उ॒भे पु॑नामि॒ रोद॑सी ऋ॒तेन॒ द्रुहो॑ दहामि॒ सं म॒हीर॑नि॒न्द्राः ।
अ॒भि॒व्लग्य॒ यत्र॑ ह॒ता अ॒मित्रा॑ वैलस्था॒नं परि॑ तृ॒ळ्हा अशे॑रन्
ubhe punāmi rodasī ṛtena druho dahāmi saṃ mahīranindrāḥ |
abhivlagya yatra hatā amitrā vailasthānaṃ pari tṛḻhā aśeran
Mandala 1
Sukta 133: Indra crushes the sorceresses and rakshasas
Rishi: परुच्छेपो दैवोदासिः · Devata: इन्द्रः · Metre: १ त्रिष्टुप्, २-४ अनुष्टुप्, ५ गायत्री, ६ धृतिः, ७ अष्टिः
7 verses · 133 of 191
What happens in this chapter
Indra crushes the sorceresses and rakshasas
I purify both worlds with rita, says the singer, and burn up the great hostile powers that have no Indra. Paruchchhepa's sukta mixes trishtubh, anushtubh, gayatri, dhriti and ashti. He asks Indra to crush the heads of the sorceresses with his broad foot, to strike down their band in the pit where they lie, to grind the tawny-tusked pishachi and lay low every rakshas. Heaven burned with fear, he says, so hear us. The close praises the soma-presser: he wins a home, sacrifices away the hatred of the gods, and to him Indra gives abundant wealth.
अ॒भि॒व्लग्या॑ चिदद्रिवः शी॒र्षा या॑तु॒मती॑नाम् ।
छि॒न्धि व॑टू॒रिणा॑ प॒दा म॒हाव॑टूरिणा प॒दा
abhivlagyā cidadrivaḥ śīrṣā yātumatīnām |
chindhi vaṭūriṇā padā mahāvaṭūriṇā padā
अवा॑सां मघवञ्जहि॒ शर्धो॑ यातु॒मती॑नाम् ।
वै॒ल॒स्था॒न॒के अ॑र्म॒के म॒हावै॑लस्थे अर्म॒के
avāsāṃ maghavañjahi śardho yātumatīnām |
vailasthānake armake mahāvailasthe armake
यासां॑ ति॒स्रः प॑ञ्चा॒शतो॑ऽभिव्ल॒ङ्गैर॒पाव॑पः ।
तत्सु ते॑ मनायति त॒कत्सु ते॑ मनायति
yāsāṃ tisraḥ pañcāśato'bhivlaṅgairapāvapaḥ |
tatsu te manāyati takatsu te manāyati
पि॒शङ्ग॑भृष्टिमम्भृ॒णं पि॒शाचि॑मिन्द्र॒ सं मृ॑ण ।
सर्वं॒ रक्षो॒ नि ब॑र्हय
piśaṅgabhṛṣṭimambhṛṇaṃ piśācimindra saṃ mṛṇa |
sarvaṃ rakṣo ni barhaya
अ॒वर्म॒ह इ॑न्द्र दादृ॒हि श्रु॒धी न॑ः शु॒शोच॒ हि द्यौः क्षा न भी॒षाँ अ॑द्रिवो घृ॒णान्न भी॒षाँ अ॑द्रिवः ।
शु॒ष्मिन्त॑मो॒ हि शु॒ष्मिभि॑र्व॒धैरु॒ग्रेभि॒रीय॑से ।
अपू॑रुषघ्नो अप्रतीत शूर॒ सत्व॑भिस्त्रिस॒प्तैः शू॑र॒ सत्व॑भिः
avarmaha indra dādṛhi śrudhī naḥ śuśoca hi dyauḥ kṣā na bhīṣām̐ adrivo ghṛṇānna bhīṣām̐ adrivaḥ |
śuṣmintamo hi śuṣmibhirvadhairugrebhirīyase |
apūruṣaghno apratīta śūra satvabhistrisaptaiḥ śūra satvabhiḥ
व॒नोति॒ हि सु॒न्वन्क्षयं॒ परी॑णसः सुन्वा॒नो हि ष्मा॒ यज॒त्यव॒ द्विषो॑ दे॒वाना॒मव॒ द्विष॑ः ।
सु॒न्वा॒न इत्सि॑षासति स॒हस्रा॑ वा॒ज्यवृ॑तः ।
सु॒न्वा॒नायेन्द्रो॑ ददात्या॒भुवं॑ र॒यिं द॑दात्या॒भुव॑म्
vanoti hi sunvankṣayaṃ parīṇasaḥ sunvāno hi ṣmā yajatyava dviṣo devānāmava dviṣaḥ |
sunvāna itsiṣāsati sahasrā vājyavṛtaḥ |
sunvānāyendro dadātyābhuvaṃ rayiṃ dadātyābhuvam
Text source: Wikisource · CC BY-SA 4.0 (Wikisource transcription of a public-domain text)