को अ॒द्य नर्यो॑ दे॒वका॑म उ॒शन्निन्द्र॑स्य स॒ख्यं जु॑जोष ।
को वा॑ म॒हेऽव॑से॒ पार्या॑य॒ समि॑द्धे अ॒ग्नौ सु॒तसो॑म ईट्टे
ko adya naryo devakāma uśannindrasya sakhyaṃ jujoṣa |
ko vā mahe'vase pāryāya samiddhe agnau sutasoma īṭṭe
Mandala 4
Sukta 25: Indra loves the one who presses soma
Rishi: वामदेवो गौतमः · Devata: इन्द्रः · Metre: त्रिष्टुप्
8 verses · 25 of 58
What happens in this chapter
Indra loves the one who presses soma
Vamadeva Gautama asks in trishtubh who today seeks Indra's friendship. Who, with fire kindled and soma pressed, praises him for great help? Who desires his kinship and brotherhood? The rishi answers: Agni Bharata grants shelter to the man who says, let us press soma for Indra, and he shall long see the rising sun. Neither many nor few can harm him; Aditi gives him wide refuge. Indra is no friend of the rich niggard who presses no soma; he takes away his wealth. Indra alone belongs to the presser. High, low and middle folk, at rest or at war, all call Indra.
को ना॑नाम॒ वच॑सा सो॒म्याय॑ मना॒युर्वा॑ भवति॒ वस्त॑ उ॒स्राः ।
क इन्द्र॑स्य॒ युज्यं॒ कः स॑खि॒त्वं को भ्रा॒त्रं व॑ष्टि क॒वये॒ क ऊ॒ती
ko nānāma vacasā somyāya manāyurvā bhavati vasta usrāḥ |
ka indrasya yujyaṃ kaḥ sakhitvaṃ ko bhrātraṃ vaṣṭi kavaye ka ūtī
को दे॒वाना॒मवो॑ अ॒द्या वृ॑णीते॒ क आ॑दि॒त्याँ अदि॑तिं॒ ज्योति॑रीट्टे ।
कस्या॒श्विना॒विन्द्रो॑ अ॒ग्निः सु॒तस्यां॒शोः पि॑बन्ति॒ मन॒सावि॑वेनम्
ko devānāmavo adyā vṛṇīte ka ādityām̐ aditiṃ jyotirīṭṭe |
kasyāśvināvindro agniḥ sutasyāṃśoḥ pibanti manasāvivenam
तस्मा॑ अ॒ग्निर्भार॑त॒ः शर्म॑ यंस॒ज्ज्योक्प॑श्या॒त्सूर्य॑मु॒च्चर॑न्तम् ।
य इन्द्रा॑य सु॒नवा॒मेत्याह॒ नरे॒ नर्या॑य॒ नृत॑माय नृ॒णाम्
tasmā agnirbhārataḥ śarma yaṃsajjyokpaśyātsūryamuccarantam |
ya indrāya sunavāmetyāha nare naryāya nṛtamāya nṛṇām
न तं जि॑नन्ति ब॒हवो॒ न द॒भ्रा उ॒र्व॑स्मा॒ अदि॑ति॒ः शर्म॑ यंसत् ।
प्रि॒यः सु॒कृत्प्रि॒य इन्द्रे॑ मना॒युः प्रि॒यः सु॑प्रा॒वीः प्रि॒यो अ॑स्य सो॒मी
na taṃ jinanti bahavo na dabhrā urvasmā aditiḥ śarma yaṃsat |
priyaḥ sukṛtpriya indre manāyuḥ priyaḥ suprāvīḥ priyo asya somī
सु॒प्रा॒व्य॑ः प्राशु॒षाळे॒ष वी॒रः सुष्वे॑ः प॒क्तिं कृ॑णुते॒ केव॒लेन्द्र॑ः ।
नासु॑ष्वेरा॒पिर्न सखा॒ न जा॒मिर्दु॑ष्प्रा॒व्यो॑ऽवह॒न्तेदवा॑चः
suprāvyaḥ prāśuṣāḻeṣa vīraḥ suṣveḥ paktiṃ kṛṇute kevalendraḥ |
nāsuṣverāpirna sakhā na jāmirduṣprāvyo'vahantedavācaḥ
न रे॒वता॑ प॒णिना॑ स॒ख्यमिन्द्रोऽसु॑न्वता सुत॒पाः सं गृ॑णीते ।
आस्य॒ वेद॑ः खि॒दति॒ हन्ति॑ न॒ग्नं वि सुष्व॑ये प॒क्तये॒ केव॑लो भूत्
na revatā paṇinā sakhyamindro'sunvatā sutapāḥ saṃ gṛṇīte |
āsya vedaḥ khidati hanti nagnaṃ vi suṣvaye paktaye kevalo bhūt
इन्द्रं॒ परेऽव॑रे मध्य॒मास॒ इन्द्रं॒ यान्तोऽव॑सितास॒ इन्द्र॑म् ।
इन्द्रं॑ क्षि॒यन्त॑ उ॒त युध्य॑माना॒ इन्द्रं॒ नरो॑ वाज॒यन्तो॑ हवन्ते
indraṃ pare'vare madhyamāsa indraṃ yānto'vasitāsa indram |
indraṃ kṣiyanta uta yudhyamānā indraṃ naro vājayanto havante
Text source: Wikisource · CC BY-SA 4.0 (Wikisource transcription of a public-domain text)