Rishi: वैरूपो नभ-प्रभेदनः · Devata: इन्द्रः · Metre: त्रिष्टुप्
10 verses · 112 of 191
Nabhahprabhedana Vairupa calls Indra to the morning pressing in trishtubh. The first drink is his; let him come in his chariot swifter than thought. He should dress his body in the sun's golden splendour and sit with his friends. Here is his ancient vessel, full of sweet Soma that all the Devas long for. In true wrath he loosened the rock and made the cow easy to find for the Brahmana. Then the verse devotees love: "Sit down, Ganapati, among the hosts; they call you wisest of seers; nothing is done far or near without you." The rishi asks Maghavan to share wealth with his friends.
इन्द्र॒ पिब॑ प्रतिका॒मं सु॒तस्य॑ प्रातःसा॒वस्तव॒ हि पू॒र्वपी॑तिः ।
हर्ष॑स्व॒ हन्त॑वे शूर॒ शत्रू॑नु॒क्थेभि॑ष्टे वी॒र्या॒३॒॑ प्र ब्र॑वाम
indra piba pratikāmaṃ sutasya prātaḥsāvastava hi pūrvapītiḥ |
harṣasva hantave śūra śatrūnukthebhiṣṭe vīryā pra bravāma
यस्ते॒ रथो॒ मन॑सो॒ जवी॑या॒नेन्द्र॒ तेन॑ सोम॒पेया॑य याहि ।
तूय॒मा ते॒ हर॑य॒ः प्र द्र॑वन्तु॒ येभि॒र्यासि॒ वृष॑भि॒र्मन्द॑मानः
yaste ratho manaso javīyānendra tena somapeyāya yāhi |
tūyamā te harayaḥ pra dravantu yebhiryāsi vṛṣabhirmandamānaḥ
हरि॑त्वता॒ वर्च॑सा॒ सूर्य॑स्य॒ श्रेष्ठै॑ रू॒पैस्त॒न्वं॑ स्पर्शयस्व ।
अ॒स्माभि॑रिन्द्र॒ सखि॑भिर्हुवा॒नः स॑ध्रीची॒नो मा॑दयस्वा नि॒षद्य॑
haritvatā varcasā sūryasya śreṣṭhai rūpaistanvaṃ sparśayasva |
asmābhirindra sakhibhirhuvānaḥ sadhrīcīno mādayasvā niṣadya
यस्य॒ त्यत्ते॑ महि॒मानं॒ मदे॑ष्वि॒मे म॒ही रोद॑सी॒ नावि॑विक्ताम् ।
तदोक॒ आ हरि॑भिरिन्द्र यु॒क्तैः प्रि॒येभि॑र्याहि प्रि॒यमन्न॒मच्छ॑
yasya tyatte mahimānaṃ madeṣvime mahī rodasī nāviviktām |
tadoka ā haribhirindra yuktaiḥ priyebhiryāhi priyamannamaccha
यस्य॒ शश्व॑त्पपि॒वाँ इ॑न्द्र॒ शत्रू॑ननानुकृ॒त्या रण्या॑ च॒कर्थ॑ ।
स ते॒ पुरं॑धिं॒ तवि॑षीमियर्ति॒ स ते॒ मदा॑य सु॒त इ॑न्द्र॒ सोम॑ः
yasya śaśvatpapivām̐ indra śatrūnanānukṛtyā raṇyā cakartha |
sa te puraṃdhiṃ taviṣīmiyarti sa te madāya suta indra somaḥ
इ॒दं ते॒ पात्रं॒ सन॑वित्तमिन्द्र॒ पिबा॒ सोम॑मे॒ना श॑तक्रतो ।
पू॒र्ण आ॑हा॒वो म॑दि॒रस्य॒ मध्वो॒ यं विश्व॒ इद॑भि॒हर्य॑न्ति दे॒वाः
idaṃ te pātraṃ sanavittamindra pibā somamenā śatakrato |
pūrṇa āhāvo madirasya madhvo yaṃ viśva idabhiharyanti devāḥ
वि हि त्वामि॑न्द्र पुरु॒धा जना॑सो हि॒तप्र॑यसो वृषभ॒ ह्वय॑न्ते ।
अ॒स्माकं॑ ते॒ मधु॑मत्तमानी॒मा भु॑व॒न्सव॑ना॒ तेषु॑ हर्य
vi hi tvāmindra purudhā janāso hitaprayaso vṛṣabha hvayante |
asmākaṃ te madhumattamānīmā bhuvansavanā teṣu harya
प्र त॑ इन्द्र पू॒र्व्याणि॒ प्र नू॒नं वी॒र्या॑ वोचं प्रथ॒मा कृ॒तानि॑ ।
स॒ती॒नम॑न्युरश्रथायो॒ अद्रिं॑ सुवेद॒नाम॑कृणो॒र्ब्रह्म॑णे॒ गाम्
pra ta indra pūrvyāṇi pra nūnaṃ vīryā vocaṃ prathamā kṛtāni |
satīnamanyuraśrathāyo adriṃ suvedanāmakṛṇorbrahmaṇe gām
नि षु सी॑द गणपते ग॒णेषु॒ त्वामा॑हु॒र्विप्र॑तमं कवी॒नाम् ।
न ऋ॒ते त्वत्क्रि॑यते॒ किं च॒नारे म॒हाम॒र्कं म॑घवञ्चि॒त्रम॑र्च
ni ṣu sīda gaṇapate gaṇeṣu tvāmāhurvipratamaṃ kavīnām |
na ṛte tvatkriyate kiṃ canāre mahāmarkaṃ maghavañcitramarca
अ॒भि॒ख्या नो॑ मघव॒न्नाध॑माना॒न्सखे॑ बो॒धि व॑सुपते॒ सखी॑नाम् ।
रणं॑ कृधि रणकृत्सत्यशु॒ष्माभ॑क्ते चि॒दा भ॑जा रा॒ये अ॒स्मान्
abhikhyā no maghavannādhamānānsakhe bodhi vasupate sakhīnām |
raṇaṃ kṛdhi raṇakṛtsatyaśuṣmābhakte cidā bhajā rāye asmān
Text source: Wikisource · CC BY-SA 4.0 (Wikisource transcription of a public-domain text)
