यु॒ञ्जन्ति॑ ब्र॒ध्नम॑रु॒षं चर॑न्तं॒ परि॑ त॒स्थुष॑ः ।
रोच॑न्ते रोच॒ना दि॒वि
yuñjanti bradhnamaruṣaṃ carantaṃ pari tasthuṣaḥ |
rocante rocanā divi
Mandala 1
Sukta 6: Indra and the Maruts free the cows
Rishi: मधुच्छन्दा वैश्वामित्रः · Devata: १-३ इन्द्रः, ४,६,८,९ मरुतः, ५,७ मरुत इन्द्रश्च, १० इन्द्रः · Metre: गायत्री
10 verses · 6 of 191
What happens in this chapter
Indra and the Maruts free the cows
They yoke the ruddy one that moves around the still worlds, and the lights shine in heaven. Madhuchchhandas Vaishvamitra's gayatri sukta begins with the rising sun and Indra's bay horses. Indra makes light for what had no light and form for what had none, born with the dawns. The Maruts, after their own nature, took birth again and won a name worthy of worship. With them, the breakers of strongholds, Indra found the cows hidden in the cave. Indra and the Maruts appear together, fearless, joyful, of equal splendour. Whether from the sky, the earth or the wide air, the singers ask Indra to come and give.
यु॒ञ्जन्त्य॑स्य॒ काम्या॒ हरी॒ विप॑क्षसा॒ रथे॑ ।
शोणा॑ धृ॒ष्णू नृ॒वाह॑सा
yuñjantyasya kāmyā harī vipakṣasā rathe |
śoṇā dhṛṣṇū nṛvāhasā
के॒तुं कृ॒ण्वन्न॑के॒तवे॒ पेशो॑ मर्या अपे॒शसे॑ ।
समु॒षद्भि॑रजायथाः
ketuṃ kṛṇvannaketave peśo maryā apeśase |
samuṣadbhirajāyathāḥ
आदह॑ स्व॒धामनु॒ पुन॑र्गर्भ॒त्वमे॑रि॒रे ।
दधा॑ना॒ नाम॑ य॒ज्ञिय॑म्
ādaha svadhāmanu punargarbhatvamerire |
dadhānā nāma yajñiyam
वी॒ळु चि॑दारुज॒त्नुभि॒र्गुहा॑ चिदिन्द्र॒ वह्नि॑भिः ।
अवि॑न्द उ॒स्रिया॒ अनु॑
vīḻu cidārujatnubhirguhā cidindra vahnibhiḥ |
avinda usriyā anu
दे॒व॒यन्तो॒ यथा॑ म॒तिमच्छा॑ वि॒दद्व॑सुं॒ गिर॑ः ।
म॒हाम॑नूषत श्रु॒तम्
devayanto yathā matimacchā vidadvasuṃ giraḥ |
mahāmanūṣata śrutam
इन्द्रे॑ण॒ सं हि दृक्ष॑से संजग्मा॒नो अबि॑भ्युषा ।
म॒न्दू स॑मा॒नव॑र्चसा
indreṇa saṃ hi dṛkṣase saṃjagmāno abibhyuṣā |
mandū samānavarcasā
अ॒न॒व॒द्यैर॒भिद्यु॑भिर्म॒खः सह॑स्वदर्चति ।
ग॒णैरिन्द्र॑स्य॒ काम्यै॑ः
anavadyairabhidyubhirmakhaḥ sahasvadarcati |
gaṇairindrasya kāmyaiḥ
अत॑ः परिज्म॒न्ना ग॑हि दि॒वो वा॑ रोच॒नादधि॑ ।
सम॑स्मिन्नृञ्जते॒ गिर॑ः
ataḥ parijmannā gahi divo vā rocanādadhi |
samasminnṛñjate giraḥ
इ॒तो वा॑ सा॒तिमीम॑हे दि॒वो वा॒ पार्थि॑वा॒दधि॑ ।
इन्द्रं॑ म॒हो वा॒ रज॑सः
ito vā sātimīmahe divo vā pārthivādadhi |
indraṃ maho vā rajasaḥ
Text source: Wikisource · CC BY-SA 4.0 (Wikisource transcription of a public-domain text)