प्रति॑ प्रि॒यत॑मं॒ रथं॒ वृष॑णं वसु॒वाह॑नम् ।
स्तो॒ता वा॑मश्विना॒वृषि॒ः स्तोमे॑न॒ प्रति॑ भूषति॒ माध्वी॒ मम॑ श्रुतं॒ हव॑म्
prati priyatamaṃ rathaṃ vṛṣaṇaṃ vasuvāhanam |
stotā vāmaśvināvṛṣiḥ stomena prati bhūṣati mādhvī mama śrutaṃ havam
Mandala 5
Sukta 75: Honey-lovers, hear my call
Rishi: अवस्युरात्रेयः · Devata: अश्विनौ · Metre: पङ्क्तिः
9 verses · 75 of 87
What happens in this chapter
Honey-lovers, hear my call
Avasyu Atreya calls the Ashvins in Pankti, and every verse ends with the refrain: O lovers of honey, hear my call. The rishi adorns their dearest chariot, rich with treasure, with his hymn. Come past all other men, wondrous ones on golden tracks, bearers of rivers, bringing jewels. They wake to the call and come with birds to Chyavana, the one who never deceives. Their horses are yoked by thought and sprinkled with dew. Come, do not turn away. The closing verse marks the hour: dawn has broken with her bright cattle, Agni is set in place, and your immortal chariot is yoked.
अ॒त्याया॑तमश्विना ति॒रो विश्वा॑ अ॒हं सना॑ ।
दस्रा॒ हिर॑ण्यवर्तनी॒ सुषु॑म्ना॒ सिन्धु॑वाहसा॒ माध्वी॒ मम॑ श्रुतं॒ हव॑म्
atyāyātamaśvinā tiro viśvā ahaṃ sanā |
dasrā hiraṇyavartanī suṣumnā sindhuvāhasā mādhvī mama śrutaṃ havam
आ नो॒ रत्ना॑नि॒ बिभ्र॑ता॒वश्वि॑ना॒ गच्छ॑तं यु॒वम् ।
रुद्रा॒ हिर॑ण्यवर्तनी जुषा॒णा वा॑जिनीवसू॒ माध्वी॒ मम॑ श्रुतं॒ हव॑म्
ā no ratnāni bibhratāvaśvinā gacchataṃ yuvam |
rudrā hiraṇyavartanī juṣāṇā vājinīvasū mādhvī mama śrutaṃ havam
सु॒ष्टुभो॑ वां वृषण्वसू॒ रथे॒ वाणी॒च्याहि॑ता ।
उ॒त वां॑ ककु॒हो मृ॒गः पृक्ष॑ः कृणोति वापु॒षो माध्वी॒ मम॑ श्रुतं॒ हव॑म्
suṣṭubho vāṃ vṛṣaṇvasū rathe vāṇīcyāhitā |
uta vāṃ kakuho mṛgaḥ pṛkṣaḥ kṛṇoti vāpuṣo mādhvī mama śrutaṃ havam
बो॒धिन्म॑नसा र॒थ्ये॑षि॒रा ह॑वन॒श्रुता॑ ।
विभि॒श्च्यवा॑नमश्विना॒ नि या॑थो॒ अद्व॑याविनं॒ माध्वी॒ मम॑ श्रुतं॒ हव॑म्
bodhinmanasā rathyeṣirā havanaśrutā |
vibhiścyavānamaśvinā ni yātho advayāvinaṃ mādhvī mama śrutaṃ havam
आ वां॑ नरा मनो॒युजोऽश्वा॑सः प्रुषि॒तप्स॑वः ।
वयो॑ वहन्तु पी॒तये॑ स॒ह सु॒म्नेभि॑रश्विना॒ माध्वी॒ मम॑ श्रुतं॒ हव॑म्
ā vāṃ narā manoyujo'śvāsaḥ pruṣitapsavaḥ |
vayo vahantu pītaye saha sumnebhiraśvinā mādhvī mama śrutaṃ havam
अश्वि॑ना॒वेह ग॑च्छतं॒ नास॑त्या॒ मा वि वे॑नतम् ।
ति॒रश्चि॑दर्य॒या परि॑ व॒र्तिर्या॑तमदाभ्या॒ माध्वी॒ मम॑ श्रुतं॒ हव॑म्
aśvināveha gacchataṃ nāsatyā mā vi venatam |
tiraścidaryayā pari vartiryātamadābhyā mādhvī mama śrutaṃ havam
अ॒स्मिन्य॒ज्ञे अ॑दाभ्या जरि॒तारं॑ शुभस्पती ।
अ॒व॒स्युम॑श्विना यु॒वं गृ॒णन्त॒मुप॑ भूषथो॒ माध्वी॒ मम॑ श्रुतं॒ हव॑म्
asminyajñe adābhyā jaritāraṃ śubhaspatī |
avasyumaśvinā yuvaṃ gṛṇantamupa bhūṣatho mādhvī mama śrutaṃ havam
अभू॑दु॒षा रुश॑त्पशु॒राग्निर॑धाय्यृ॒त्विय॑ः ।
अयो॑जि वां वृषण्वसू॒ रथो॑ दस्रा॒वम॑र्त्यो॒ माध्वी॒ मम॑ श्रुतं॒ हव॑म्
abhūduṣā ruśatpaśurāgniradhāyyṛtviyaḥ |
ayoji vāṃ vṛṣaṇvasū ratho dasrāvamartyo mādhvī mama śrutaṃ havam
Text source: Wikisource · CC BY-SA 4.0 (Wikisource transcription of a public-domain text)