Rishi: आङ्गिर्हविर्धानः · Devata: अग्निः · Metre: जगती, ७-९ त्रिष्टुप्
9 verses · 11 of 191
Havirdhana Angi praises Agni in jagati with trishtubh at the close. The bull has milked from heaven the streams of Aditi's mighty child; like Varuna he knows all by thought. The rishi asks that the murmuring Gandharvi and the water-maiden guard his mind. Dawn shone for Manu when men brought forth Agni as hotar for the assembly, and the falcon carried the far-seeing drop to the rite. Agni is delightful as pasture to one who thrives. When he shares out treasures among the Devas, the rishi asks for a rich portion, and that Agni yoke the chariot of immortality.
वृषा॒ वृष्णे॑ दुदुहे॒ दोह॑सा दि॒वः पयां॑सि य॒ह्वो अदि॑ते॒रदा॑भ्यः ।
विश्वं॒ स वे॑द॒ वरु॑णो॒ यथा॑ धि॒या स य॒ज्ञियो॑ यजतु य॒ज्ञियाँ॑ ऋ॒तून्
vṛṣā vṛṣṇe duduhe dohasā divaḥ payāṃsi yahvo aditeradābhyaḥ |
viśvaṃ sa veda varuṇo yathā dhiyā sa yajñiyo yajatu yajñiyām̐ ṛtūn
रप॑द्गन्ध॒र्वीरप्या॑ च॒ योष॑णा न॒दस्य॑ ना॒दे परि॑ पातु मे॒ मन॑ः ।
इ॒ष्टस्य॒ मध्ये॒ अदि॑ति॒र्नि धा॑तु नो॒ भ्राता॑ नो ज्ये॒ष्ठः प्र॑थ॒मो वि वो॑चति
rapadgandharvīrapyā ca yoṣaṇā nadasya nāde pari pātu me manaḥ |
iṣṭasya madhye aditirni dhātu no bhrātā no jyeṣṭhaḥ prathamo vi vocati
सो चि॒न्नु भ॒द्रा क्षु॒मती॒ यश॑स्वत्यु॒षा उ॑वास॒ मन॑वे॒ स्व॑र्वती ।
यदी॑मु॒शन्त॑मुश॒तामनु॒ क्रतु॑म॒ग्निं होता॑रं वि॒दथा॑य॒ जीज॑नन्
so cinnu bhadrā kṣumatī yaśasvatyuṣā uvāsa manave svarvatī |
yadīmuśantamuśatāmanu kratumagniṃ hotāraṃ vidathāya jījanan
अध॒ त्यं द्र॒प्सं वि॒भ्वं॑ विचक्ष॒णं विराभ॑रदिषि॒तः श्ये॒नो अ॑ध्व॒रे ।
यदी॒ विशो॑ वृ॒णते॑ द॒स्ममार्या॑ अ॒ग्निं होता॑र॒मध॒ धीर॑जायत
adha tyaṃ drapsaṃ vibhvaṃ vicakṣaṇaṃ virābharadiṣitaḥ śyeno adhvare |
yadī viśo vṛṇate dasmamāryā agniṃ hotāramadha dhīrajāyata
सदा॑सि र॒ण्वो यव॑सेव॒ पुष्य॑ते॒ होत्रा॑भिरग्ने॒ मनु॑षः स्वध्व॒रः ।
विप्र॑स्य वा॒ यच्छ॑शमा॒न उ॒क्थ्यं१॒॑ वाजं॑ सस॒वाँ उ॑प॒यासि॒ भूरि॑भिः
sadāsi raṇvo yavaseva puṣyate hotrābhiragne manuṣaḥ svadhvaraḥ |
viprasya vā yacchaśamāna ukthyaṃ vājaṃ sasavām̐ upayāsi bhūribhiḥ
उदी॑रय पि॒तरा॑ जा॒र आ भग॒मिय॑क्षति हर्य॒तो हृ॒त्त इ॑ष्यति ।
विव॑क्ति॒ वह्नि॑ः स्वप॒स्यते॑ म॒खस्त॑वि॒ष्यते॒ असु॑रो॒ वेप॑ते म॒ती
udīraya pitarā jāra ā bhagamiyakṣati haryato hṛtta iṣyati |
vivakti vahniḥ svapasyate makhastaviṣyate asuro vepate matī
यस्ते॑ अग्ने सुम॒तिं मर्तो॒ अक्ष॒त्सह॑सः सूनो॒ अति॒ स प्र शृ॑ण्वे ।
इषं॒ दधा॑नो॒ वह॑मानो॒ अश्वै॒रा स द्यु॒माँ अम॑वान्भूषति॒ द्यून्
yaste agne sumatiṃ marto akṣatsahasaḥ sūno ati sa pra śṛṇve |
iṣaṃ dadhāno vahamāno aśvairā sa dyumām̐ amavānbhūṣati dyūn
यद॑ग्न ए॒षा समि॑ति॒र्भवा॑ति दे॒वी दे॒वेषु॑ यज॒ता य॑जत्र ।
रत्ना॑ च॒ यद्वि॒भजा॑सि स्वधावो भा॒गं नो॒ अत्र॒ वसु॑मन्तं वीतात्
yadagna eṣā samitirbhavāti devī deveṣu yajatā yajatra |
ratnā ca yadvibhajāsi svadhāvo bhāgaṃ no atra vasumantaṃ vītāt
श्रु॒धी नो॑ अग्ने॒ सद॑ने स॒धस्थे॑ यु॒क्ष्वा रथ॑म॒मृत॑स्य द्रवि॒त्नुम् ।
आ नो॑ वह॒ रोद॑सी दे॒वपु॑त्रे॒ माकि॑र्दे॒वाना॒मप॑ भूरि॒ह स्या॑ः
śrudhī no agne sadane sadhasthe yukṣvā rathamamṛtasya dravitnum |
ā no vaha rodasī devaputre mākirdevānāmapa bhūriha syāḥ
Text source: Wikisource · CC BY-SA 4.0 (Wikisource transcription of a public-domain text)
