Mandala 10

Sukta 148: Prithu Vainya calls on Indra

Rishi: पृथुर्वैन्यः · Devata: इन्द्रः · Metre: त्रिष्टुप्

5 verses · 148 of 191

What happens in this chapter

Prithu Vainya calls on Indra

The rishi is Prithu Vainya, praising Indra in trishtubh. Having pressed soma and won strength, we praise you, Indra; bring us the welfare you desire, and may we, helped by you, win it ourselves. Lofty hero, at your birth you overcame the dasa clans together with Surya; we bring you the soma hidden in the waters, as at a spring. Learned one, receive the songs of the stranger and of the rishis; may we be those who delight you with soma and food. The last verse names the rishi: hear the call of Prithu, and be praised by the hymns of Vena's son.

148.1

सु॒ष्वा॒णास॑ इन्द्र स्तु॒मसि॑ त्वा सस॒वांस॑श्च तुविनृम्ण॒ वाज॑म् ।
आ नो॑ भर सुवि॒तं यस्य॑ चा॒कन्त्मना॒ तना॑ सनुयाम॒ त्वोता॑ः

suṣvāṇāsa indra stumasi tvā sasavāṃsaśca tuvinṛmṇa vājam |
ā no bhara suvitaṃ yasya cākantmanā tanā sanuyāma tvotāḥ

148.2

ऋ॒ष्वस्त्वमि॑न्द्र शूर जा॒तो दासी॒र्विश॒ः सूर्ये॑ण सह्याः ।
गुहा॑ हि॒तं गुह्यं॑ गू॒ळ्हम॒प्सु बि॑भृ॒मसि॑ प्र॒स्रव॑णे॒ न सोम॑म्

ṛṣvastvamindra śūra jāto dāsīrviśaḥ sūryeṇa sahyāḥ |
guhā hitaṃ guhyaṃ gūḻhamapsu bibhṛmasi prasravaṇe na somam

148.3

अ॒र्यो वा॒ गिरो॑ अ॒भ्य॑र्च वि॒द्वानृषी॑णां॒ विप्र॑ः सुम॒तिं च॑का॒नः ।
ते स्या॑म॒ ये र॒णय॑न्त॒ सोमै॑रे॒नोत तुभ्यं॑ रथोळ्ह भ॒क्षैः

aryo vā giro abhyarca vidvānṛṣīṇāṃ vipraḥ sumatiṃ cakānaḥ |
te syāma ye raṇayanta somairenota tubhyaṃ rathoḻha bhakṣaiḥ

148.4

इ॒मा ब्रह्मे॑न्द्र॒ तुभ्यं॑ शंसि॒ दा नृभ्यो॑ नृ॒णां शू॑र॒ शव॑ः ।
तेभि॑र्भव॒ सक्र॑तु॒र्येषु॑ चा॒कन्नु॒त त्रा॑यस्व गृण॒त उ॒त स्तीन्

imā brahmendra tubhyaṃ śaṃsi dā nṛbhyo nṛṇāṃ śūra śavaḥ |
tebhirbhava sakraturyeṣu cākannuta trāyasva gṛṇata uta stīn

148.5

श्रु॒धी हव॑मिन्द्र शूर॒ पृथ्या॑ उ॒त स्त॑वसे वे॒न्यस्या॒र्कैः ।
आ यस्ते॒ योनिं॑ घृ॒तव॑न्त॒मस्वा॑रू॒र्मिर्न निम्नैर्द्र॑वयन्त॒ वक्वा॑ः

śrudhī havamindra śūra pṛthyā uta stavase venyasyārkaiḥ |
ā yaste yoniṃ ghṛtavantamasvārūrmirna nimnairdravayanta vakvāḥ

Text source: Wikisource · CC BY-SA 4.0 (Wikisource transcription of a public-domain text)