कया॑ नश्चि॒त्र आ भु॑वदू॒ती स॒दावृ॑ध॒ः सखा॑ ।
कया॒ शचि॑ष्ठया वृ॒ता
kayā naścitra ā bhuvadūtī sadāvṛdhaḥ sakhā |
kayā śaciṣṭhayā vṛtā
Mandala 4
Sukta 31: With what help will Indra come?
Rishi: वामदेवो गौतमः · Devata: इन्द्रः · Metre: गायत्री, ३ पादनिचृत्
15 verses · 31 of 58
What happens in this chapter
With what help will Indra come?
A gayatri hymn of Vamadeva Gautama asking for Indra's company. With what help will our wondrous, ever-growing friend come to us? What draught of soma will gladden him to break even firm strongholds for wealth? Be the helper of your friends and singers with a hundred aids; turn toward us like a wheel. They call you Maghavan, the giver who never holds back; no one can stop your gifts. Let a hundred, a thousand aids help us. Choose us for friendship, open for us the stalls of cows like an archer. May our chariot go forth seeking cows and horses, and make our fame highest among the gods.
कस्त्वा॑ स॒त्यो मदा॑नां॒ मंहि॑ष्ठो मत्स॒दन्ध॑सः ।
दृ॒ळ्हा चि॑दा॒रुजे॒ वसु॑
kastvā satyo madānāṃ maṃhiṣṭho matsadandhasaḥ |
dṛḻhā cidāruje vasu
अ॒भी षु ण॒ः सखी॑नामवि॒ता ज॑रितॄ॒णाम् ।
श॒तं भ॑वास्यू॒तिभि॑ः
abhī ṣu ṇaḥ sakhīnāmavitā jaritṝṇām |
śataṃ bhavāsyūtibhiḥ
अ॒भी न॒ आ व॑वृत्स्व च॒क्रं न वृ॒त्तमर्व॑तः ।
नि॒युद्भि॑श्चर्षणी॒नाम्
abhī na ā vavṛtsva cakraṃ na vṛttamarvataḥ |
niyudbhiścarṣaṇīnām
प्र॒वता॒ हि क्रतू॑ना॒मा हा॑ प॒देव॒ गच्छ॑सि ।
अभ॑क्षि॒ सूर्ये॒ सचा॑
pravatā hi kratūnāmā hā padeva gacchasi |
abhakṣi sūrye sacā
सं यत्त॑ इन्द्र म॒न्यव॒ः सं च॒क्राणि॑ दधन्वि॒रे ।
अध॒ त्वे अध॒ सूर्ये॑
saṃ yatta indra manyavaḥ saṃ cakrāṇi dadhanvire |
adha tve adha sūrye
उ॒त स्मा॒ हि त्वामा॒हुरिन्म॒घवा॑नं शचीपते ।
दाता॑र॒मवि॑दीधयुम्
uta smā hi tvāmāhurinmaghavānaṃ śacīpate |
dātāramavidīdhayum
उ॒त स्मा॑ स॒द्य इत्परि॑ शशमा॒नाय॑ सुन्व॒ते ।
पु॒रू चि॑न्मंहसे॒ वसु॑
uta smā sadya itpari śaśamānāya sunvate |
purū cinmaṃhase vasu
न॒हि ष्मा॑ ते श॒तं च॒न राधो॒ वर॑न्त आ॒मुर॑ः ।
न च्यौ॒त्नानि॑ करिष्य॒तः
nahi ṣmā te śataṃ cana rādho varanta āmuraḥ |
na cyautnāni kariṣyataḥ
अ॒स्माँ अ॑वन्तु ते श॒तम॒स्मान्स॒हस्र॑मू॒तय॑ः ।
अ॒स्मान्विश्वा॑ अ॒भिष्ट॑यः
asmām̐ avantu te śatamasmānsahasramūtayaḥ |
asmānviśvā abhiṣṭayaḥ
अ॒स्माँ इ॒हा वृ॑णीष्व स॒ख्याय॑ स्व॒स्तये॑ ।
म॒हो रा॒ये दि॒वित्म॑ते
asmām̐ ihā vṛṇīṣva sakhyāya svastaye |
maho rāye divitmate
अ॒स्माँ अ॑विड्ढि वि॒श्वहेन्द्र॑ रा॒या परी॑णसा ।
अ॒स्मान्विश्वा॑भिरू॒तिभि॑ः
asmām̐ aviḍḍhi viśvahendra rāyā parīṇasā |
asmānviśvābhirūtibhiḥ
अ॒स्मभ्यं॒ ताँ अपा॑ वृधि व्र॒जाँ अस्ते॑व॒ गोम॑तः ।
नवा॑भिरिन्द्रो॒तिभि॑ः
asmabhyaṃ tām̐ apā vṛdhi vrajām̐ asteva gomataḥ |
navābhirindrotibhiḥ
अ॒स्माकं॑ धृष्णु॒या रथो॑ द्यु॒माँ इ॒न्द्रान॑पच्युतः ।
ग॒व्युर॑श्व॒युरी॑यते
asmākaṃ dhṛṣṇuyā ratho dyumām̐ indrānapacyutaḥ |
gavyuraśvayurīyate
अ॒स्माक॑मुत्त॒मं कृ॑धि॒ श्रवो॑ दे॒वेषु॑ सूर्य ।
वर्षि॑ष्ठं॒ द्यामि॑वो॒परि॑
asmākamuttamaṃ kṛdhi śravo deveṣu sūrya |
varṣiṣṭhaṃ dyāmivopari
Text source: Wikisource · CC BY-SA 4.0 (Wikisource transcription of a public-domain text)