Rishi: विश्वामित्र-जमदग्नी · Devata: इन्द्रः, ३ सोम-वरुण-बृहस्पति- अनुमति-मघवत्- धातृ-विधातारः · Metre: जगती
4 verses · 167 of 191
Vishvamitra and Jamadagni together praise Indra in jagati, with Soma, Varuna, Brihaspati, Anumati, Dhatar and Vidhatar named in the third verse. This honey is poured for you, Indra; you rule over the pressed jar. Make wealth rich in heroes for us; by heating tapas you won the light of heaven. We call the mighty one who won heaven, joyful in the drink; wake to this yajna and come. Under the law of King Soma and Varuna, in the shelter of Brihaspati and Anumati, I have eaten from the jars at your praise. The rishis say they came to the pressing together, in Indra's house.
तुभ्ये॒दमि॑न्द्र॒ परि॑ षिच्यते॒ मधु॒ त्वं सु॒तस्य॑ क॒लश॑स्य राजसि ।
त्वं र॒यिं पु॑रु॒वीरा॑मु नस्कृधि॒ त्वं तप॑ः परि॒तप्या॑जय॒ः स्व॑ः
tubhyedamindra pari ṣicyate madhu tvaṃ sutasya kalaśasya rājasi |
tvaṃ rayiṃ puruvīrāmu naskṛdhi tvaṃ tapaḥ paritapyājayaḥ svaḥ
स्व॒र्जितं॒ महि॑ मन्दा॒नमन्ध॑सो॒ हवा॑महे॒ परि॑ श॒क्रं सु॒ताँ उप॑ ।
इ॒मं नो॑ य॒ज्ञमि॒ह बो॒ध्या ग॑हि॒ स्पृधो॒ जय॑न्तं म॒घवा॑नमीमहे
svarjitaṃ mahi mandānamandhaso havāmahe pari śakraṃ sutām̐ upa |
imaṃ no yajñamiha bodhyā gahi spṛdho jayantaṃ maghavānamīmahe
सोम॑स्य॒ राज्ञो॒ वरु॑णस्य॒ धर्म॑णि॒ बृह॒स्पते॒रनु॑मत्या उ॒ शर्म॑णि ।
तवा॒हम॒द्य म॑घव॒न्नुप॑स्तुतौ॒ धात॒र्विधा॑तः क॒लशाँ॑ अभक्षयम्
somasya rājño varuṇasya dharmaṇi bṛhaspateranumatyā u śarmaṇi |
tavāhamadya maghavannupastutau dhātarvidhātaḥ kalaśām̐ abhakṣayam
प्रसू॑तो भ॒क्षम॑करं च॒रावपि॒ स्तोमं॑ चे॒मं प्र॑थ॒मः सू॒रिरुन्मृ॑जे ।
सु॒ते सा॒तेन॒ यद्याग॑मं वां॒ प्रति॑ विश्वामित्रजमदग्नी॒ दमे॑
prasūto bhakṣamakaraṃ carāvapi stomaṃ cemaṃ prathamaḥ sūrirunmṛje |
sute sātena yadyāgamaṃ vāṃ prati viśvāmitrajamadagnī dame
Text source: Wikisource · CC BY-SA 4.0 (Wikisource transcription of a public-domain text)
