Rishi: परुच्छेपो दैवोदासिः · Devata: पूषा · Metre: अत्यष्टिः
4 verses · 138 of 191
The greatness of mighty Pushan is praised again and again, and his praise never flags. Paruchchhepa, in four atyashti verses, calls the goat-drawn god for friendship and help, the joy-giver who stirs every mind. As a camel carries across the desert, he carries us past our foes. Those who praised him before enjoyed his favour; the poet now asks for a fresh team of riches. Be unangry, Pushan, widely praised, and be our companion in every contest. I do not despise you, he says, and I do not deny your friendship.
प्रप्र॑ पू॒ष्णस्तु॑विजा॒तस्य॑ शस्यते महि॒त्वम॑स्य त॒वसो॒ न त॑न्दते स्तो॒त्रम॑स्य॒ न त॑न्दते ।
अर्चा॑मि सुम्न॒यन्न॒हमन्त्यू॑तिं मयो॒भुव॑म् ।
विश्व॑स्य॒ यो मन॑ आयुयु॒वे म॒खो दे॒व आ॑युयु॒वे म॒खः
prapra pūṣṇastuvijātasya śasyate mahitvamasya tavaso na tandate stotramasya na tandate |
arcāmi sumnayannahamantyūtiṃ mayobhuvam |
viśvasya yo mana āyuyuve makho deva āyuyuve makhaḥ
प्र हि त्वा॑ पूषन्नजि॒रं न याम॑नि॒ स्तोमे॑भिः कृ॒ण्व ऋ॒णवो॒ यथा॒ मृध॒ उष्ट्रो॒ न पी॑परो॒ मृध॑ः ।
हु॒वे यत्त्वा॑ मयो॒भुवं॑ दे॒वं स॒ख्याय॒ मर्त्य॑ः ।
अ॒स्माक॑माङ्गू॒षान्द्यु॒म्निन॑स्कृधि॒ वाजे॑षु द्यु॒म्निन॑स्कृधि
pra hi tvā pūṣannajiraṃ na yāmani stomebhiḥ kṛṇva ṛṇavo yathā mṛdha uṣṭro na pīparo mṛdhaḥ |
huve yattvā mayobhuvaṃ devaṃ sakhyāya martyaḥ |
asmākamāṅgūṣāndyumninaskṛdhi vājeṣu dyumninaskṛdhi
यस्य॑ ते पूषन्स॒ख्ये वि॑प॒न्यव॒ः क्रत्वा॑ चि॒त्सन्तोऽव॑सा बुभुज्रि॒र इति॒ क्रत्वा॑ बुभुज्रि॒रे ।
तामनु॑ त्वा॒ नवी॑यसीं नि॒युतं॑ रा॒य ई॑महे ।
अहे॑ळमान उरुशंस॒ सरी॑ भव॒ वाजे॑वाजे॒ सरी॑ भव
yasya te pūṣansakhye vipanyavaḥ kratvā citsanto'vasā bubhujrira iti kratvā bubhujrire |
tāmanu tvā navīyasīṃ niyutaṃ rāya īmahe |
aheḻamāna uruśaṃsa sarī bhava vājevāje sarī bhava
अ॒स्या ऊ॒ षु ण॒ उप॑ सा॒तये॑ भु॒वोऽहे॑ळमानो ररि॒वाँ अ॑जाश्व श्रवस्य॒ताम॑जाश्व ।
ओ षु त्वा॑ ववृतीमहि॒ स्तोमे॑भिर्दस्म सा॒धुभि॑ः ।
न॒हि त्वा॑ पूषन्नति॒मन्य॑ आघृणे॒ न ते॑ स॒ख्यम॑पह्नु॒वे
asyā ū ṣu ṇa upa sātaye bhuvo'heḻamāno rarivām̐ ajāśva śravasyatāmajāśva |
o ṣu tvā vavṛtīmahi stomebhirdasma sādhubhiḥ |
nahi tvā pūṣannatimanya āghṛṇe na te sakhyamapahnuve
Text source: Wikisource · CC BY-SA 4.0 (Wikisource transcription of a public-domain text)
