त्वया॑ मन्यो स॒रथ॑मारु॒जन्तो॒ हर्ष॑माणासो धृषि॒ता म॑रुत्वः ।
ति॒ग्मेष॑व॒ आयु॑धा सं॒शिशा॑ना अ॒भि प्र य॑न्तु॒ नरो॑ अ॒ग्निरू॑पाः
tvayā manyo sarathamārujanto harṣamāṇāso dhṛṣitā marutvaḥ |
tigmeṣava āyudhā saṃśiśānā abhi pra yantu naro agnirūpāḥ
Mandala 10
Sukta 84: Manyu, lead us as our general
Rishi: मन्युः तापसः · Devata: मन्युः · Metre: १-३ त्रिष्टुप्, ४-७ जगती
7 verses · 84 of 191
What happens in this chapter
Manyu, lead us as our general
Manyu Tapasa again calls on Manyu in Trishtubh and Jagati. Riding with you in one chariot, Manyu, the men advance, breaking through, thrilled and bold, sharpening their arrows, fire in form. Blaze like fire, overcome; be our general when called. Kill the foes, share out their wealth, push the attackers away. You are the one among many, Manyu; sharpen each clan for battle, and with you as ally we raise a shining war cry for victory. May Varuna and Manyu give us both kinds of wealth gathered together, and may the defeated foes, fear in their hearts, slink away.
अ॒ग्निरि॑व मन्यो त्विषि॒तः स॑हस्व सेना॒नीर्न॑ः सहुरे हू॒त ए॑धि ।
ह॒त्वाय॒ शत्रू॒न्वि भ॑जस्व॒ वेद॒ ओजो॒ मिमा॑नो॒ वि मृधो॑ नुदस्व
agniriva manyo tviṣitaḥ sahasva senānīrnaḥ sahure hūta edhi |
hatvāya śatrūnvi bhajasva veda ojo mimāno vi mṛdho nudasva
सह॑स्व मन्यो अ॒भिमा॑तिम॒स्मे रु॒जन्मृ॒णन्प्र॑मृ॒णन्प्रेहि॒ शत्रू॑न् ।
उ॒ग्रं ते॒ पाजो॑ न॒न्वा रु॑रुध्रे व॒शी वशं॑ नयस एकज॒ त्वम्
sahasva manyo abhimātimasme rujanmṛṇanpramṛṇanprehi śatrūn |
ugraṃ te pājo nanvā rurudhre vaśī vaśaṃ nayasa ekaja tvam
एको॑ बहू॒नाम॑सि मन्यवीळि॒तो विशं॑विशं यु॒धये॒ सं शि॑शाधि ।
अकृ॑त्तरु॒क्त्वया॑ यु॒जा व॒यं द्यु॒मन्तं॒ घोषं॑ विज॒याय॑ कृण्महे
eko bahūnāmasi manyavīḻito viśaṃviśaṃ yudhaye saṃ śiśādhi |
akṛttaruktvayā yujā vayaṃ dyumantaṃ ghoṣaṃ vijayāya kṛṇmahe
वि॒जे॒ष॒कृदिन्द्र॑ इवानवब्र॒वो॒३॒॑ऽस्माकं॑ मन्यो अधि॒पा भ॑वे॒ह ।
प्रि॒यं ते॒ नाम॑ सहुरे गृणीमसि वि॒द्मा तमुत्सं॒ यत॑ आब॒भूथ॑
vijeṣakṛdindra ivānavabravo'smākaṃ manyo adhipā bhaveha |
priyaṃ te nāma sahure gṛṇīmasi vidmā tamutsaṃ yata ābabhūtha
आभू॑त्या सह॒जा व॑ज्र सायक॒ सहो॑ बिभर्ष्यभिभूत॒ उत्त॑रम् ।
क्रत्वा॑ नो मन्यो स॒ह मे॒द्ये॑धि महाध॒नस्य॑ पुरुहूत सं॒सृजि॑
ābhūtyā sahajā vajra sāyaka saho bibharṣyabhibhūta uttaram |
kratvā no manyo saha medyedhi mahādhanasya puruhūta saṃsṛji
संसृ॑ष्टं॒ धन॑मु॒भयं॑ स॒माकृ॑तम॒स्मभ्यं॑ दत्तां॒ वरु॑णश्च म॒न्युः ।
भियं॒ दधा॑ना॒ हृद॑येषु॒ शत्र॑व॒ः परा॑जितासो॒ अप॒ नि ल॑यन्ताम्
saṃsṛṣṭaṃ dhanamubhayaṃ samākṛtamasmabhyaṃ dattāṃ varuṇaśca manyuḥ |
bhiyaṃ dadhānā hṛdayeṣu śatravaḥ parājitāso apa ni layantām
Text source: Wikisource · CC BY-SA 4.0 (Wikisource transcription of a public-domain text)