नि व॑र्तध्वं॒ मानु॑ गाता॒स्मान्सि॑षक्त रेवतीः ।
अग्नी॑षोमा पुनर्वसू अ॒स्मे धा॑रयतं र॒यिम्
ni vartadhvaṃ mānu gātāsmānsiṣakta revatīḥ |
agnīṣomā punarvasū asme dhārayataṃ rayim
Mandala 10
Sukta 19: Calling the straying cows home
Rishi: मथितो यामायनः, भृगुर्वारुणिर्वा, भार्गवश्च्यवनो वा · Devata: आपः, गावो वा, १ उत्तरार्धर्चस्य अग्नीषोमौ · Metre: अनुष्टुप्, ६ गायत्री
8 verses · 19 of 191
What happens in this chapter
Calling the straying cows home
Mathita Yamayana, or Bhrigu Varuni, or Chyavana Bhargava, sees this anushtubh hymn to the Waters or the Cows, with Agni and Soma in the first verse. The cows are told: turn back, do not go after others, stay with us, you rich ones. Indra is asked to hold them and Agni to drive them home. The rishi calls on the herdsman who knows their going out, their coming in, their wandering and their return. He surrounds the cattle with strength, ghee and milk, and asks all Devas worthy of yajna to join us with wealth. From the four quarters of the earth, he says, turn them back.
पुन॑रेना॒ नि व॑र्तय॒ पुन॑रेना॒ न्या कु॑रु ।
इन्द्र॑ एणा॒ नि य॑च्छत्व॒ग्निरे॑ना उ॒पाज॑तु
punarenā ni vartaya punarenā nyā kuru |
indra eṇā ni yacchatvagnirenā upājatu
पुन॑रे॒ता नि व॑र्तन्ताम॒स्मिन्पु॑ष्यन्तु॒ गोप॑तौ ।
इ॒हैवाग्ने॒ नि धा॑रये॒ह ति॑ष्ठतु॒ या र॒यिः
punaretā ni vartantāmasminpuṣyantu gopatau |
ihaivāgne ni dhārayeha tiṣṭhatu yā rayiḥ
यन्नि॒यानं॒ न्यय॑नं सं॒ज्ञानं॒ यत्प॒राय॑णम् ।
आ॒वर्त॑नं नि॒वर्त॑नं॒ यो गो॒पा अपि॒ तं हु॑वे
yanniyānaṃ nyayanaṃ saṃjñānaṃ yatparāyaṇam |
āvartanaṃ nivartanaṃ yo gopā api taṃ huve
य उ॒दान॒ड्व्यय॑नं॒ य उ॒दान॑ट् प॒राय॑णम् ।
आ॒वर्त॑नं नि॒वर्त॑न॒मपि॑ गो॒पा नि व॑र्तताम्
ya udānaḍvyayanaṃ ya udānaṭ parāyaṇam |
āvartanaṃ nivartanamapi gopā ni vartatām
आ नि॑वर्त॒ नि व॑र्तय॒ पुन॑र्न इन्द्र॒ गा दे॑हि ।
जी॒वाभि॑र्भुनजामहै
ā nivarta ni vartaya punarna indra gā dehi |
jīvābhirbhunajāmahai
परि॑ वो वि॒श्वतो॑ दध ऊ॒र्जा घृ॒तेन॒ पय॑सा ।
ये दे॒वाः के च॑ य॒ज्ञिया॒स्ते र॒य्या सं सृ॑जन्तु नः
pari vo viśvato dadha ūrjā ghṛtena payasā |
ye devāḥ ke ca yajñiyāste rayyā saṃ sṛjantu naḥ
आ नि॑वर्तन वर्तय॒ नि नि॑वर्तन वर्तय ।
भूम्या॒श्चत॑स्रः प्र॒दिश॒स्ताभ्य॑ एना॒ नि व॑र्तय
ā nivartana vartaya ni nivartana vartaya |
bhūmyāścatasraḥ pradiśastābhya enā ni vartaya
Text source: Wikisource · CC BY-SA 4.0 (Wikisource transcription of a public-domain text)