Rishi: आङ्गिर्हविर्धानः, विवस्वानादित्यो वा · Devata: हविर्धाने · Metre: त्रिष्टुप्, ५ जगती
5 verses · 13 of 191
Havirdhana Angi, or Vivasvan Aditya, addresses the two havirdhana carts that bring Soma to the yajna. Its first verse is well known: I yoke to you the ancient prayer with homage; let all the sons of immortality hear, who dwell in the heavenly abodes. The carts are asked to sit in their place and be a good seat for Soma. The rishi climbs five steps of the rite. He says the Devas chose death for themselves and did not choose immortality for their offspring; they made Brihaspati the rishi of the yajna, and Yama gave up his own body.
यु॒जे वां॒ ब्रह्म॑ पू॒र्व्यं नमो॑भि॒र्वि श्लोक॑ एतु प॒थ्ये॑व सू॒रेः ।
शृ॒ण्वन्तु॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः
yuje vāṃ brahma pūrvyaṃ namobhirvi śloka etu pathyeva sūreḥ |
śṛṇvantu viśve amṛtasya putrā ā ye dhāmāni divyāni tasthuḥ
य॒मे इ॑व॒ यत॑माने॒ यदैतं॒ प्र वां॑ भर॒न्मानु॑षा देव॒यन्त॑ः ।
आ सी॑दतं॒ स्वमु॑ लो॒कं विदा॑ने स्वास॒स्थे भ॑वत॒मिन्द॑वे नः
yame iva yatamāne yadaitaṃ pra vāṃ bharanmānuṣā devayantaḥ |
ā sīdataṃ svamu lokaṃ vidāne svāsasthe bhavatamindave naḥ
पञ्च॑ प॒दानि॑ रु॒पो अन्व॑रोहं॒ चतु॑ष्पदी॒मन्वे॑मि व्र॒तेन॑ ।
अ॒क्षरे॑ण॒ प्रति॑ मिम ए॒तामृ॒तस्य॒ नाभा॒वधि॒ सं पु॑नामि
pañca padāni rupo anvarohaṃ catuṣpadīmanvemi vratena |
akṣareṇa prati mima etāmṛtasya nābhāvadhi saṃ punāmi
दे॒वेभ्य॒ः कम॑वृणीत मृ॒त्युं प्र॒जायै॒ कम॒मृतं॒ नावृ॑णीत ।
बृह॒स्पतिं॑ य॒ज्ञम॑कृण्वत॒ ऋषिं॑ प्रि॒यां य॒मस्त॒न्वं१॒॑ प्रारि॑रेचीत्
devebhyaḥ kamavṛṇīta mṛtyuṃ prajāyai kamamṛtaṃ nāvṛṇīta |
bṛhaspatiṃ yajñamakṛṇvata ṛṣiṃ priyāṃ yamastanvaṃ prārirecīt
स॒प्त क्ष॑रन्ति॒ शिश॑वे म॒रुत्व॑ते पि॒त्रे पु॒त्रासो॒ अप्य॑वीवतन्नृ॒तम् ।
उ॒भे इद॑स्यो॒भय॑स्य राजत उ॒भे य॑तेते उ॒भय॑स्य पुष्यतः
sapta kṣaranti śiśave marutvate pitre putrāso apyavīvatannṛtam |
ubhe idasyobhayasya rājata ubhe yatete ubhayasya puṣyataḥ
Text source: Wikisource · CC BY-SA 4.0 (Wikisource transcription of a public-domain text)
