Rishi: बार्हस्पत्यो भरद्वाजः · Devata: सोमारुद्रौ · Metre: त्रिष्टुप्
4 verses · 74 of 75
Bharadvaja Barhaspatya prays to Soma and Rudra together in four trishtubh mantras, one of the Veda's healing prayers. Let them hold their divine might, bring seven treasures to every house, and be gentle to our two-footed and four-footed. They are asked to tear out the sickness that has entered the home and drive Nirriti, decay, far away. Let them place all medicines in our bodies, and loosen and free from us whatever sin we have done that is bound in our bodies. Sharp of weapon yet kind, may they be gracious here, free us from Varuna's noose and guard us with good will.
सोमा॑रुद्रा धा॒रये॑थामसु॒र्यं१॒॑ प्र वा॑मि॒ष्टयोऽर॑मश्नुवन्तु ।
दमे॑दमे स॒प्त रत्ना॒ दधा॑ना॒ शं नो॑ भूतं द्वि॒पदे॒ शं चतु॑ष्पदे
somārudrā dhārayethāmasuryaṃ pra vāmiṣṭayo'ramaśnuvantu |
damedame sapta ratnā dadhānā śaṃ no bhūtaṃ dvipade śaṃ catuṣpade
सोमा॑रुद्रा॒ वि वृ॑हतं॒ विषू॑ची॒ममी॑वा॒ या नो॒ गय॑मावि॒वेश॑ ।
आ॒रे बा॑धेथां॒ निरृ॑तिं परा॒चैर॒स्मे भ॒द्रा सौ॑श्रव॒सानि॑ सन्तु
somārudrā vi vṛhataṃ viṣūcīmamīvā yā no gayamāviveśa |
āre bādhethāṃ nirṛtiṃ parācairasme bhadrā sauśravasāni santu
सोमा॑रुद्रा यु॒वमे॒तान्य॒स्मे विश्वा॑ त॒नूषु॑ भेष॒जानि॑ धत्तम् ।
अव॑ स्यतं मु॒ञ्चतं॒ यन्नो॒ अस्ति॑ त॒नूषु॑ ब॒द्धं कृ॒तमेनो॑ अ॒स्मत्
somārudrā yuvametānyasme viśvā tanūṣu bheṣajāni dhattam |
ava syataṃ muñcataṃ yanno asti tanūṣu baddhaṃ kṛtameno asmat
ति॒ग्मायु॑धौ ति॒ग्महे॑ती सु॒शेवौ॒ सोमा॑रुद्रावि॒ह सु मृ॑ळतं नः ।
प्र नो॑ मुञ्चतं॒ वरु॑णस्य॒ पाशा॑द्गोपा॒यतं॑ नः सुमन॒स्यमा॑ना
tigmāyudhau tigmahetī suśevau somārudrāviha su mṛḻataṃ naḥ |
pra no muñcataṃ varuṇasya pāśādgopāyataṃ naḥ sumanasyamānā
Text source: Wikisource · CC BY-SA 4.0 (Wikisource transcription of a public-domain text)
