जो॒हूत्रो॑ अ॒ग्निः प्र॑थ॒मः पि॒तेवे॒ळस्प॒दे मनु॑षा॒ यत्समि॑द्धः ।
श्रियं॒ वसा॑नो अ॒मृतो॒ विचे॑ता मर्मृ॒जेन्य॑ः श्रव॒स्य१॒॑ः स वा॒जी
johūtro agniḥ prathamaḥ piteveḻaspade manuṣā yatsamiddhaḥ |
śriyaṃ vasāno amṛto vicetā marmṛjenyaḥ śravasyaḥ sa vājī
Mandala 2
Sukta 10: Agni hidden in the kindling wood
Rishi: गृत्समद (आङ्गिरसः शौनहोत्रः पश्चाद्) भार्गवः शौनकः · Devata: अग्निः · Metre: त्रिष्टुप्
6 verses · 10 of 43
What happens in this chapter
Agni hidden in the kindling wood
Gritsamada calls Agni the first to be invoked, like a father, kindled by Manu at the place of Ila. Immortal and wise, he wears splendour and is groomed like a racehorse. His chariot is drawn by dark, red or ruddy horses. Men brought him forth well born from the kindling wood lying on its back; he dwells as an embryo in the many-formed plants, unveiled by night. The rishi sprinkles ghee on Agni who faces every world, broad and mighty, and asks him to accept it with a mind free of harm. Like Manu, we pour honeyed offerings into Agni.
श्रू॒या अ॒ग्निश्चि॒त्रभा॑नु॒र्हवं॑ मे॒ विश्वा॑भिर्गी॒र्भिर॒मृतो॒ विचे॑ताः ।
श्या॒वा रथं॑ वहतो॒ रोहि॑ता वो॒तारु॒षाह॑ चक्रे॒ विभृ॑त्रः
śrūyā agniścitrabhānurhavaṃ me viśvābhirgīrbhiramṛto vicetāḥ |
śyāvā rathaṃ vahato rohitā votāruṣāha cakre vibhṛtraḥ
उ॒त्ता॒नाया॑मजनय॒न्सुषू॑तं॒ भुव॑द॒ग्निः पु॑रु॒पेशा॑सु॒ गर्भ॑ः ।
शिरि॑णायां चिद॒क्तुना॒ महो॑भि॒रप॑रीवृतो वसति॒ प्रचे॑ताः
uttānāyāmajanayansuṣūtaṃ bhuvadagniḥ purupeśāsu garbhaḥ |
śiriṇāyāṃ cidaktunā mahobhiraparīvṛto vasati pracetāḥ
जिघ॑र्म्य॒ग्निं ह॒विषा॑ घृ॒तेन॑ प्रतिक्षि॒यन्तं॒ भुव॑नानि॒ विश्वा॑ ।
पृ॒थुं ति॑र॒श्चा वय॑सा बृ॒हन्तं॒ व्यचि॑ष्ठ॒मन्नै॑ रभ॒सं दृशा॑नम्
jigharmyagniṃ haviṣā ghṛtena pratikṣiyantaṃ bhuvanāni viśvā |
pṛthuṃ tiraścā vayasā bṛhantaṃ vyaciṣṭhamannai rabhasaṃ dṛśānam
आ वि॒श्वत॑ः प्र॒त्यञ्चं॑ जिघर्म्यर॒क्षसा॒ मन॑सा॒ तज्जु॑षेत ।
मर्य॑श्रीः स्पृह॒यद्व॑र्णो अ॒ग्निर्नाभि॒मृशे॑ त॒न्वा॒३॒॑ जर्भु॑राणः
ā viśvataḥ pratyañcaṃ jigharmyarakṣasā manasā tajjuṣeta |
maryaśrīḥ spṛhayadvarṇo agnirnābhimṛśe tanvā jarbhurāṇaḥ
ज्ञे॒या भा॒गं स॑हसा॒नो वरे॑ण॒ त्वादू॑तासो मनु॒वद्व॑देम ।
अनू॑नम॒ग्निं जु॒ह्वा॑ वच॒स्या म॑धु॒पृचं॑ धन॒सा जो॑हवीमि
jñeyā bhāgaṃ sahasāno vareṇa tvādūtāso manuvadvadema |
anūnamagniṃ juhvā vacasyā madhupṛcaṃ dhanasā johavīmi
Text source: Wikisource · CC BY-SA 4.0 (Wikisource transcription of a public-domain text)