Rishi: दीर्घतमा औचथ्यः · Devata: अश्विनौ · Metre: त्रिष्टुप्, ६ अनुष्टुप्
6 verses · 158 of 191
Here Dirghatamas speaks of his own trials to the Ashvins, in trishtubh with a closing anushtubh. He recalls how they set the winged Pajra ship for Tugra's son in mid-ocean, and asks that his praise guard him, son of Uchathya. He prays that the two birds not drain him and the tenfold-piled wood not burn him. The rivers did not swallow him when the dasas cast him in bound; when Traitana tried to split his head, the blow fell on his own chest and shoulders. Old in the tenth yuga, the rishi becomes the brahma, charioteer of the waters flowing to their goal.
वसू॑ रु॒द्रा पु॑रु॒मन्तू॑ वृ॒धन्ता॑ दश॒स्यतं॑ नो वृषणाव॒भिष्टौ॑ ।
दस्रा॑ ह॒ यद्रेक्ण॑ औच॒थ्यो वां॒ प्र यत्स॒स्राथे॒ अक॑वाभिरू॒ती
vasū rudrā purumantū vṛdhantā daśasyataṃ no vṛṣaṇāvabhiṣṭau |
dasrā ha yadrekṇa aucathyo vāṃ pra yatsasrāthe akavābhirūtī
को वां॑ दाशत्सुम॒तये॑ चिद॒स्यै वसू॒ यद्धेथे॒ नम॑सा प॒दे गोः ।
जि॒गृ॒तम॒स्मे रे॒वती॒ः पुरं॑धीः काम॒प्रेणे॑व॒ मन॑सा॒ चर॑न्ता
ko vāṃ dāśatsumataye cidasyai vasū yaddhethe namasā pade goḥ |
jigṛtamasme revatīḥ puraṃdhīḥ kāmapreṇeva manasā carantā
यु॒क्तो ह॒ यद्वां॑ तौ॒ग्र्याय॑ पे॒रुर्वि मध्ये॒ अर्ण॑सो॒ धायि॑ प॒ज्रः ।
उप॑ वा॒मव॑ः शर॒णं ग॑मेयं॒ शूरो॒ नाज्म॑ प॒तय॑द्भि॒रेवै॑ः
yukto ha yadvāṃ taugryāya perurvi madhye arṇaso dhāyi pajraḥ |
upa vāmavaḥ śaraṇaṃ gameyaṃ śūro nājma patayadbhirevaiḥ
उप॑स्तुतिरौच॒थ्यमु॑रुष्ये॒न्मा मामि॒मे प॑त॒त्रिणी॒ वि दु॑ग्धाम् ।
मा मामेधो॒ दश॑तयश्चि॒तो धा॒क्प्र यद्वां॑ ब॒द्धस्त्मनि॒ खाद॑ति॒ क्षाम्
upastutiraucathyamuruṣyenmā māmime patatriṇī vi dugdhām |
mā māmedho daśatayaścito dhākpra yadvāṃ baddhastmani khādati kṣām
न मा॑ गरन्न॒द्यो॑ मा॒तृत॑मा दा॒सा यदीं॒ सुस॑मुब्धम॒वाधु॑ः ।
शिरो॒ यद॑स्य त्रैत॒नो वि॒तक्ष॑त्स्व॒यं दा॒स उरो॒ अंसा॒वपि॑ ग्ध
na mā garannadyo mātṛtamā dāsā yadīṃ susamubdhamavādhuḥ |
śiro yadasya traitano vitakṣatsvayaṃ dāsa uro aṃsāvapi gdha
दी॒र्घत॑मा मामते॒यो जु॑जु॒र्वान्द॑श॒मे यु॒गे ।
अ॒पामर्थं॑ य॒तीनां॑ ब्र॒ह्मा भ॑वति॒ सार॑थिः
dīrghatamā māmateyo jujurvāndaśame yuge |
apāmarthaṃ yatīnāṃ brahmā bhavati sārathiḥ
Text source: Wikisource · CC BY-SA 4.0 (Wikisource transcription of a public-domain text)
