आ वां॑ राजानावध्व॒रे व॑वृत्यां ह॒व्येभि॑रिन्द्रावरुणा॒ नमो॑भिः ।
प्र वां॑ घृ॒ताची॑ बा॒ह्वोर्दधा॑ना॒ परि॒ त्मना॒ विषु॑रूपा जिगाति
ā vāṃ rājānāvadhvare vavṛtyāṃ havyebhirindrāvaruṇā namobhiḥ |
pra vāṃ ghṛtācī bāhvordadhānā pari tmanā viṣurūpā jigāti
Mandala 7
Sukta 84: Indra and Varuna, kings at the rite
Rishi: मैत्रावरुणिर्वसिष्ठः · Devata: इन्द्रावरुणौ · Metre: त्रिष्टुप्
5 verses · 84 of 104
What happens in this chapter
Indra and Varuna, kings at the rite
Maharshi Vasishtha calls the two kings Indra and Varuna to the sacrifice with offerings and bows, as the ghee-filled ladle goes around of itself. Heaven nourishes their great kingdom; they bind with fetters that need no rope. He prays that the anger of Varuna pass us by and that Indra make us wide room. Make our sacrifice lovely and our prayers famed among patrons; let god-sent wealth come. The Aditya breaks falsehood, and the hero gives treasures beyond measure.
यु॒वो रा॒ष्ट्रं बृ॒हदि॑न्वति॒ द्यौर्यौ से॒तृभि॑रर॒ज्जुभि॑ः सिनी॒थः ।
परि॑ नो॒ हेळो॒ वरु॑णस्य वृज्या उ॒रुं न॒ इन्द्र॑ः कृणवदु लो॒कम्
yuvo rāṣṭraṃ bṛhadinvati dyauryau setṛbhirarajjubhiḥ sinīthaḥ |
pari no heḻo varuṇasya vṛjyā uruṃ na indraḥ kṛṇavadu lokam
कृ॒तं नो॑ य॒ज्ञं वि॒दथे॑षु॒ चारुं॑ कृ॒तं ब्रह्मा॑णि सू॒रिषु॑ प्रश॒स्ता ।
उपो॑ र॒यिर्दे॒वजू॑तो न एतु॒ प्र ण॑ः स्पा॒र्हाभि॑रू॒तिभि॑स्तिरेतम्
kṛtaṃ no yajñaṃ vidatheṣu cāruṃ kṛtaṃ brahmāṇi sūriṣu praśastā |
upo rayirdevajūto na etu pra ṇaḥ spārhābhirūtibhistiretam
अ॒स्मे इ॑न्द्रावरुणा वि॒श्ववा॑रं र॒यिं ध॑त्तं॒ वसु॑मन्तं पुरु॒क्षुम् ।
प्र य आ॑दि॒त्यो अनृ॑ता मि॒नात्यमि॑ता॒ शूरो॑ दयते॒ वसू॑नि
asme indrāvaruṇā viśvavāraṃ rayiṃ dhattaṃ vasumantaṃ purukṣum |
pra ya ādityo anṛtā minātyamitā śūro dayate vasūni
इ॒यमिन्द्रं॒ वरु॑णमष्ट मे॒ गीः प्राव॑त्तो॒के तन॑ये॒ तूतु॑जाना ।
सु॒रत्ना॑सो दे॒ववी॑तिं गमेम यू॒यं पा॑त स्व॒स्तिभि॒ः सदा॑ नः
iyamindraṃ varuṇamaṣṭa me gīḥ prāvattoke tanaye tūtujānā |
suratnāso devavītiṃ gamema yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)