Rishi: मन्युः तापसः · Devata: मन्युः · Metre: १ जगती, २-१४ त्रिष्टुप्
7 verses · 83 of 191
Manyu Tapasa addresses Manyu, righteous fury, in Jagati and Trishtubh. Whoever honours you, Manyu, vajra and arrow, gains strength and might; with you as ally we will overcome Dasa and Arya. Manyu is Indra, Manyu was the deva, Manyu is the hotar, Varuna, Jatavedas; the human clans praise Manyu. Come, mightier than the mighty, with tapas as your companion, slay the foes: slayer of enemies, of Vritra, of Dasyus. The rishi confesses: I went away without a share, Manyu, and was angry with you; come to me. Stand at my right side; let us slay the Vritras, and let us two drink the honey first, in quiet.
यस्ते॑ म॒न्योऽवि॑धद्वज्र सायक॒ सह॒ ओज॑ः पुष्यति॒ विश्व॑मानु॒षक् ।
सा॒ह्याम॒ दास॒मार्यं॒ त्वया॑ यु॒जा सह॑स्कृतेन॒ सह॑सा॒ सह॑स्वता
yaste manyo'vidhadvajra sāyaka saha ojaḥ puṣyati viśvamānuṣak |
sāhyāma dāsamāryaṃ tvayā yujā sahaskṛtena sahasā sahasvatā
म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
म॒न्युं विश॑ ईळते॒ मानु॑षी॒र्याः पा॒हि नो॑ मन्यो॒ तप॑सा स॒जोषा॑ः
manyurindro manyurevāsa devo manyurhotā varuṇo jātavedāḥ |
manyuṃ viśa īḻate mānuṣīryāḥ pāhi no manyo tapasā sajoṣāḥ
अ॒भी॑हि मन्यो त॒वस॒स्तवी॑या॒न्तप॑सा यु॒जा वि ज॑हि॒ शत्रू॑न् ।
अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं न॑ः
abhīhi manyo tavasastavīyāntapasā yujā vi jahi śatrūn |
amitrahā vṛtrahā dasyuhā ca viśvā vasūnyā bharā tvaṃ naḥ
त्वं हि म॑न्यो अ॒भिभू॑त्योजाः स्वय॒म्भूर्भामो॑ अभिमातिषा॒हः ।
वि॒श्वच॑र्षणि॒ः सहु॑रि॒ः सहा॑वान॒स्मास्वोज॒ः पृत॑नासु धेहि
tvaṃ hi manyo abhibhūtyojāḥ svayambhūrbhāmo abhimātiṣāhaḥ |
viśvacarṣaṇiḥ sahuriḥ sahāvānasmāsvojaḥ pṛtanāsu dhehi
अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
तं त्वा॑ मन्यो अक्र॒तुर्जि॑हीळा॒हं स्वा त॒नूर्ब॑ल॒देया॑य॒ मेहि॑
abhāgaḥ sannapa pareto asmi tava kratvā taviṣasya pracetaḥ |
taṃ tvā manyo akraturjihīḻāhaṃ svā tanūrbaladeyāya mehi
अ॒यं ते॑ अ॒स्म्युप॒ मेह्य॒र्वाङ्प्र॑तीची॒नः स॑हुरे विश्वधायः ।
मन्यो॑ वज्रिन्न॒भि मामा व॑वृत्स्व॒ हना॑व॒ दस्यूँ॑रु॒त बो॑ध्या॒पेः
ayaṃ te asmyupa mehyarvāṅpratīcīnaḥ sahure viśvadhāyaḥ |
manyo vajrinnabhi māmā vavṛtsva hanāva dasyūm̐ruta bodhyāpeḥ
अ॒भि प्रेहि॑ दक्षिण॒तो भ॑वा॒ मेऽधा॑ वृ॒त्राणि॑ जङ्घनाव॒ भूरि॑ ।
जु॒होमि॑ ते ध॒रुणं॒ मध्वो॒ अग्र॑मु॒भा उ॑पां॒शु प्र॑थ॒मा पि॑बाव
abhi prehi dakṣiṇato bhavā me'dhā vṛtrāṇi jaṅghanāva bhūri |
juhomi te dharuṇaṃ madhvo agramubhā upāṃśu prathamā pibāva
Text source: Wikisource · CC BY-SA 4.0 (Wikisource transcription of a public-domain text)
