प्र ह्यच्छा॑ मनी॒षा स्पा॒र्हा यन्ति॑ नि॒युत॑ः ।
प्र द॒स्रा नि॒युद्र॑थः पू॒षा अ॑विष्टु॒ माहि॑नः
pra hyacchā manīṣā spārhā yanti niyutaḥ |
pra dasrā niyudrathaḥ pūṣā aviṣṭu māhinaḥ
Mandala 10
Sukta 26: Pushan, friend of every seeker
Rishi: ऐन्द्रोविमदः, प्राजापत्यो वा, वासुक्रो वसुकृद्वा · Devata: पूषा · Metre: अनुष्टुप्, १, ४ उष्णिक्
9 verses · 26 of 191
What happens in this chapter
Pushan, friend of every seeker
Vimada Aindra, or Prajapatya, or Vasukra, praises Pushan in nine verses of anushtubh and ushnik. Our longed-for thoughts go to Pushan, whose chariot is drawn by teams; let the mighty one help us. Pushan knows good praises; like Soma he is a bull who sprinkles his pastures. The rishi calls him fulfiller of thoughts, urger of sages, the friend who drives away the singer's foe. He weaves the sheep's wool and cleanses garments. Lord of strength and plenty, he shakes his beard. Goats draw his chariot; he is the ancient, unshaken friend of everyone who asks.
यस्य॒ त्यन्म॑हि॒त्वं वा॒ताप्य॑म॒यं जन॑ः ।
विप्र॒ आ वं॑सद्धी॒तिभि॒श्चिके॑त सुष्टुती॒नाम्
yasya tyanmahitvaṃ vātāpyamayaṃ janaḥ |
vipra ā vaṃsaddhītibhiściketa suṣṭutīnām
स वे॑द सुष्टुती॒नामिन्दु॒र्न पू॒षा वृषा॑ ।
अ॒भि प्सुर॑ः प्रुषायति व्र॒जं न॒ आ प्रु॑षायति
sa veda suṣṭutīnāmindurna pūṣā vṛṣā |
abhi psuraḥ pruṣāyati vrajaṃ na ā pruṣāyati
मं॒सी॒महि॑ त्वा व॒यम॒स्माकं॑ देव पूषन् ।
म॒ती॒नां च॒ साध॑नं॒ विप्रा॑णां चाध॒वम्
maṃsīmahi tvā vayamasmākaṃ deva pūṣan |
matīnāṃ ca sādhanaṃ viprāṇāṃ cādhavam
प्रत्य॑र्धिर्य॒ज्ञाना॑मश्वह॒यो रथा॑नाम् ।
ऋषि॒ः स यो मनु॑र्हितो॒ विप्र॑स्य यावयत्स॒खः
pratyardhiryajñānāmaśvahayo rathānām |
ṛṣiḥ sa yo manurhito viprasya yāvayatsakhaḥ
आ॒धीष॑माणाया॒ः पति॑ः शु॒चाया॑श्च शु॒चस्य॑ च ।
वा॒सो॒वा॒योऽवी॑ना॒मा वासां॑सि॒ मर्मृ॑जत्
ādhīṣamāṇāyāḥ patiḥ śucāyāśca śucasya ca |
vāsovāyo'vīnāmā vāsāṃsi marmṛjat
इ॒नो वाजा॑नां॒ पति॑रि॒नः पु॑ष्टी॒नां सखा॑ ।
प्र श्मश्रु॑ हर्य॒तो दू॑धो॒द्वि वृथा॒ यो अदा॑भ्यः
ino vājānāṃ patirinaḥ puṣṭīnāṃ sakhā |
pra śmaśru haryato dūdhodvi vṛthā yo adābhyaḥ
आ ते॒ रथ॑स्य पूषन्न॒जा धुरं॑ ववृत्युः ।
विश्व॑स्या॒र्थिन॒ः सखा॑ सनो॒जा अन॑पच्युतः
ā te rathasya pūṣannajā dhuraṃ vavṛtyuḥ |
viśvasyārthinaḥ sakhā sanojā anapacyutaḥ
अ॒स्माक॑मू॒र्जा रथं॑ पू॒षा अ॑विष्टु॒ माहि॑नः ।
भुव॒द्वाजा॑नां वृ॒ध इ॒मं न॑ः शृणव॒द्धव॑म्
asmākamūrjā rathaṃ pūṣā aviṣṭu māhinaḥ |
bhuvadvājānāṃ vṛdha imaṃ naḥ śṛṇavaddhavam
Text source: Wikisource · CC BY-SA 4.0 (Wikisource transcription of a public-domain text)