावृ॑क्ता अर॒त्नय॑ः

mā sīmavadya ā bhāgurvī kāṣṭhā hitaṃ dhanam |
apāvṛktā aratnayaḥ

तु॒रीयं॒ नाम॑ य॒ज्ञियं॑ य॒दा कर॒स्तदु॑श्मसि ।
आदित्पति॑र्न ओहसे

turīyaṃ nāma yajñiyaṃ yadā karastaduśmasi |
āditpatirna ohase

अवी॑वृधद्वो अमृता॒ अम॑न्दीदेक॒द्यूर्दे॑वा उ॒त याश्च॑ देवीः ।
तस्मा॑ उ॒ राध॑ः कृणुत प्रश॒स्तं प्रा॒तर्म॒क्षू धि॒याव॑सुर्जगम्यात्

avīvṛdhadvo amṛtā amandīdekadyūrdevā uta yāśca devīḥ |
tasmā u rādhaḥ kṛṇuta praśastaṃ prātarmakṣū dhiyāvasurjagamyāt