Mandala 2

Sukta 5: Agni the hotri holds every office

Rishi: सोमाहुतिर्भार्गवः · Devata: अग्निः · Metre: अनुष्टुप्

8 verses · 5 of 43

What happens in this chapter

Agni the hotri holds every office

Somahuti Bhargava sings to Agni in anushtubh. The hotri is born, wise, a father to the fathers for their help. Seven reins stretch out in him, the leader of the yajna, and as the eighth he does the potri's work. He encircles all poetic wisdom as a felly holds the wheel. He is the prashastri and the neshtri; the sister streams of ghee come to him like milch cows. The adhvaryu rejoices at their coming like barley at rain. The worshippers ask that Agni appoint the priests rightly and carry the yajna they have made to all the holy devas.

5.1

होता॑जनिष्ट॒ चेत॑नः पि॒ता पि॒तृभ्य॑ ऊ॒तये॑ ।
प्र॒यक्ष॒ञ्जेन्यं॒ वसु॑ श॒केम॑ वा॒जिनो॒ यम॑म्

hotājaniṣṭa cetanaḥ pitā pitṛbhya ūtaye |
prayakṣañjenyaṃ vasu śakema vājino yamam

5.2

आ यस्मि॑न्स॒प्त र॒श्मय॑स्त॒ता य॒ज्ञस्य॑ ने॒तरि॑ ।
म॒नु॒ष्वद्दैव्य॑मष्ट॒मं पोता॒ विश्वं॒ तदि॑न्वति

ā yasminsapta raśmayastatā yajñasya netari |
manuṣvaddaivyamaṣṭamaṃ potā viśvaṃ tadinvati

5.3

द॒ध॒न्वे वा॒ यदी॒मनु॒ वोच॒द्ब्रह्मा॑णि॒ वेरु॒ तत् ।
परि॒ विश्वा॑नि॒ काव्या॑ ने॒मिश्च॒क्रमि॑वाभवत्

dadhanve vā yadīmanu vocadbrahmāṇi veru tat |
pari viśvāni kāvyā nemiścakramivābhavat

5.4

सा॒कं हि शुचि॑ना॒ शुचि॑ः प्रशा॒स्ता क्रतु॒नाज॑नि ।
वि॒द्वाँ अ॑स्य व्र॒ता ध्रु॒वा व॒या इ॒वानु॑ रोहते

sākaṃ hi śucinā śuciḥ praśāstā kratunājani |
vidvām̐ asya vratā dhruvā vayā ivānu rohate

5.5

ता अ॑स्य॒ वर्ण॑मा॒युवो॒ नेष्टु॑ः सचन्त धे॒नव॑ः ।
कु॒वित्ति॒सृभ्य॒ आ वरं॒ स्वसा॑रो॒ या इ॒दं य॒युः

tā asya varṇamāyuvo neṣṭuḥ sacanta dhenavaḥ |
kuvittisṛbhya ā varaṃ svasāro yā idaṃ yayuḥ

5.6

यदी॑ मा॒तुरुप॒ स्वसा॑ घृ॒तं भर॒न्त्यस्थि॑त ।
तासा॑मध्व॒र्युराग॑तौ॒ यवो॑ वृ॒ष्टीव॑ मोदते

yadī māturupa svasā ghṛtaṃ bharantyasthita |
tāsāmadhvaryurāgatau yavo vṛṣṭīva modate

5.7

स्वः स्वाय॒ धाय॑से कृणु॒तामृ॒त्विगृ॒त्विज॑म् ।
स्तोमं॑ य॒ज्ञं चादरं॑ व॒नेमा॑ ररि॒मा व॒यम्

svaḥ svāya dhāyase kṛṇutāmṛtvigṛtvijam |
stomaṃ yajñaṃ cādaraṃ vanemā rarimā vayam

5.8

यथा॑ वि॒द्वाँ अरं॒ कर॒द्विश्वे॑भ्यो यज॒तेभ्य॑ः ।
अ॒यम॑ग्ने॒ त्वे अपि॒ यं य॒ज्ञं च॑कृ॒मा व॒यम्

yathā vidvām̐ araṃ karadviśvebhyo yajatebhyaḥ |
ayamagne tve api yaṃ yajñaṃ cakṛmā vayam

Text source: Wikisource · CC BY-SA 4.0 (Wikisource transcription of a public-domain text)