प्राग्नये॑ बृह॒ते य॒ज्ञिया॑य ऋ॒तस्य॒ वृष्णे॒ असु॑राय॒ मन्म॑ ।
घृ॒तं न य॒ज्ञ आ॒स्ये॒३॒॑ सुपू॑तं॒ गिरं॑ भरे वृष॒भाय॑ प्रती॒चीम्
prāgnaye bṛhate yajñiyāya ṛtasya vṛṣṇe asurāya manma |
ghṛtaṃ na yajña āsye supūtaṃ giraṃ bhare vṛṣabhāya pratīcīm
Mandala 5
Sukta 12: A plea for truth, not falsehood
Rishi: सुतंभर आत्रेयः · Devata: अग्निः · Metre: त्रिष्टुप्
6 verses · 12 of 87
What happens in this chapter
A plea for truth, not falsehood
Sutambhara of the Atri family offers Agni a song in trishtubh, pure as ghee in the mouth of the yajna. Agni is the bull of ṛta, cosmic order, and the rishi begs him to know ṛta and to open its many streams. He declares he serves the truth of the ruddy bull, not by sorcery and not by double speech. Then he asks who are Agni's fetters for the enemy, who are the guardians of falsehood. Friends who turned from him have become unkind, he says, speaking crooked words to the straight. Whoever honours Agni with reverence keeps his order, and his house prospers wide.
ऋ॒तं चि॑कित्व ऋ॒तमिच्चि॑किद्ध्यृ॒तस्य॒ धारा॒ अनु॑ तृन्धि पू॒र्वीः ।
नाहं या॒तुं सह॑सा॒ न द्व॒येन॑ ऋ॒तं स॑पाम्यरु॒षस्य॒ वृष्ण॑ः
ṛtaṃ cikitva ṛtamiccikiddhyṛtasya dhārā anu tṛndhi pūrvīḥ |
nāhaṃ yātuṃ sahasā na dvayena ṛtaṃ sapāmyaruṣasya vṛṣṇaḥ
कया॑ नो अग्न ऋ॒तय॑न्नृ॒तेन॒ भुवो॒ नवे॑दा उ॒चथ॑स्य॒ नव्य॑ः ।
वेदा॑ मे दे॒व ऋ॑तु॒पा ऋ॑तू॒नां नाहं पतिं॑ सनि॒तुर॒स्य रा॒यः
kayā no agna ṛtayannṛtena bhuvo navedā ucathasya navyaḥ |
vedā me deva ṛtupā ṛtūnāṃ nāhaṃ patiṃ saniturasya rāyaḥ
के ते॑ अग्ने रि॒पवे॒ बन्ध॑नास॒ः के पा॒यव॑ः सनिषन्त द्यु॒मन्त॑ः ।
के धा॒सिम॑ग्ने॒ अनृ॑तस्य पान्ति॒ क आस॑तो॒ वच॑सः सन्ति गो॒पाः
ke te agne ripave bandhanāsaḥ ke pāyavaḥ saniṣanta dyumantaḥ |
ke dhāsimagne anṛtasya pānti ka āsato vacasaḥ santi gopāḥ
सखा॑यस्ते॒ विषु॑णा अग्न ए॒ते शि॒वास॒ः सन्तो॒ अशि॑वा अभूवन् ।
अधू॑र्षत स्व॒यमे॒ते वचो॑भिरृजूय॒ते वृ॑जि॒नानि॑ ब्रु॒वन्त॑ः
sakhāyaste viṣuṇā agna ete śivāsaḥ santo aśivā abhūvan |
adhūrṣata svayamete vacobhirṛjūyate vṛjināni bruvantaḥ
यस्ते॑ अग्ने॒ नम॑सा य॒ज्ञमीट्ट॑ ऋ॒तं स पा॑त्यरु॒षस्य॒ वृष्ण॑ः ।
तस्य॒ क्षय॑ः पृ॒थुरा सा॒धुरे॑तु प्र॒सर्स्रा॑णस्य॒ नहु॑षस्य॒ शेष॑ः
yaste agne namasā yajñamīṭṭa ṛtaṃ sa pātyaruṣasya vṛṣṇaḥ |
tasya kṣayaḥ pṛthurā sādhuretu prasarsrāṇasya nahuṣasya śeṣaḥ
Text source: Wikisource · CC BY-SA 4.0 (Wikisource transcription of a public-domain text)