Rishi: वामदेवो गौतमः · Devata: द्यावापृथिवी · Metre: त्रिष्टुप्, ५-७ गायत्री
7 verses · 56 of 58
Vamadeva Gautama praises Heaven and Earth in trishtubh, the last three verses in gayatri. Let the great, eldest pair, Heaven and Earth, shine here with bright hymns, when the bull bellows, measuring them wide. Divine, worshipped with the gods, unharming, they stand pouring out plenty, true to rita, with gods for children, leaders of the sacrifice. He was a master worker among beings who begot these two, wide and deep, well fixed, and by his skill joined them without a beam. Guard us with your wide shelter. Purifying your bodies, you rule by your own strength and carry rita forever.
म॒ही द्यावा॑पृथि॒वी इ॒ह ज्येष्ठे॑ रु॒चा भ॑वतां शु॒चय॑द्भिर॒र्कैः ।
यत्सीं॒ वरि॑ष्ठे बृह॒ती वि॑मि॒न्वन्रु॒वद्धो॒क्षा प॑प्रथा॒नेभि॒रेवै॑ः
mahī dyāvāpṛthivī iha jyeṣṭhe rucā bhavatāṃ śucayadbhirarkaiḥ |
yatsīṃ variṣṭhe bṛhatī viminvanruvaddhokṣā paprathānebhirevaiḥ
दे॒वी दे॒वेभि॑र्यज॒ते यज॑त्रै॒रमि॑नती तस्थतुरु॒क्षमा॑णे ।
ऋ॒ताव॑री अ॒द्रुहा॑ दे॒वपु॑त्रे य॒ज्ञस्य॑ ने॒त्री शु॒चय॑द्भिर॒र्कैः
devī devebhiryajate yajatrairaminatī tasthaturukṣamāṇe |
ṛtāvarī adruhā devaputre yajñasya netrī śucayadbhirarkaiḥ
स इत्स्वपा॒ भुव॑नेष्वास॒ य इ॒मे द्यावा॑पृथि॒वी ज॒जान॑ ।
उ॒र्वी ग॑भी॒रे रज॑सी सु॒मेके॑ अवं॒शे धीर॒ः शच्या॒ समै॑रत्
sa itsvapā bhuvaneṣvāsa ya ime dyāvāpṛthivī jajāna |
urvī gabhīre rajasī sumeke avaṃśe dhīraḥ śacyā samairat
नू रो॑दसी बृ॒हद्भि॑र्नो॒ वरू॑थै॒ः पत्नी॑वद्भिरि॒षय॑न्ती स॒जोषा॑ः ।
उ॒रू॒ची विश्वे॑ यज॒ते नि पा॑तं धि॒या स्या॑म र॒थ्य॑ः सदा॒साः
nū rodasī bṛhadbhirno varūthaiḥ patnīvadbhiriṣayantī sajoṣāḥ |
urūcī viśve yajate ni pātaṃ dhiyā syāma rathyaḥ sadāsāḥ
प्र वां॒ महि॒ द्यवी॑ अ॒भ्युप॑स्तुतिं भरामहे ।
शुची॒ उप॒ प्रश॑स्तये
pra vāṃ mahi dyavī abhyupastutiṃ bharāmahe |
śucī upa praśastaye
पु॒ना॒ने त॒न्वा॑ मि॒थः स्वेन॒ दक्षे॑ण राजथः ।
ऊ॒ह्याथे॑ स॒नादृ॒तम्
punāne tanvā mithaḥ svena dakṣeṇa rājathaḥ |
ūhyāthe sanādṛtam
म॒ही मि॒त्रस्य॑ साधथ॒स्तर॑न्ती॒ पिप्र॑ती ऋ॒तम् ।
परि॑ य॒ज्ञं नि षे॑दथुः
mahī mitrasya sādhathastarantī pipratī ṛtam |
pari yajñaṃ ni ṣedathuḥ
Text source: Wikisource · CC BY-SA 4.0 (Wikisource transcription of a public-domain text)
