Sukta 31: Indra and Kutsa on one chariot

इन्द्रो॒ रथा॑य प्र॒वतं॑ कृणोति॒ यम॒ध्यस्था॑न्म॒घवा॑ वाज॒यन्त॑म् ।
यू॒थेव॑ प॒श्वो व्यु॑नोति गो॒पा अरि॑ष्टो याति प्रथ॒मः सिषा॑सन्

indro rathāya pravataṃ kṛṇoti yamadhyasthānmaghavā vājayantam |
yūtheva paśvo vyunoti gopā ariṣṭo yāti prathamaḥ siṣāsan

आ प्र द्र॑व हरिवो॒ मा वि वे॑न॒ः पिश॑ङ्गराते अ॒भि न॑ः सचस्व ।
न॒हि त्वदि॑न्द्र॒ वस्यो॑ अ॒न्यदस्त्य॑मे॒नाँश्चि॒ज्जनि॑वतश्चकर्थ

ā pra drava harivo mā vi venaḥ piśaṅgarāte abhi naḥ sacasva |
nahi tvadindra vasyo anyadastyamenām̐ścijjanivataścakartha

उद्यत्सह॒ः सह॑स॒ आज॑निष्ट॒ देदि॑ष्ट॒ इन्द्र॑ इन्द्रि॒याणि॒ विश्वा॑ ।
प्राचो॑दयत्सु॒दुघा॑ व॒व्रे अ॒न्तर्वि ज्योति॑षा संववृ॒त्वत्तमो॑ऽवः

udyatsahaḥ sahasa ājaniṣṭa dediṣṭa indra indriyāṇi viśvā |
prācodayatsudughā vavre antarvi jyotiṣā saṃvavṛtvattamo'vaḥ

अन॑वस्ते॒ रथ॒मश्वा॑य तक्ष॒न्त्वष्टा॒ वज्रं॑ पुरुहूत द्यु॒मन्त॑म् ।
ब्र॒ह्माण॒ इन्द्रं॑ म॒हय॑न्तो अ॒र्कैरव॑र्धय॒न्नह॑ये॒ हन्त॒वा उ॑

anavaste rathamaśvāya takṣantvaṣṭā vajraṃ puruhūta dyumantam |
brahmāṇa indraṃ mahayanto arkairavardhayannahaye hantavā u

वृष्णे॒ यत्ते॒ वृष॑णो अ॒र्कमर्चा॒निन्द्र॒ ग्रावा॑णो॒ अदि॑तिः स॒जोषा॑ः ।
अ॒न॒श्वासो॒ ये प॒वयो॑ऽर॒था इन्द्रे॑षिता अ॒भ्यव॑र्तन्त॒ दस्यू॑न्

vṛṣṇe yatte vṛṣaṇo arkamarcānindra grāvāṇo aditiḥ sajoṣāḥ |
anaśvāso ye pavayo'rathā indreṣitā abhyavartanta dasyūn

प्र ते॒ पूर्वा॑णि॒ कर॑णानि वोचं॒ प्र नूत॑ना मघव॒न्या च॒कर्थ॑ ।
शक्ती॑वो॒ यद्वि॒भरा॒ रोद॑सी उ॒भे जय॑न्न॒पो मन॑वे॒ दानु॑चित्राः

pra te pūrvāṇi karaṇāni vocaṃ pra nūtanā maghavanyā cakartha |
śaktīvo yadvibharā rodasī ubhe jayannapo manave dānucitrāḥ

तदिन्नु ते॒ कर॑णं दस्म वि॒प्राहिं॒ यद्घ्नन्नोजो॒ अत्रामि॑मीथाः ।
शुष्ण॑स्य चि॒त्परि॑ मा॒या अ॑गृभ्णाः प्रपि॒त्वं यन्नप॒ दस्यूँ॑रसेधः

tadinnu te karaṇaṃ dasma viprāhiṃ yadghnannojo atrāmimīthāḥ |
śuṣṇasya citpari māyā agṛbhṇāḥ prapitvaṃ yannapa dasyūm̐rasedhaḥ

त्वम॒पो यद॑वे तु॒र्वशा॒यार॑मयः सु॒दुघा॑ः पा॒र इ॑न्द्र ।
उ॒ग्रम॑यात॒मव॑हो ह॒ कुत्सं॒ सं ह॒ यद्वा॑मु॒शनार॑न्त दे॒वाः

tvamapo yadave turvaśāyāramayaḥ sudughāḥ pāra indra |
ugramayātamavaho ha kutsaṃ saṃ ha yadvāmuśanāranta devāḥ

इन्द्रा॑कुत्सा॒ वह॑माना॒ रथे॒ना वा॒मत्या॒ अपि॒ कर्णे॑ वहन्तु ।
निः षी॑म॒द्भ्यो धम॑थो॒ निः ष॒धस्था॑न्म॒घोनो॑ हृ॒दो व॑रथ॒स्तमां॑सि

indrākutsā vahamānā rathenā vāmatyā api karṇe vahantu |
niḥ ṣīmadbhyo dhamatho niḥ ṣadhasthānmaghono hṛdo varathastamāṃsi

वात॑स्य यु॒क्तान्सु॒युज॑श्चि॒दश्वा॑न्क॒विश्चि॑दे॒षो अ॑जगन्नव॒स्युः ।
विश्वे॑ ते॒ अत्र॑ म॒रुत॒ः सखा॑य॒ इन्द्र॒ ब्रह्मा॑णि॒ तवि॑षीमवर्धन्

vātasya yuktānsuyujaścidaśvānkaviścideṣo ajagannavasyuḥ |
viśve te atra marutaḥ sakhāya indra brahmāṇi taviṣīmavardhan

सूर॑श्चि॒द्रथं॒ परि॑तक्म्यायां॒ पूर्वं॑ कर॒दुप॑रं जूजु॒वांस॑म् ।
भर॑च्च॒क्रमेत॑श॒ः सं रि॑णाति पु॒रो दध॑त्सनिष्यति॒ क्रतुं॑ नः

sūraścidrathaṃ paritakmyāyāṃ pūrvaṃ karaduparaṃ jūjuvāṃsam |
bharaccakrametaśaḥ saṃ riṇāti puro dadhatsaniṣyati kratuṃ naḥ

आयं ज॑ना अभि॒चक्षे॑ जगा॒मेन्द्र॒ः सखा॑यं सु॒तसो॑ममि॒च्छन् ।
वद॒न्ग्रावाव॒ वेदिं॑ भ्रियाते॒ यस्य॑ जी॒रम॑ध्व॒र्यव॒श्चर॑न्ति

āyaṃ janā abhicakṣe jagāmendraḥ sakhāyaṃ sutasomamicchan |
vadangrāvāva vediṃ bhriyāte yasya jīramadhvaryavaścaranti

ये चा॒कन॑न्त चा॒कन॑न्त॒ नू ते मर्ता॑ अमृत॒ मो ते अंह॒ आर॑न् ।
वा॒व॒न्धि यज्यूँ॑रु॒त तेषु॑ धे॒ह्योजो॒ जने॑षु॒ येषु॑ ते॒ स्याम॑

ye cākananta cākananta nū te martā amṛta mo te aṃha āran |
vāvandhi yajyūm̐ruta teṣu dhehyojo janeṣu yeṣu te syāma