Rishi: सौचीकोऽग्निः · Devata: विश्वे देवाः · Metre: त्रिष्टुप्
6 verses · 52 of 191
Agni Saucika, now chosen, speaks to the Vishvedevas in Trishtubh. Instruct me, devas, how I should think as hotar seated here; tell me your shares and the path by which I carry offerings. I have sat down as the best sacrificer, the Maruts urge me on, the Ashvins take the adhvaryu's work. The devas made me bearer of offerings though I had slipped away and wandered in hardship. Agni will arrange our sacrifice of five courses, three folds and seven threads. The last verse says three thousand three hundred and thirty-nine devas honoured Agni, sprinkled him with ghee, spread the barhis and seated him as hotar.
विश्वे॑ देवाः शा॒स्तन॑ मा॒ यथे॒ह होता॑ वृ॒तो म॒नवै॒ यन्नि॒षद्य॑ ।
प्र मे॑ ब्रूत भाग॒धेयं॒ यथा॑ वो॒ येन॑ प॒था ह॒व्यमा वो॒ वहा॑नि
viśve devāḥ śāstana mā yatheha hotā vṛto manavai yanniṣadya |
pra me brūta bhāgadheyaṃ yathā vo yena pathā havyamā vo vahāni
अ॒हं होता॒ न्य॑सीदं॒ यजी॑या॒न्विश्वे॑ दे॒वा म॒रुतो॑ मा जुनन्ति ।
अह॑रहरश्वि॒नाध्व॑र्यवं वां ब्र॒ह्मा स॒मिद्भ॑वति॒ साहु॑तिर्वाम्
ahaṃ hotā nyasīdaṃ yajīyānviśve devā maruto mā junanti |
aharaharaśvinādhvaryavaṃ vāṃ brahmā samidbhavati sāhutirvām
अ॒यं यो होता॒ किरु॒ स य॒मस्य॒ कमप्यू॑हे॒ यत्स॑म॒ञ्जन्ति॑ दे॒वाः ।
अह॑रहर्जायते मा॒सिमा॒स्यथा॑ दे॒वा द॑धिरे हव्य॒वाह॑म्
ayaṃ yo hotā kiru sa yamasya kamapyūhe yatsamañjanti devāḥ |
aharaharjāyate māsimāsyathā devā dadhire havyavāham
मां दे॒वा द॑धिरे हव्य॒वाह॒मप॑म्लुक्तं ब॒हु कृ॒च्छ्रा चर॑न्तम् ।
अ॒ग्निर्वि॒द्वान्य॒ज्ञं न॑ः कल्पयाति॒ पञ्च॑यामं त्रि॒वृतं॑ स॒प्तत॑न्तुम्
māṃ devā dadhire havyavāhamapamluktaṃ bahu kṛcchrā carantam |
agnirvidvānyajñaṃ naḥ kalpayāti pañcayāmaṃ trivṛtaṃ saptatantum
आ वो॑ यक्ष्यमृत॒त्वं सु॒वीरं॒ यथा॑ वो देवा॒ वरि॑व॒ः करा॑णि ।
आ बा॒ह्वोर्वज्र॒मिन्द्र॑स्य धेया॒मथे॒मा विश्वा॒ः पृत॑ना जयाति
ā vo yakṣyamṛtatvaṃ suvīraṃ yathā vo devā varivaḥ karāṇi |
ā bāhvorvajramindrasya dheyāmathemā viśvāḥ pṛtanā jayāti
त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न्घृ॒तैरस्तृ॑णन्ब॒र्हिर॑स्मा॒ आदिद्धोता॑रं॒ न्य॑सादयन्त
trīṇi śatā trī sahasrāṇyagniṃ triṃśacca devā nava cāsaparyan |
aukṣanghṛtairastṛṇanbarhirasmā ādiddhotāraṃ nyasādayanta
Text source: Wikisource · CC BY-SA 4.0 (Wikisource transcription of a public-domain text)
