हु॒वे व॑ः सू॒नुं सह॑सो॒ युवा॑न॒मद्रो॑घवाचं म॒तिभि॒र्यवि॑ष्ठम् ।
य इन्व॑ति॒ द्रवि॑णानि॒ प्रचे॑ता वि॒श्ववा॑राणि पुरु॒वारो॑ अ॒ध्रुक्
huve vaḥ sūnuṃ sahaso yuvānamadroghavācaṃ matibhiryaviṣṭham |
ya invati draviṇāni pracetā viśvavārāṇi puruvāro adhruk
Mandala 6
Sukta 5: Burn the hidden foe, youngest Agni
Rishi: बार्हस्पत्यो भरद्वाजः · Devata: अग्निः · Metre: त्रिष्टुप्
7 verses · 5 of 75
What happens in this chapter
Burn the hidden foe, youngest Agni
Bharadvaja, son of Brihaspati, calls in trishtubh on Agni, the son of strength, youngest of the gods, whose speech holds no deceit. Treasures night and morning gather in him as the worlds rest on the earth. He drives the chariot of all desirable things and spreads wealth to the one who serves. Then a sharp plea: whoever attacks from afar or from among us, scorch him with your unaging bulls of flame, most burning Agni. The mortal who serves with fuel and hymns shines among men with wealth and fame. The rishi closes with a fourfold wish to win his desire, riches with brave sons, strength and unfading glory.
त्वे वसू॑नि पुर्वणीक होतर्दो॒षा वस्तो॒रेरि॑रे य॒ज्ञिया॑सः ।
क्षामे॑व॒ विश्वा॒ भुव॑नानि॒ यस्मि॒न्सं सौभ॑गानि दधि॒रे पा॑व॒के
tve vasūni purvaṇīka hotardoṣā vastorerire yajñiyāsaḥ |
kṣāmeva viśvā bhuvanāni yasminsaṃ saubhagāni dadhire pāvake
त्वं वि॒क्षु प्र॒दिव॑ः सीद आ॒सु क्रत्वा॑ र॒थीर॑भवो॒ वार्या॑णाम् ।
अत॑ इनोषि विध॒ते चि॑कित्वो॒ व्या॑नु॒षग्जा॑तवेदो॒ वसू॑नि
tvaṃ vikṣu pradivaḥ sīda āsu kratvā rathīrabhavo vāryāṇām |
ata inoṣi vidhate cikitvo vyānuṣagjātavedo vasūni
यो न॒ः सनु॑त्यो अभि॒दास॑दग्ने॒ यो अन्त॑रो मित्रमहो वनु॒ष्यात् ।
तम॒जरे॑भि॒र्वृष॑भि॒स्तव॒ स्वैस्तपा॑ तपिष्ठ॒ तप॑सा॒ तप॑स्वान्
yo naḥ sanutyo abhidāsadagne yo antaro mitramaho vanuṣyāt |
tamajarebhirvṛṣabhistava svaistapā tapiṣṭha tapasā tapasvān
यस्ते॑ य॒ज्ञेन॑ स॒मिधा॒ य उ॒क्थैर॒र्केभि॑ः सूनो सहसो॒ ददा॑शत् ।
स मर्त्ये॑ष्वमृत॒ प्रचे॑ता रा॒या द्यु॒म्नेन॒ श्रव॑सा॒ वि भा॑ति
yaste yajñena samidhā ya ukthairarkebhiḥ sūno sahaso dadāśat |
sa martyeṣvamṛta pracetā rāyā dyumnena śravasā vi bhāti
स तत्कृ॑धीषि॒तस्तूय॑मग्ने॒ स्पृधो॑ बाधस्व॒ सह॑सा॒ सह॑स्वान् ।
यच्छ॒स्यसे॒ द्युभि॑र॒क्तो वचो॑भि॒स्तज्जु॑षस्व जरि॒तुर्घोषि॒ मन्म॑
sa tatkṛdhīṣitastūyamagne spṛdho bādhasva sahasā sahasvān |
yacchasyase dyubhirakto vacobhistajjuṣasva jariturghoṣi manma
अ॒श्याम॒ तं काम॑मग्ने॒ तवो॒ती अ॒श्याम॑ र॒यिं र॑यिवः सु॒वीर॑म् ।
अ॒श्याम॒ वाज॑म॒भि वा॒जय॑न्तो॒ऽश्याम॑ द्यु॒म्नम॑जरा॒जरं॑ ते
aśyāma taṃ kāmamagne tavotī aśyāma rayiṃ rayivaḥ suvīram |
aśyāma vājamabhi vājayanto'śyāma dyumnamajarājaraṃ te
Text source: Wikisource · CC BY-SA 4.0 (Wikisource transcription of a public-domain text)