Chapter 71: Taxing the realm like milking a cow

कथं राजा प्रजा रक्षन्नाधिबन्धेन युज्यते ।
धर्मे च नापराध्नोति तन्मे ब्रूहि पितामह

kathaṃ rājā prajā rakṣannādhibandhena yujyate |
dharme ca nāparādhnoti tanme brūhi pitāmaha

समासेनैव ते राजन्धर्मान्वक्ष्यामि शाश्वतान् ।
विस्तरेणैव धर्माणां न जात्वन्तमवाप्नुयात्

samāsenaiva te rājandharmānvakṣyāmi śāśvatān |
vistareṇaiva dharmāṇāṃ na jātvantamavāpnuyāt

धर्मनिष्ठाञ्श्रुतवतो देवव्रतसमाहितान् ।
अर्चितान्वासयेथास्त्वं गृहे गुणवतो द्विजान्

dharmaniṣṭhāñśrutavato devavratasamāhitān |
arcitānvāsayethāstvaṃ gṛhe guṇavato dvijān

प्रत्युत्थायोपसंगृह्य चरणावभिवाद्य च ।
अथ सर्वाणि कुर्वीथाः कार्याणि सपुरोहितः

pratyutthāyopasaṃgṛhya caraṇāvabhivādya ca |
atha sarvāṇi kurvīthāḥ kāryāṇi sapurohitaḥ

धर्मकार्याणि निर्वर्त्य मङ्गलानि प्रयुज्य च ।
ब्राह्मणान्वाचयेथास्त्वमर्थसिद्धिजयाशिषः

dharmakāryāṇi nirvartya maṅgalāni prayujya ca |
brāhmaṇānvācayethāstvamarthasiddhijayāśiṣaḥ

आर्जवेन च संपन्नो धृत्या बुद्ध्या च भारत ।
धर्मार्थौ प्रतिगृह्णीयात्कामक्रोधौ च वर्जयेत्

ārjavena ca saṃpanno dhṛtyā buddhyā ca bhārata |
dharmārthau pratigṛhṇīyātkāmakrodhau ca varjayet

कामक्रोधौ पुरस्कृत्य योऽर्थं राजाऽनुतिष्ठति ।
न स धर्मं न चाप्यर्थं प्रतिगृह्णाति बालिशः

kāmakrodhau puraskṛtya yo'rthaṃ rājā'nutiṣṭhati |
na sa dharmaṃ na cāpyarthaṃ pratigṛhṇāti bāliśaḥ

मा स्म लुब्धांश्च मूर्खांश्च कामार्थे च प्रयूयुजः ।
अलुब्धान्बुद्धिसंपन्नान्सर्वकर्मसु योजयेत्

mā sma lubdhāṃśca mūrkhāṃśca kāmārthe ca prayūyujaḥ |
alubdhānbuddhisaṃpannānsarvakarmasu yojayet

मूर्खो ह्यधिकृतोऽर्थेषु कार्याणामविशारदः ।
प्रजाः क्लिश्नात्ययोगेन कामक्रोधसमन्वितः

mūrkho hyadhikṛto'rtheṣu kāryāṇāmaviśāradaḥ |
prajāḥ kliśnātyayogena kāmakrodhasamanvitaḥ

बलिषष्ठेन शुल्केन दण्डेनाथापराधिनाम् ।
शास्त्रानीतेन लिप्सेथा वेतनेन धनागमम्

baliṣaṣṭhena śulkena daṇḍenāthāparādhinām |
śāstrānītena lipsethā vetanena dhanāgamam

दापयित्वा करं धर्म्यं राष्ट्रं नीत्या यथाविधि ।
तथैतं कल्पयेद्राजा योगक्षेममतन्द्रितः

dāpayitvā karaṃ dharmyaṃ rāṣṭraṃ nītyā yathāvidhi |
tathaitaṃ kalpayedrājā yogakṣemamatandritaḥ

गोपायितारं दातारं धर्मनित्यमतन्द्रितम् ।
अकामद्वेषसंयुक्तमनुरज्यन्ति मानवाः

gopāyitāraṃ dātāraṃ dharmanityamatandritam |
akāmadveṣasaṃyuktamanurajyanti mānavāḥ

तस्माद्धर्मेण लाभेन लिप्सेथास्त्वं धनागमम् ।
धर्मार्थावध्रुवौ तस्य यो न शास्त्रपरो भवेत्

tasmāddharmeṇa lābhena lipsethāstvaṃ dhanāgamam |
dharmārthāvadhruvau tasya yo na śāstraparo bhavet

अपशास्त्रधनो राजा संचयं नाधिगच्छति ।
अस्थाने चास्य तद्वित्तं सर्वमेव विनश्यति

apaśāstradhano rājā saṃcayaṃ nādhigacchati |
asthāne cāsya tadvittaṃ sarvameva vinaśyati

अर्थमूलोऽपि हिंसां च कुरुते स्वयमात्मनः ।
करैरशास्त्रदृष्टैर्हि मोहात्संपीडयन्प्रजाः

arthamūlo'pi hiṃsāṃ ca kurute svayamātmanaḥ |
karairaśāstradṛṣṭairhi mohātsaṃpīḍayanprajāḥ

ऊधश्छिन्द्यात्तु यो धेन्वाः क्षीरार्थी न लभेत्पयः ।
एवं राष्ट्रमयोगेन पीडितं न विवर्धते

ūdhaśchindyāttu yo dhenvāḥ kṣīrārthī na labhetpayaḥ |
evaṃ rāṣṭramayogena pīḍitaṃ na vivardhate

यवसोदकमादाय सान्त्वेन विनयेन च ।
यो हि दोग्ध्रीमुपास्ते च स नित्यं विन्दते पयः ।
एवं राष्ट्रमुपायेन भुञ्जानो लभते फलम्

yavasodakamādāya sāntvena vinayena ca |
yo hi dogdhrīmupāste ca sa nityaṃ vindate payaḥ |
evaṃ rāṣṭramupāyena bhuñjāno labhate phalam

अथ राष्ट्रमुपायेन भुज्यमानं सुरक्षितम् ।
जनयत्यतुलां नित्यं कोशवृद्धिं युधिष्ठिर

atha rāṣṭramupāyena bhujyamānaṃ surakṣitam |
janayatyatulāṃ nityaṃ kośavṛddhiṃ yudhiṣṭhira

दोग्ध्री धान्यं हिरण्यं च मही राजा सुरक्षिता ।
नित्यं स्वेभ्यः परेभ्यश्च तृप्ता माता यथा पयः

dogdhrī dhānyaṃ hiraṇyaṃ ca mahī rājā surakṣitā |
nityaṃ svebhyaḥ parebhyaśca tṛptā mātā yathā payaḥ

मालाकारोपमो राजन्भव माऽऽङ्गारिकोपमः ।
तथायुक्तश्चिरं राज्यं भोक्तुं शक्ष्यसि पालयन्

mālākāropamo rājanbhava mā''ṅgārikopamaḥ |
tathāyuktaściraṃ rājyaṃ bhoktuṃ śakṣyasi pālayan

परचक्राभियानेन यदि ते स्याद्धनक्षयः ।
अथ साम्नैव लिप्सेथा धनमब्राह्मणेषु यत्

paracakrābhiyānena yadi te syāddhanakṣayaḥ |
atha sāmnaiva lipsethā dhanamabrāhmaṇeṣu yat

मा स्म ते ब्राह्मणं दृष्ट्वा धनस्थं प्रचलेन्मनः ।
अन्त्यायामप्यवस्थायां किमु स्फीतस्य भारत

mā sma te brāhmaṇaṃ dṛṣṭvā dhanasthaṃ pracalenmanaḥ |
antyāyāmapyavasthāyāṃ kimu sphītasya bhārata

धनानि तेभ्यो दद्यास्त्वं यथाशक्ति यथार्हतः ।
सान्त्वयन्परिरक्षंश्च स्वर्गमाप्स्यसि दुर्जयम्

dhanāni tebhyo dadyāstvaṃ yathāśakti yathārhataḥ |
sāntvayanparirakṣaṃśca svargamāpsyasi durjayam

एवं धर्म्येण वृत्तेन प्रजास्त्वं परिपालय ।
स्वर्ग्यं पुण्यं यशो नित्यं प्राप्स्यसे कुरुनन्दन

evaṃ dharmyeṇa vṛttena prajāstvaṃ paripālaya |
svargyaṃ puṇyaṃ yaśo nityaṃ prāpsyase kurunandana

धर्मेण व्यवहारेण प्रजाः पालय पाण्डव ।
युधिष्ठिर यथायुक्तो नाधिबन्धेन योक्ष्यसे

dharmeṇa vyavahāreṇa prajāḥ pālaya pāṇḍava |
yudhiṣṭhira yathāyukto nādhibandhena yokṣyase

एष एव परो धर्मो यद्राजा रक्षति प्रजाः ।
भूतानां हि यदा धर्मो रक्षणं परमा दया

eṣa eva paro dharmo yadrājā rakṣati prajāḥ |
bhūtānāṃ hi yadā dharmo rakṣaṇaṃ paramā dayā

तस्मादेवं परं धर्मं मन्यन्ते धर्मकोविदाः ।
यो राजा रक्षणे युक्तो भूतेषु कुरुते दयाम्

tasmādevaṃ paraṃ dharmaṃ manyante dharmakovidāḥ |
yo rājā rakṣaṇe yukto bhūteṣu kurute dayām

यदह्ना कुरुते पापमरक्षन्भयतः प्रजाः ।
राजा वर्षसहस्रेण तस्यान्तमधिगच्छति

yadahnā kurute pāpamarakṣanbhayataḥ prajāḥ |
rājā varṣasahasreṇa tasyāntamadhigacchati

यदह्ना कुरुते धर्मं प्रजा धर्मेण पालयन् ।
दशवर्षसहस्राणि तस्य भुङ्क्ते फलं दिवि

yadahnā kurute dharmaṃ prajā dharmeṇa pālayan |
daśavarṣasahasrāṇi tasya bhuṅkte phalaṃ divi

स्विष्टिः स्वधीतिः सुतपा लोकाञ्जयति यावतः ।
क्षणेन तानवाप्नोति प्रजा धर्मेण पालयन्

sviṣṭiḥ svadhītiḥ sutapā lokāñjayati yāvataḥ |
kṣaṇena tānavāpnoti prajā dharmeṇa pālayan

एवं धर्मं प्रयत्नेन कौन्तेय परिपालय ।
ततः पुण्यफलं लब्ध्वा नानुबन्धेन योक्ष्यसे

evaṃ dharmaṃ prayatnena kaunteya paripālaya |
tataḥ puṇyaphalaṃ labdhvā nānubandhena yokṣyase

स्वर्गलोके सुमहतीं श्रियं प्राप्स्यसि पाण्डव ।
असंभवश्च धर्माणामीदृशानामराजसु

svargaloke sumahatīṃ śriyaṃ prāpsyasi pāṇḍava |
asaṃbhavaśca dharmāṇāmīdṛśānāmarājasu

तस्माद्राजैव नान्योऽस्ति यो धर्मफलमाप्नुयात् ।
स राज्यं धृतिमान्प्राप्य धर्मेण परिपालय ।
इन्द्रं तर्पय सोमेन कामैश्च सुहृदो जनान्

tasmādrājaiva nānyo'sti yo dharmaphalamāpnuyāt |
sa rājyaṃ dhṛtimānprāpya dharmeṇa paripālaya |
indraṃ tarpaya somena kāmaiśca suhṛdo janān