मत्स्यपा॑यि ते॒ मह॒ः पात्र॑स्येव हरिवो मत्स॒रो मद॑ः ।
वृषा॑ ते॒ वृष्ण॒ इन्दु॑र्वा॒जी स॑हस्र॒सात॑मः
matsyapāyi te mahaḥ pātrasyeva harivo matsaro madaḥ |
vṛṣā te vṛṣṇa indurvājī sahasrasātamaḥ
Mandala 1
Sukta 175: Indra drinks the gladdening Soma
Rishi: अगस्त्यो मैत्रावरुणिः · Devata: इन्द्रः · Metre: १ स्कंधोग्रीवी बृहती, २-५ अनुष्टुप्, ६ त्रिष्टुप्
6 verses · 175 of 191
What happens in this chapter
Indra drinks the gladdening Soma
Agastya Maitravaruni offers Soma to Indra in brihati, anushtubh and trishtubh. The gladdening drink has been drunk from the great vessel; it is a bull, a winner of thousands. Indra is the hero who drives Manu's chariot and burned the lawless Dasyu like a vessel in flame. He stole the sun's wheel and carried Kutsa against Shushna. The rishi praises Indra's rapture as the strongest, and asks him to be to the singers as water to a thirsty man, as he was to the poets of old.
आ न॑स्ते गन्तु मत्स॒रो वृषा॒ मदो॒ वरे॑ण्यः ।
स॒हावाँ॑ इन्द्र सान॒सिः पृ॑तना॒षाळम॑र्त्यः
ā naste gantu matsaro vṛṣā mado vareṇyaḥ |
sahāvām̐ indra sānasiḥ pṛtanāṣāḻamartyaḥ
त्वं हि शूर॒ः सनि॑ता चो॒दयो॒ मनु॑षो॒ रथ॑म् ।
स॒हावा॒न्दस्यु॑मव्र॒तमोष॒ः पात्रं॒ न शो॒चिषा॑
tvaṃ hi śūraḥ sanitā codayo manuṣo ratham |
sahāvāndasyumavratamoṣaḥ pātraṃ na śociṣā
मु॒षा॒य सूर्यं॑ कवे च॒क्रमीशा॑न॒ ओज॑सा ।
वह॒ शुष्णा॑य व॒धं कुत्सं॒ वात॒स्याश्वै॑ः
muṣāya sūryaṃ kave cakramīśāna ojasā |
vaha śuṣṇāya vadhaṃ kutsaṃ vātasyāśvaiḥ
शु॒ष्मिन्त॑मो॒ हि ते॒ मदो॑ द्यु॒म्निन्त॑म उ॒त क्रतु॑ः ।
वृ॒त्र॒घ्ना व॑रिवो॒विदा॑ मंसी॒ष्ठा अ॑श्व॒सात॑मः
śuṣmintamo hi te mado dyumnintama uta kratuḥ |
vṛtraghnā varivovidā maṃsīṣṭhā aśvasātamaḥ
यथा॒ पूर्वे॑भ्यो जरि॒तृभ्य॑ इन्द्र॒ मय॑ इ॒वापो॒ न तृष्य॑ते ब॒भूथ॑ ।
तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुम्
yathā pūrvebhyo jaritṛbhya indra maya ivāpo na tṛṣyate babhūtha |
tāmanu tvā nividaṃ johavīmi vidyāmeṣaṃ vṛjanaṃ jīradānum
Text source: Wikisource · CC BY-SA 4.0 (Wikisource transcription of a public-domain text)