Sukta 7: The Maruts shake the mountains

प्र यद्व॑स्त्रि॒ष्टुभ॒मिषं॒ मरु॑तो॒ विप्रो॒ अक्ष॑रत् ।
वि पर्व॑तेषु राजथ

pra yadvastriṣṭubhamiṣaṃ maruto vipro akṣarat |
vi parvateṣu rājatha

यद॒ङ्ग त॑विषीयवो॒ यामं॑ शुभ्रा॒ अचि॑ध्वम् ।
नि पर्व॑ता अहासत

yadaṅga taviṣīyavo yāmaṃ śubhrā acidhvam |
ni parvatā ahāsata

उदी॑रयन्त वा॒युभि॑र्वा॒श्रास॒ः पृश्नि॑मातरः ।
धु॒क्षन्त॑ पि॒प्युषी॒मिष॑म्

udīrayanta vāyubhirvāśrāsaḥ pṛśnimātaraḥ |
dhukṣanta pipyuṣīmiṣam

वप॑न्ति म॒रुतो॒ मिहं॒ प्र वे॑पयन्ति॒ पर्व॑तान् ।
यद्यामं॒ यान्ति॑ वा॒युभि॑ः

vapanti maruto mihaṃ pra vepayanti parvatān |
yadyāmaṃ yānti vāyubhiḥ

नि यद्यामा॑य वो गि॒रिर्नि सिन्ध॑वो॒ विध॑र्मणे ।
म॒हे शुष्मा॑य येमि॒रे

ni yadyāmāya vo girirni sindhavo vidharmaṇe |
mahe śuṣmāya yemire

यु॒ष्माँ उ॒ नक्त॑मू॒तये॑ यु॒ष्मान्दिवा॑ हवामहे ।
यु॒ष्मान्प्र॑य॒त्य॑ध्व॒रे

yuṣmām̐ u naktamūtaye yuṣmāndivā havāmahe |
yuṣmānprayatyadhvare

उदु॒ त्ये अ॑रु॒णप्स॑वश्चि॒त्रा यामे॑भिरीरते ।
वा॒श्रा अधि॒ ष्णुना॑ दि॒वः

udu tye aruṇapsavaścitrā yāmebhirīrate |
vāśrā adhi ṣṇunā divaḥ

सृ॒जन्ति॑ र॒श्मिमोज॑सा॒ पन्थां॒ सूर्या॑य॒ यात॑वे ।
ते भा॒नुभि॒र्वि त॑स्थिरे

sṛjanti raśmimojasā panthāṃ sūryāya yātave |
te bhānubhirvi tasthire

इ॒मां मे॑ मरुतो॒ गिर॑मि॒मं स्तोम॑मृभुक्षणः ।
इ॒मं मे॑ वनता॒ हव॑म्

imāṃ me maruto giramimaṃ stomamṛbhukṣaṇaḥ |
imaṃ me vanatā havam

त्रीणि॒ सरां॑सि॒ पृश्न॑यो दुदु॒ह्रे व॒ज्रिणे॒ मधु॑ ।
उत्सं॒ कव॑न्धमु॒द्रिण॑म्

trīṇi sarāṃsi pṛśnayo duduhre vajriṇe madhu |
utsaṃ kavandhamudriṇam

मरु॑तो॒ यद्ध॑ वो दि॒वः सु॑म्ना॒यन्तो॒ हवा॑महे ।
आ तू न॒ उप॑ गन्तन

maruto yaddha vo divaḥ sumnāyanto havāmahe |
ā tū na upa gantana

यू॒यं हि ष्ठा सु॑दानवो॒ रुद्रा॑ ऋभुक्षणो॒ दमे॑ ।
उ॒त प्रचे॑तसो॒ मदे॑

yūyaṃ hi ṣṭhā sudānavo rudrā ṛbhukṣaṇo dame |
uta pracetaso made

आ नो॑ र॒यिं म॑द॒च्युतं॑ पुरु॒क्षुं वि॒श्वधा॑यसम् ।
इय॑र्ता मरुतो दि॒वः

ā no rayiṃ madacyutaṃ purukṣuṃ viśvadhāyasam |
iyartā maruto divaḥ

अधी॑व॒ यद्गि॑री॒णां यामं॑ शुभ्रा॒ अचि॑ध्वम् ।
सु॒वा॒नैर्म॑न्दध्व॒ इन्दु॑भिः

adhīva yadgirīṇāṃ yāmaṃ śubhrā acidhvam |
suvānairmandadhva indubhiḥ

ए॒ताव॑तश्चिदेषां सु॒म्नं भि॑क्षेत॒ मर्त्य॑ः ।
अदा॑भ्यस्य॒ मन्म॑भिः

etāvataścideṣāṃ sumnaṃ bhikṣeta martyaḥ |
adābhyasya manmabhiḥ

ये द्र॒प्सा इ॑व॒ रोद॑सी॒ धम॒न्त्यनु॑ वृ॒ष्टिभि॑ः ।
उत्सं॑ दु॒हन्तो॒ अक्षि॑तम्

ye drapsā iva rodasī dhamantyanu vṛṣṭibhiḥ |
utsaṃ duhanto akṣitam

उदु॑ स्वा॒नेभि॑रीरत॒ उद्रथै॒रुदु॑ वा॒युभि॑ः ।
उत्स्तोमै॒ः पृश्नि॑मातरः

udu svānebhirīrata udrathairudu vāyubhiḥ |
utstomaiḥ pṛśnimātaraḥ

येना॒व तु॒र्वशं॒ यदुं॒ येन॒ कण्वं॑ धन॒स्पृत॑म् ।
रा॒ये सु तस्य॑ धीमहि

yenāva turvaśaṃ yaduṃ yena kaṇvaṃ dhanaspṛtam |
rāye su tasya dhīmahi

इ॒मा उ॑ वः सुदानवो घृ॒तं न पि॒प्युषी॒रिष॑ः ।
वर्धा॑न्का॒ण्वस्य॒ मन्म॑भिः

imā u vaḥ sudānavo ghṛtaṃ na pipyuṣīriṣaḥ |
vardhānkāṇvasya manmabhiḥ

क्व॑ नू॒नं सु॑दानवो॒ मद॑था वृक्तबर्हिषः ।
ब्र॒ह्मा को व॑ः सपर्यति

kva nūnaṃ sudānavo madathā vṛktabarhiṣaḥ |
brahmā ko vaḥ saparyati

न॒हि ष्म॒ यद्ध॑ वः पु॒रा स्तोमे॑भिर्वृक्तबर्हिषः ।
शर्धाँ॑ ऋ॒तस्य॒ जिन्व॑थ

nahi ṣma yaddha vaḥ purā stomebhirvṛktabarhiṣaḥ |
śardhām̐ ṛtasya jinvatha

समु॒ त्ये म॑ह॒तीर॒पः सं क्षो॒णी समु॒ सूर्य॑म् ।
सं वज्रं॑ पर्व॒शो द॑धुः

samu tye mahatīrapaḥ saṃ kṣoṇī samu sūryam |
saṃ vajraṃ parvaśo dadhuḥ

वि वृ॒त्रं प॑र्व॒शो य॑यु॒र्वि पर्व॑ताँ अरा॒जिन॑ः ।
च॒क्रा॒णा वृष्णि॒ पौंस्य॑म्

vi vṛtraṃ parvaśo yayurvi parvatām̐ arājinaḥ |
cakrāṇā vṛṣṇi pauṃsyam

अनु॑ त्रि॒तस्य॒ युध्य॑त॒ः शुष्म॑मावन्नु॒त क्रतु॑म् ।
अन्विन्द्रं॑ वृत्र॒तूर्ये॑

anu tritasya yudhyataḥ śuṣmamāvannuta kratum |
anvindraṃ vṛtratūrye

वि॒द्युद्ध॑स्ता अ॒भिद्य॑व॒ः शिप्रा॑ः शी॒र्षन्हि॑र॒ण्ययी॑ः ।
शु॒भ्रा व्य॑ञ्जत श्रि॒ये

vidyuddhastā abhidyavaḥ śiprāḥ śīrṣanhiraṇyayīḥ |
śubhrā vyañjata śriye

उ॒शना॒ यत्प॑रा॒वत॑ उ॒क्ष्णो रन्ध्र॒मया॑तन ।
द्यौर्न च॑क्रदद्भि॒या

uśanā yatparāvata ukṣṇo randhramayātana |
dyaurna cakradadbhiyā

आ नो॑ म॒खस्य॑ दा॒वनेऽश्वै॒र्हिर॑ण्यपाणिभिः ।
देवा॑स॒ उप॑ गन्तन

ā no makhasya dāvane'śvairhiraṇyapāṇibhiḥ |
devāsa upa gantana

यदे॑षां॒ पृष॑ती॒ रथे॒ प्रष्टि॒र्वह॑ति॒ रोहि॑तः ।
यान्ति॑ शु॒भ्रा रि॒णन्न॒पः

yadeṣāṃ pṛṣatī rathe praṣṭirvahati rohitaḥ |
yānti śubhrā riṇannapaḥ

सु॒षोमे॑ शर्य॒णाव॑त्यार्जी॒के प॒स्त्या॑वति ।
य॒युर्निच॑क्रया॒ नर॑ः

suṣome śaryaṇāvatyārjīke pastyāvati |
yayurnicakrayā naraḥ

क॒दा ग॑च्छाथ मरुत इ॒त्था विप्रं॒ हव॑मानम् ।
मा॒र्डी॒केभि॒र्नाध॑मानम्

kadā gacchātha maruta itthā vipraṃ havamānam |
mārḍīkebhirnādhamānam

कद्ध॑ नू॒नं क॑धप्रियो॒ यदिन्द्र॒मज॑हातन ।
को व॑ः सखि॒त्व ओ॑हते

kaddha nūnaṃ kadhapriyo yadindramajahātana |
ko vaḥ sakhitva ohate

स॒हो षु णो॒ वज्र॑हस्तै॒ः कण्वा॑सो अ॒ग्निं म॒रुद्भि॑ः ।
स्तु॒षे हिर॑ण्यवाशीभिः

saho ṣu ṇo vajrahastaiḥ kaṇvāso agniṃ marudbhiḥ |
stuṣe hiraṇyavāśībhiḥ

ओ षु वृष्ण॒ः प्रय॑ज्यू॒ना नव्य॑से सुवि॒ताय॑ ।
व॒वृ॒त्यां चि॒त्रवा॑जान्

o ṣu vṛṣṇaḥ prayajyūnā navyase suvitāya |
vavṛtyāṃ citravājān

गि॒रय॑श्चि॒न्नि जि॑हते॒ पर्शा॑नासो॒ मन्य॑मानाः ।
पर्व॑ताश्चि॒न्नि ये॑मिरे

girayaścinni jihate parśānāso manyamānāḥ |
parvatāścinni yemire

आक्ष्ण॒यावा॑नो वहन्त्य॒न्तरि॑क्षेण॒ पत॑तः ।
धाता॑रः स्तुव॒ते वय॑ः

ākṣṇayāvāno vahantyantarikṣeṇa patataḥ |
dhātāraḥ stuvate vayaḥ

अ॒ग्निर्हि जानि॑ पू॒र्व्यश्छन्दो॒ न सूरो॑ अ॒र्चिषा॑ ।
ते भा॒नुभि॒र्वि त॑स्थिरे

agnirhi jāni pūrvyaśchando na sūro arciṣā |
te bhānubhirvi tasthire