Chapter 46: Bhishma's Stavaraja, the king of hymns

शरतल्पे शयानस्तु भरतानां पितामहः ।
कथमुत्सृष्टवान्देहं कं च योगमधारयत्

śaratalpe śayānastu bharatānāṃ pitāmahaḥ |
kathamutsṛṣṭavāndehaṃ kaṃ ca yogamadhārayat

शृणुष्वावहितो राजञ्शुचिर्भूत्वा समाहितः ।
भीष्मस्य कुरुशार्दूल देहोत्सर्गं महात्मनः

śṛṇuṣvāvahito rājañśucirbhūtvā samāhitaḥ |
bhīṣmasya kuruśārdūla dehotsargaṃ mahātmanaḥ

प्रवृत्तमात्रे त्वयनमुत्तरेण दिवाकरे ।
शुक्लपक्षस्य चाष्टभ्यां माघमासस्य पार्थिव

pravṛttamātre tvayanamuttareṇa divākare |
śuklapakṣasya cāṣṭabhyāṃ māghamāsasya pārthiva

प्राजापत्ये च नक्षत्रे मध्यं प्राप्ते दिवाकरे ।
समावेशयदात्मानमात्मत्येव समाहितः

prājāpatye ca nakṣatre madhyaṃ prāpte divākare |
samāveśayadātmānamātmatyeva samāhitaḥ

विकीर्णांशुरिवादित्यो भीष्मः शरशतैश्चितः ।
शुशुभे परया लक्ष्म्या वृतो ब्राह्मणसत्तमैः

vikīrṇāṃśurivādityo bhīṣmaḥ śaraśataiścitaḥ |
śuśubhe parayā lakṣmyā vṛto brāhmaṇasattamaiḥ

व्यासेन देवश्रवसा नारदेन सुरर्षिणा ।
देवस्थानेन वात्स्येन तथाऽश्मकसुमन्तुना

vyāsena devaśravasā nāradena surarṣiṇā |
devasthānena vātsyena tathā'śmakasumantunā

तथा जैमिनिना चैव पैलेन च महात्मना ।
शाण्डिल्यदेवलाभ्यां च मैत्रेयेण च धीमता

tathā jaimininā caiva pailena ca mahātmanā |
śāṇḍilyadevalābhyāṃ ca maitreyeṇa ca dhīmatā

असितेन वसिष्ठेन कौशिकेन महात्मना ।
हारितलोमशाभ्यां च तथाऽऽत्रेयेण धीमता

asitena vasiṣṭhena kauśikena mahātmanā |
hāritalomaśābhyāṃ ca tathā''treyeṇa dhīmatā

[बृहस्पतिश्च शुक्रश्च च्यवनश्च महामुनिः ।
सनत्कुमारः कपिलो चाल्मीकिस्तुम्बुरुः कुरुः

[bṛhaspatiśca śukraśca cyavanaśca mahāmuniḥ |
sanatkumāraḥ kapilo cālmīkistumburuḥ kuruḥ

मौद्गल्यो भार्गवो रामस्तृणबिन्दुर्महामुनिः ।
पिप्पलादोऽथ वायुश्च सवर्तः पुलहः कचः

maudgalyo bhārgavo rāmastṛṇabindurmahāmuniḥ |
pippalādo'tha vāyuśca savartaḥ pulahaḥ kacaḥ

काश्यपश्च पुलस्त्यश्च क्रतुर्दक्षः पराशरः ।
मरीचिरङ्गिराः काश्यो गौतमो गालवो मुनिः

kāśyapaśca pulastyaśca kraturdakṣaḥ parāśaraḥ |
marīciraṅgirāḥ kāśyo gautamo gālavo muniḥ

धौम्यो विभाण्डो माण्डव्योधौम्रः कृष्णानुभौतिकः ।
उलूकः परमो विप्रो मार्कण्डेयो महामुनिः ।
भास्करिः पूरणः कृष्णः सूतः परमधार्मिकः

dhaumyo vibhāṇḍo māṇḍavyodhaumraḥ kṛṣṇānubhautikaḥ |
ulūkaḥ paramo vipro mārkaṇḍeyo mahāmuniḥ |
bhāskariḥ pūraṇaḥ kṛṣṇaḥ sūtaḥ paramadhārmikaḥ

एतैश्चान्यैर्मुनिगणैर्महाभागैर्महात्मभिः ।
श्रद्धादमशमोपेतैर्वृतश्चन्द्र इव ग्रहैः

etaiścānyairmunigaṇairmahābhāgairmahātmabhiḥ |
śraddhādamaśamopetairvṛtaścandra iva grahaiḥ

भीष्मस्तु पुरुषव्याघ्रः कर्मणा मनसा गिरा ।
शरतल्पगतः कृष्णं प्रदध्यौ प्राञ्जलिः शुचिः

bhīṣmastu puruṣavyāghraḥ karmaṇā manasā girā |
śaratalpagataḥ kṛṣṇaṃ pradadhyau prāñjaliḥ śuciḥ

स्वरेण हृष्टपुष्टेन तुष्टाव मधुसूदनम् ।
योगेश्वरं पझनाभं विष्णुं जिष्णुं जगत्पतिम् ।
अनादिनिधनं विष्णुमात्मयोनिं सनातनम्

svareṇa hṛṣṭapuṣṭena tuṣṭāva madhusūdanam |
yogeśvaraṃ pajhanābhaṃ viṣṇuṃ jiṣṇuṃ jagatpatim |
anādinidhanaṃ viṣṇumātmayoniṃ sanātanam

कृताञ्जलिपुटो भूत्वा वाग्विदां प्रवरः प्रभुः ॥
भीष्मः परमधर्मात्मा वासुदेवमथास्तुवत्

kṛtāñjalipuṭo bhūtvā vāgvidāṃ pravaraḥ prabhuḥ ||
bhīṣmaḥ paramadharmātmā vāsudevamathāstuvat

आरिराधयिषुः कृष्णं वाचं जिगदिषामि याम् ।
तया व्याससमासिन्या प्रीयतां पुरुषोत्तमः

ārirādhayiṣuḥ kṛṣṇaṃ vācaṃ jigadiṣāmi yām |
tayā vyāsasamāsinyā prīyatāṃ puruṣottamaḥ

शुचिं शुचिपदं हंसं तत्परं परमेष्ठिनम् ।
युक्त्वा सर्वात्मनाऽऽत्मानं तं प्रपद्ये प्रजापतिम्

śuciṃ śucipadaṃ haṃsaṃ tatparaṃ parameṣṭhinam |
yuktvā sarvātmanā''tmānaṃ taṃ prapadye prajāpatim

अनाद्यन्तं परं ब्रह्म न देवा नर्षयो विदुः ।
एकोऽयं वेद भगवान्धाता नारायणो हरिः

anādyantaṃ paraṃ brahma na devā narṣayo viduḥ |
eko'yaṃ veda bhagavāndhātā nārāyaṇo hariḥ

नारायणादृषिगणास्तथा सिद्धमहोरगाः ।
देवा देवर्षयश्चैव यं विदुर्दुःखभेषजम्

nārāyaṇādṛṣigaṇāstathā siddhamahoragāḥ |
devā devarṣayaścaiva yaṃ vidurduḥkhabheṣajam

देवदानवगन्धर्वा यक्षराक्षसपन्नगाः ।
यं न जानन्ति को ह्येष कुतो वा भगवानिति

devadānavagandharvā yakṣarākṣasapannagāḥ |
yaṃ na jānanti ko hyeṣa kuto vā bhagavāniti

यमाहुर्जगतः कोशं यस्मिंश्च निहिताः प्रजाः ।
यस्मिँल्लोकाः स्फुरन्त्येते जाले शकुनयो यथा

yamāhurjagataḥ kośaṃ yasmiṃśca nihitāḥ prajāḥ |
yasmim̐llokāḥ sphurantyete jāle śakunayo yathā

यस्मिन्विश्वानि भूतानि तिष्ठन्ति च विशन्ति च ।
गुणभूतानि भूतेशे सूत्रे मणिगणा इव

yasminviśvāni bhūtāni tiṣṭhanti ca viśanti ca |
guṇabhūtāni bhūteśe sūtre maṇigaṇā iva

यं च विश्वस्य कर्तारं जगतस्तस्थुषां पतिम्
वदन्ति जगतोऽध्यक्षमध्यात्मपरिचिन्तकाः

yaṃ ca viśvasya kartāraṃ jagatastasthuṣāṃ patim
vadanti jagato'dhyakṣamadhyātmaparicintakāḥ

यस्मिन्नित्ये तते तन्तौ दृढे स्रगिव तिष्ठति ।
सदसद्ग्रथितं विश्वं विश्वाङ्गे विश्वकर्मणि

yasminnitye tate tantau dṛḍhe sragiva tiṣṭhati |
sadasadgrathitaṃ viśvaṃ viśvāṅge viśvakarmaṇi

हरिं सहस्रशिरसं सहस्रचरणेक्षणम् ।
सहस्रबाहुमकुटं सहस्रवदनोज्ज्वलम्

hariṃ sahasraśirasaṃ sahasracaraṇekṣaṇam |
sahasrabāhumakuṭaṃ sahasravadanojjvalam

प्राहुर्नारायणं देवं यं विश्वस्य परायणम् ।
अणीयसामणीयांसं स्थविष्ठं च स्थवीयसाम् ।
गरीयसां गरिष्ठं च श्रेष्ठं च श्रेयसामपि

prāhurnārāyaṇaṃ devaṃ yaṃ viśvasya parāyaṇam |
aṇīyasāmaṇīyāṃsaṃ sthaviṣṭhaṃ ca sthavīyasām |
garīyasāṃ gariṣṭhaṃ ca śreṣṭhaṃ ca śreyasāmapi

चं वाकेष्वनुवाकेषु निषत्सूपनिषत्सु च ।
गृणन्ति सत्यकर्माणं सत्यं सत्येषु सामसु

caṃ vākeṣvanuvākeṣu niṣatsūpaniṣatsu ca |
gṛṇanti satyakarmāṇaṃ satyaṃ satyeṣu sāmasu

चतुर्भिश्चतुरात्मानं सत्वस्थं सात्वतां पतिम् ।
यं दिव्यैर्देवमर्चन्ति गुह्यैः परमनामभिः

caturbhiścaturātmānaṃ satvasthaṃ sātvatāṃ patim |
yaṃ divyairdevamarcanti guhyaiḥ paramanāmabhiḥ

[यस्मिन्नित्यं तपस्तप्तं यदङ्गेष्वनुतिष्ठति ।
सर्वात्मा सर्ववित्सर्वः सर्वज्ञः सर्वभावनः ॥ ]

[yasminnityaṃ tapastaptaṃ yadaṅgeṣvanutiṣṭhati |
sarvātmā sarvavitsarvaḥ sarvajñaḥ sarvabhāvanaḥ || ]

यं देवं देवकी देवी वसुदेवादजीजनत् ।
भौमस्य ब्रह्मणो गुप्त्यै दीप्तमग्निमिवारणिः

yaṃ devaṃ devakī devī vasudevādajījanat |
bhaumasya brahmaṇo guptyai dīptamagnimivāraṇiḥ

यमनन्यो व्यपेताशीरात्मानं वीतकल्मषम् ।
इष्ट्वानन्त्याय गोविन्दं पश्यत्यात्मानमात्मनि

yamananyo vyapetāśīrātmānaṃ vītakalmaṣam |
iṣṭvānantyāya govindaṃ paśyatyātmānamātmani

अप्रतर्क्यमविज्ञेयं हरिं नारायणं विभुम् ।
अतिवाय्विन्द्रकर्माणमतिसूर्याग्नितेजसम् ।
अतिबुद्धीन्द्रियात्मानं तं प्रपद्ये प्रजापतिम्

apratarkyamavijñeyaṃ hariṃ nārāyaṇaṃ vibhum |
ativāyvindrakarmāṇamatisūryāgnitejasam |
atibuddhīndriyātmānaṃ taṃ prapadye prajāpatim

पुराणे पुरुषं प्रोक्तं ब्रह्मप्रोक्तं युगादिषु ।
क्षये संकर्षणं प्रोक्तं तमुपास्यमुपास्महे

purāṇe puruṣaṃ proktaṃ brahmaproktaṃ yugādiṣu |
kṣaye saṃkarṣaṇaṃ proktaṃ tamupāsyamupāsmahe

यमेकं बहुधात्मानं प्रादुर्भूतमधोक्षजम् ।
नान्यभक्ताः क्रियावन्तो यजन्ते सर्वकामदम्

yamekaṃ bahudhātmānaṃ prādurbhūtamadhokṣajam |
nānyabhaktāḥ kriyāvanto yajante sarvakāmadam

ऋतमेकाक्षरं ब्रह्म यत्तत्सदसतः परम् ।
अनादिमध्यपर्यन्तं न देवा नर्षयो विदुः

ṛtamekākṣaraṃ brahma yattatsadasataḥ param |
anādimadhyaparyantaṃ na devā narṣayo viduḥ

यं सुरासुरगन्धर्वाः सिद्धा ऋषिमहोरगाः ।
प्रयता नित्यमर्चन्ति परमं सुखभेषजम्

yaṃ surāsuragandharvāḥ siddhā ṛṣimahoragāḥ |
prayatā nityamarcanti paramaṃ sukhabheṣajam

अनादिनिधनं देवमात्मयोनिं सनातनम् ।
अप्रेक्ष्यमनभिज्ञेयं हरिं नारायणं प्रभुम्

anādinidhanaṃ devamātmayoniṃ sanātanam |
aprekṣyamanabhijñeyaṃ hariṃ nārāyaṇaṃ prabhum

हिरण्यवर्णं यं गर्भमदितिर्दैत्यनाशनम् ।
एकं द्वादशधा जज्ञे तस्मै सूर्यात्मने नमः

hiraṇyavarṇaṃ yaṃ garbhamaditirdaityanāśanam |
ekaṃ dvādaśadhā jajñe tasmai sūryātmane namaḥ

शुक्ले देवान्पितॄन्कृष्णे तर्पयत्यमृतेन यः ।
यश्च राजा द्विजातीनां तस्मै सोमात्मने नमः

śukle devānpitṝnkṛṣṇe tarpayatyamṛtena yaḥ |
yaśca rājā dvijātīnāṃ tasmai somātmane namaḥ

हुताशनमुखैर्देवैर्धार्यते सकलं जगत् ।
हविः प्रथमभोक्ता यस्तस्मै होत्रात्मने नमः

hutāśanamukhairdevairdhāryate sakalaṃ jagat |
haviḥ prathamabhoktā yastasmai hotrātmane namaḥ

महतस्तमसः पारे पुरुषं ह्यतितेजसम् ।
यं ज्ञात्वा मृत्युमत्येति तस्मै ज्ञेयात्मने नमः

mahatastamasaḥ pāre puruṣaṃ hyatitejasam |
yaṃ jñātvā mṛtyumatyeti tasmai jñeyātmane namaḥ

यं बृहन्तं बृहत्युक्थे यमग्नौ यं महाध्वरे ।
यं विप्रसङ्घा गायन्ति तस्मै वेदात्मने नमः

yaṃ bṛhantaṃ bṛhatyukthe yamagnau yaṃ mahādhvare |
yaṃ viprasaṅghā gāyanti tasmai vedātmane namaḥ

पादाङ्गं संधिपर्वाणं स्वरव्यञ्जनभूषितम् ।
यमाहुरक्षरं विप्रास्तस्मै वागात्मने नमः

pādāṅgaṃ saṃdhiparvāṇaṃ svaravyañjanabhūṣitam |
yamāhurakṣaraṃ viprāstasmai vāgātmane namaḥ

[यज्ञाङ्गो यो वराहो वै भूत्वा गामुज्जहारह ।
लोकत्रयहितार्थाय तस्मै वीर्यात्मने नमः ॥]

[yajñāṅgo yo varāho vai bhūtvā gāmujjahāraha |
lokatrayahitārthāya tasmai vīryātmane namaḥ ||]

ऋग्यजुःसामधामानं दशार्धहविराकृतिम् ।
यं सप्ततन्तुं तन्वन्ति तस्मै यज्ञात्मने नमः

ṛgyajuḥsāmadhāmānaṃ daśārdhahavirākṛtim |
yaṃ saptatantuṃ tanvanti tasmai yajñātmane namaḥ

[चतुर्भिश्च चतुर्भिश्च द्वाभ्यां पञ्चभिरेव च ।
हूयते च पुनर्द्वाभ्यां तस्मै होमात्मने नमः ॥]

[caturbhiśca caturbhiśca dvābhyāṃ pañcabhireva ca |
hūyate ca punardvābhyāṃ tasmai homātmane namaḥ ||]

यः सुपर्णो यजुर्नाम च्छन्दोगात्रस्त्रिवृच्छिराः ।
रथन्तरबृहत्पक्षस्तस्मै स्तोत्रात्मने नमः

yaḥ suparṇo yajurnāma cchandogātrastrivṛcchirāḥ |
rathantarabṛhatpakṣastasmai stotrātmane namaḥ

यः सहस्रसवे सत्रे जज्ञे विश्वसृजामृषिः ।
हिरण्यपक्षः शकुनिस्तस्मै तार्क्ष्यात्मने नमः

yaḥ sahasrasave satre jajñe viśvasṛjāmṛṣiḥ |
hiraṇyapakṣaḥ śakunistasmai tārkṣyātmane namaḥ

यश्चिनोति सतां सेतुमृतेनामृतयोनिना ।
धर्मार्थव्यवहाराङ्गैस्तस्मै सत्यात्मने नमः

yaścinoti satāṃ setumṛtenāmṛtayoninā |
dharmārthavyavahārāṅgaistasmai satyātmane namaḥ

यं पृथग्धर्मचरणाः पृथग्धर्मफलैषिणः ।
पृथग्धर्मैः समर्चन्ति तस्मै धर्मात्मने नमः

yaṃ pṛthagdharmacaraṇāḥ pṛthagdharmaphalaiṣiṇaḥ |
pṛthagdharmaiḥ samarcanti tasmai dharmātmane namaḥ

[यतः सर्वे प्रसूयन्ते ह्यनङ्गात्माङ्गदेहिनः ।
उन्मादः सर्वभूतानां तस्मै कामात्मने नमः ॥]

[yataḥ sarve prasūyante hyanaṅgātmāṅgadehinaḥ |
unmādaḥ sarvabhūtānāṃ tasmai kāmātmane namaḥ ||]

यं तं व्यक्तस्थमव्यक्तं विचिन्वन्ति महर्षयः ।
क्षेत्रे क्षेत्रज्ञमासीनं तस्मै क्षेत्रात्मने नमः

yaṃ taṃ vyaktasthamavyaktaṃ vicinvanti maharṣayaḥ |
kṣetre kṣetrajñamāsīnaṃ tasmai kṣetrātmane namaḥ

यं दृगात्मानमात्मस्थं वृतं षोडशभिर्गुणैः ।
प्राहुः सप्तदशंसाङ्ख्यास्तस्मै साङ्ख्यात्मने नमः

yaṃ dṛgātmānamātmasthaṃ vṛtaṃ ṣoḍaśabhirguṇaiḥ |
prāhuḥ saptadaśaṃsāṅkhyāstasmai sāṅkhyātmane namaḥ

यं विनिद्रा जितश्वासाः संतुष्टाः संयतेन्द्रियाः ।
ज्योतिः पश्यन्ति युञ्जानास्तस्मै योगात्मेन नमः

yaṃ vinidrā jitaśvāsāḥ saṃtuṣṭāḥ saṃyatendriyāḥ |
jyotiḥ paśyanti yuñjānāstasmai yogātmena namaḥ

अपुण्यपुण्योपरमे यं पुनर्भवनिर्भयाः ।
शान्ताः संन्यासिनो यान्ति तस्मै मोक्षात्मने नमः

apuṇyapuṇyoparame yaṃ punarbhavanirbhayāḥ |
śāntāḥ saṃnyāsino yānti tasmai mokṣātmane namaḥ

यस्याग्रिरास्यं द्यौर्मूर्धा खं नाभिश्चरणौ क्षितिः ।
सूर्यश्चक्षुर्दिशः श्रोत्रं तस्मै लोकात्मने नमः

yasyāgrirāsyaṃ dyaurmūrdhā khaṃ nābhiścaraṇau kṣitiḥ |
sūryaścakṣurdiśaḥ śrotraṃ tasmai lokātmane namaḥ

युगेष्वावर्तते योंऽशैर्मासर्त्वयनहायनैः ।
सर्गप्रलययोः कर्ता तस्मै कालात्मने नमः

yugeṣvāvartate yoṃ'śairmāsartvayanahāyanaiḥ |
sargapralayayoḥ kartā tasmai kālātmane namaḥ

योऽसौ युगसहस्रान्ते प्रदीप्तार्चिर्विभावसुः ।
संभक्षयति भूतानि तस्मै घोरात्मने नमः

yo'sau yugasahasrānte pradīptārcirvibhāvasuḥ |
saṃbhakṣayati bhūtāni tasmai ghorātmane namaḥ

संभक्ष्य सर्वभूतानि कृत्वा चैकार्णवं जगत् ।
बालः स्वपिति यश्चैकस्तस्मै मायात्मने नमः

saṃbhakṣya sarvabhūtāni kṛtvā caikārṇavaṃ jagat |
bālaḥ svapiti yaścaikastasmai māyātmane namaḥ

सहस्रशिरसे तस्मै पुरुषायामितात्मने ।
चतुःसमुद्रपयसि योगनिद्रात्मने नमः

sahasraśirase tasmai puruṣāyāmitātmane |
catuḥsamudrapayasi yoganidrātmane namaḥ

अजस्य नाभावध्येकं यस्मिन्विश्वं प्रतिष्ठितम् ।
पुष्करं पुष्कराक्षस्य तस्मै पझात्मने नमः

ajasya nābhāvadhyekaṃ yasminviśvaṃ pratiṣṭhitam |
puṣkaraṃ puṣkarākṣasya tasmai pajhātmane namaḥ

यस्य केशेषु जीमूता नद्यः सर्वाङ्गसंधिषु ।
कुक्षौ समुद्राश्चत्वारस्तस्मै तोयात्मने नमः

yasya keśeṣu jīmūtā nadyaḥ sarvāṅgasaṃdhiṣu |
kukṣau samudrāścatvārastasmai toyātmane namaḥ

यस्मात्सर्गाः प्रवर्तन्ते सर्गप्रलयविक्रियाः ।
यस्मिंश्चैव प्रलीयन्ते तस्मै हेत्वात्मने नमः

yasmātsargāḥ pravartante sargapralayavikriyāḥ |
yasmiṃścaiva pralīyante tasmai hetvātmane namaḥ

[यो निषण्णो भवेद्रात्रौ दिवा भवति विष्ठितः ।
इष्टानिष्टस्य च द्रष्टा तस्मै द्रष्ट्रात्मने नमः ॥]

[yo niṣaṇṇo bhavedrātrau divā bhavati viṣṭhitaḥ |
iṣṭāniṣṭasya ca draṣṭā tasmai draṣṭrātmane namaḥ ||]

अकार्यः सर्वकार्येषु धर्मकार्यार्थमुद्यतः ।
वैकुण्ठस्य हि तद्रूपं तस्मै कार्यात्मने नमः

akāryaḥ sarvakāryeṣu dharmakāryārthamudyataḥ |
vaikuṇṭhasya hi tadrūpaṃ tasmai kāryātmane namaḥ

ब्रह्म वक्तं भुजौ क्षत्रं कृत्स्नमूरूदरं विशः ।
पादौ यस्याश्रिताः शूद्रास्तस्मैवर्णात्मने नमः

brahma vaktaṃ bhujau kṣatraṃ kṛtsnamūrūdaraṃ viśaḥ |
pādau yasyāśritāḥ śūdrāstasmaivarṇātmane namaḥ

अन्नपानेन्धनमयो रसप्राणविवर्धनः ।
यो धारयति भूतानि तस्मै प्राणात्मने नमः

annapānendhanamayo rasaprāṇavivardhanaḥ |
yo dhārayati bhūtāni tasmai prāṇātmane namaḥ

[प्राणानां धारणार्थाय योऽन्नं भुङ्क्ते चतुर्विधम् ।
अन्तर्भूतः पचत्यग्निस्तस्मै पाकात्मने नमः ॥ ]

[prāṇānāṃ dhāraṇārthāya yo'nnaṃ bhuṅkte caturvidham |
antarbhūtaḥ pacatyagnistasmai pākātmane namaḥ || ]

विषये वर्तमानानां यं तं वैषयिकैर्गुणैः ।
प्राहुर्विषयगोप्तारं तस्मै गोप्त्रात्मने नमः

viṣaye vartamānānāṃ yaṃ taṃ vaiṣayikairguṇaiḥ |
prāhurviṣayagoptāraṃ tasmai goptrātmane namaḥ

अप्रमेयशरीराय सर्वतो बुद्धिचक्षुषे ।
अपारपरिमाणाय तस्मै दिव्यात्मने नमः

aprameyaśarīrāya sarvato buddhicakṣuṣe |
apāraparimāṇāya tasmai divyātmane namaḥ

परः कालात्परो यज्ञात्परः सदसतश्च यः ।
अनादिरादिर्विश्वस्य तस्मै विश्वात्मने नमः

paraḥ kālātparo yajñātparaḥ sadasataśca yaḥ |
anādirādirviśvasya tasmai viśvātmane namaḥ

वैद्युतो जाठरश्चैव पावकः शुचिरेव च ।
दहनः सर्वभक्षाणां तस्मै वह्न्यात्मने नमः

vaidyuto jāṭharaścaiva pāvakaḥ śucireva ca |
dahanaḥ sarvabhakṣāṇāṃ tasmai vahnyātmane namaḥ

रसातलगतः श्रीमार्ननन्तो भगवान्प्रभुः ।
जगद्धारयते योऽसौ तस्मै शेषात्मने नमः

rasātalagataḥ śrīmārnananto bhagavānprabhuḥ |
jagaddhārayate yo'sau tasmai śeṣātmane namaḥ

ज्वलनार्केन्दुताराणां ज्योतिषां दिव्यमूर्तिनाम् ।
यस्तेजयति तेजांसि तस्मै तेजात्मने नमः

jvalanārkendutārāṇāṃ jyotiṣāṃ divyamūrtinām |
yastejayati tejāṃsi tasmai tejātmane namaḥ

आत्मज्ञानमिदं ज्ञानं ज्ञात्वा पञ्चस्ववस्थितम् ।
यं ज्ञानेनाधिगच्छन्ति तस्मै ज्ञानात्मने नमः

ātmajñānamidaṃ jñānaṃ jñātvā pañcasvavasthitam |
yaṃ jñānenādhigacchanti tasmai jñānātmane namaḥ

साङ्ख्यैर्योगैर्विनिश्चित्य साध्यैश्च परमर्षिभिः ।
यस्य तु ज्ञायते तत्वं तस्मै गुह्यात्मने नमः

sāṅkhyairyogairviniścitya sādhyaiśca paramarṣibhiḥ |
yasya tu jñāyate tatvaṃ tasmai guhyātmane namaḥ

जटिने दण्डिने नित्यं लम्बोदरशरीरिणे ।
कमण्डलुनिषङ्गाय तस्मै ब्रह्मात्मने नमः

jaṭine daṇḍine nityaṃ lambodaraśarīriṇe |
kamaṇḍaluniṣaṅgāya tasmai brahmātmane namaḥ

[शूलिने त्रिदशेशाय त्र्यम्बकाय महात्मने ।
भस्मदिग्धोर्ध्वलिङ्गाय तस्मा रुद्रात्मने नमः

[śūline tridaśeśāya tryambakāya mahātmane |
bhasmadigdhordhvaliṅgāya tasmā rudrātmane namaḥ

चन्द्रार्धकृतशीर्षाय व्यालयज्ञोपवीतिने ।
पिनाकशूलहस्ताय तस्मै उग्रात्मने नमः ॥]

candrārdhakṛtaśīrṣāya vyālayajñopavītine |
pinākaśūlahastāya tasmai ugrātmane namaḥ ||]

यो जातो वसुदेवेन देवक्यां यदुनन्दनः ।
शङ्खचक्रगदापाणिर्वासुदेवात्मने नमः

yo jāto vasudevena devakyāṃ yadunandanaḥ |
śaṅkhacakragadāpāṇirvāsudevātmane namaḥ

शिरःकपालमालाय व्याघ्रचर्मनिवासिने ।
भस्मदिग्धशरीराय तस्मै रुद्रात्मने नमः

śiraḥkapālamālāya vyāghracarmanivāsine |
bhasmadigdhaśarīrāya tasmai rudrātmane namaḥ

यो मोहयति भूतानि सर्वपाशानुबन्धनैः ।
सर्वस्य रक्षणार्थाय तस्मै मोहात्मने नमः

yo mohayati bhūtāni sarvapāśānubandhanaiḥ |
sarvasya rakṣaṇārthāya tasmai mohātmane namaḥ

चैतन्यं सर्वतो नित्यं सर्वप्राणिहृदि स्थितम् ।
सर्वातीततरं सूक्ष्मं तस्मै सूक्ष्मात्मने नमः

caitanyaṃ sarvato nityaṃ sarvaprāṇihṛdi sthitam |
sarvātītataraṃ sūkṣmaṃ tasmai sūkṣmātmane namaḥ

पञ्चभूतात्मभूताय भूतादिनिधनाय च ।
अक्रोधद्रोहमोहाय तस्मै शान्तात्मने नमः

pañcabhūtātmabhūtāya bhūtādinidhanāya ca |
akrodhadrohamohāya tasmai śāntātmane namaḥ

यस्मिन्सर्वं यतः सर्वं यः सर्वं सर्वतश्च यः ।
यश्च सर्वमयो देवस्तस्मै सर्वात्मने नमः

yasminsarvaṃ yataḥ sarvaṃ yaḥ sarvaṃ sarvataśca yaḥ |
yaśca sarvamayo devastasmai sarvātmane namaḥ

यः शेते क्षीरपर्यङ्के दिव्यनागविभूषिते ।
फणासहस्ररचिते तस्मै निद्रात्मने नमः

yaḥ śete kṣīraparyaṅke divyanāgavibhūṣite |
phaṇāsahasraracite tasmai nidrātmane namaḥ

विश्वे च मरुतश्चैव रुद्रादित्याश्विनावपि ।
वसवः सिद्धसाध्याश्च तस्मै देवात्मने नमः

viśve ca marutaścaiva rudrādityāśvināvapi |
vasavaḥ siddhasādhyāśca tasmai devātmane namaḥ

अव्यक्तं बुद्ध्यहंकारो मनोबुद्धीन्द्रियाणि च ।
तन्मात्राणि विशेषाश्च तस्मै तत्वात्मने नमः

avyaktaṃ buddhyahaṃkāro manobuddhīndriyāṇi ca |
tanmātrāṇi viśeṣāśca tasmai tatvātmane namaḥ

भूतं भव्यं भविष्यच्च भूतादिप्रभवाव्ययः ।
योऽग्रजः सर्वभूतानां तस्मै भूतात्मने नमः

bhūtaṃ bhavyaṃ bhaviṣyacca bhūtādiprabhavāvyayaḥ |
yo'grajaḥ sarvabhūtānāṃ tasmai bhūtātmane namaḥ

यं हि सूक्ष्मं विचिन्वन्ति परं सूक्ष्मविदो जनाः ।
सूक्ष्मात्सूक्ष्मं च यद्ब्रह्म तस्मै सूक्ष्मात्मने नमः

yaṃ hi sūkṣmaṃ vicinvanti paraṃ sūkṣmavido janāḥ |
sūkṣmātsūkṣmaṃ ca yadbrahma tasmai sūkṣmātmane namaḥ

मत्स्यो भूत्वा विरिञ्चाय येन वेदाः समाहृताः ।
रसातलगतः शीघ्रं तस्मै मत्स्यात्मने नमः

matsyo bhūtvā viriñcāya yena vedāḥ samāhṛtāḥ |
rasātalagataḥ śīghraṃ tasmai matsyātmane namaḥ

मन्दराद्रिर्धृतो येन प्राप्ते ह्यमृतमन्थने ।
अतिकर्कशदेहाय तस्मै कूर्मात्मने नमः

mandarādrirdhṛto yena prāpte hyamṛtamanthane |
atikarkaśadehāya tasmai kūrmātmane namaḥ

वाराहं रूपमास्थाय महीं सवनपर्वताम् ।
उद्धरत्येकदंष्ट्रेण तस्मै क्रोडात्मने नमः

vārāhaṃ rūpamāsthāya mahīṃ savanaparvatām |
uddharatyekadaṃṣṭreṇa tasmai kroḍātmane namaḥ

नारसिंहवपुः कृत्वा सर्वलोकभयंकरम् ।
हिरण्यकशिपुं जघ्ने तस्मै सिंहात्मने नमः

nārasiṃhavapuḥ kṛtvā sarvalokabhayaṃkaram |
hiraṇyakaśipuṃ jaghne tasmai siṃhātmane namaḥ

पिङ्गेक्षणसटं यस्य रूपं दंष्ट्रानखैर्युतम् ।
दानवेन्द्रान्तकरणं तस्मै दृप्तात्मने नमः

piṅgekṣaṇasaṭaṃ yasya rūpaṃ daṃṣṭrānakhairyutam |
dānavendrāntakaraṇaṃ tasmai dṛptātmane namaḥ

यं न देवा न गन्धर्वा न दैत्या न च दानवाः ।
तत्वतो हि विजानन्ति तस्मै सूक्ष्मात्मने नमः ॥]
वामनं रूपमास्थाय बलिं संयम्य मायया ।
त्रैलोक्यं क्रान्तवान्यस्तु तस्मै क्रान्तात्मने नमः

yaṃ na devā na gandharvā na daityā na ca dānavāḥ |
tatvato hi vijānanti tasmai sūkṣmātmane namaḥ ||]
vāmanaṃ rūpamāsthāya baliṃ saṃyamya māyayā |
trailokyaṃ krāntavānyastu tasmai krāntātmane namaḥ

जमदग्निसुतो भूत्वा रामः शस्त्रभृतां वरः ।
महीं निःक्षत्रियां चक्रे तस्मै रामात्मने नमः

jamadagnisuto bhūtvā rāmaḥ śastrabhṛtāṃ varaḥ |
mahīṃ niḥkṣatriyāṃ cakre tasmai rāmātmane namaḥ

त्रिःसप्तकृत्वो यश्चैको धर्मे व्युत्क्रान्तिगौरवात् ।
जघान क्षत्रियान्सङ्ख्ये तस्मै क्रोधात्मने नमः

triḥsaptakṛtvo yaścaiko dharme vyutkrāntigauravāt |
jaghāna kṣatriyānsaṅkhye tasmai krodhātmane namaḥ

[विभज्य पञ्चधाऽऽत्मानं वायुर्भूत्वा शरीरगः ।
यश्चेष्टयति भूतानि तस्मै वाय्वात्मने नमः ॥]

[vibhajya pañcadhā''tmānaṃ vāyurbhūtvā śarīragaḥ |
yaśceṣṭayati bhūtāni tasmai vāyvātmane namaḥ ||]

रामो दशिरथिर्भूत्वा पुलस्त्यकुलनन्दनम् ।
जघान रावणं सङ्ख्ये तस्मै क्षत्रात्मने नमः

rāmo daśirathirbhūtvā pulastyakulanandanam |
jaghāna rāvaṇaṃ saṅkhye tasmai kṣatrātmane namaḥ

यो हली मुसली श्रीमान्नीलाम्बरधरः स्थितः ।
रामाय रौहिणेयाय तस्मै भोगात्मने नमः

yo halī musalī śrīmānnīlāmbaradharaḥ sthitaḥ |
rāmāya rauhiṇeyāya tasmai bhogātmane namaḥ

शङ्खिने चक्रिणे नित्यं शार्ङ्गिणे पीतवाससे ।
वनमालाधरायैव तस्मै कृष्णात्मने नमः

śaṅkhine cakriṇe nityaṃ śārṅgiṇe pītavāsase |
vanamālādharāyaiva tasmai kṛṣṇātmane namaḥ

वसुदेवसुतः श्रीमान्क्रीडितो नन्दगोकुले ।
कंसस्य निधनार्थाय तस्मै क्रीडात्मने नमः

vasudevasutaḥ śrīmānkrīḍito nandagokule |
kaṃsasya nidhanārthāya tasmai krīḍātmane namaḥ

वासुदेवत्वमागम्य यदोर्वंशसमुद्भवः ।
भूभारहरणं चक्रे तस्मै कृष्णात्मने नमः

vāsudevatvamāgamya yadorvaṃśasamudbhavaḥ |
bhūbhāraharaṇaṃ cakre tasmai kṛṣṇātmane namaḥ

सारथ्यमर्जुनस्याजौ कुर्वन्गीतामृतं ददौ ।
लोकत्रयोपकाराय तस्मै ब्रह्मात्मने नमः

sārathyamarjunasyājau kurvangītāmṛtaṃ dadau |
lokatrayopakārāya tasmai brahmātmane namaḥ

दानवांस्तु वशे कृत्वा पुनर्बुद्धत्वमागतः ।
सर्गस्य रक्षणार्थाय तस्मै बुद्धात्मने नमः

dānavāṃstu vaśe kṛtvā punarbuddhatvamāgataḥ |
sargasya rakṣaṇārthāya tasmai buddhātmane namaḥ

हनिष्यति कलौ प्राप्ते म्लेच्छांस्तुरगवाहनः ।
धर्मसंस्थापको यस्तु तस्मै कल्क्यात्मने नमः

haniṣyati kalau prāpte mlecchāṃsturagavāhanaḥ |
dharmasaṃsthāpako yastu tasmai kalkyātmane namaḥ

तारान्वये कालनेमिं हत्वा दानवपुङ्गवम् ।
ददौ राज्यं महेन्द्राय तस्मै साङ्ख्यात्मने नमः

tārānvaye kālanemiṃ hatvā dānavapuṅgavam |
dadau rājyaṃ mahendrāya tasmai sāṅkhyātmane namaḥ

यः सर्वप्राणिनां देहे साक्षिभूतो ह्यवस्थितः ।
अक्षरः क्षरमाणानां तस्मै साक्ष्यात्मने नमः

yaḥ sarvaprāṇināṃ dehe sākṣibhūto hyavasthitaḥ |
akṣaraḥ kṣaramāṇānāṃ tasmai sākṣyātmane namaḥ

नमोस्तु ते महादेव नमस्ते भक्तवत्सल ।
सुब्रह्मण्य नमस्तेऽस्तु प्रसीद परमेश्वर

namostu te mahādeva namaste bhaktavatsala |
subrahmaṇya namaste'stu prasīda parameśvara

अव्यक्तव्यक्तरूपेण व्याप्तं सर्वं त्वया विभो ।
नारायणं सहस्राक्षं सर्वलोकमहेश्वरम्

avyaktavyaktarūpeṇa vyāptaṃ sarvaṃ tvayā vibho |
nārāyaṇaṃ sahasrākṣaṃ sarvalokamaheśvaram

हिरण्यनाभ यज्ञाङ्गममृतं विश्वतोमुखम् ।
सर्वदा सर्वकार्येषु नास्ति तेषाममङ्गलम्

hiraṇyanābha yajñāṅgamamṛtaṃ viśvatomukham |
sarvadā sarvakāryeṣu nāsti teṣāmamaṅgalam

येषां हृदिस्थो देवेशो मङ्गलायतनं हरिः ।
मङ्गल भगवान्विष्णुर्मङ्गलं मधुसूदनः

yeṣāṃ hṛdistho deveśo maṅgalāyatanaṃ hariḥ |
maṅgala bhagavānviṣṇurmaṅgalaṃ madhusūdanaḥ

मङ्गलं पुण्‍डरीकाक्षो मङ्गलं गरुडध्वजः ।
विश्वकर्मन्नमस्तेऽस्तु विश्वात्मन्विश्वसंभव

maṅgalaṃ puṇ‍ḍarīkākṣo maṅgalaṃ garuḍadhvajaḥ |
viśvakarmannamaste'stu viśvātmanviśvasaṃbhava

अपवर्गस्थभूतानां पञ्चानां परमास्थित ।
नमस्ते त्रिषु लोकेषु वमस्ते परतस्त्रिषु

apavargasthabhūtānāṃ pañcānāṃ paramāsthita |
namaste triṣu lokeṣu vamaste paratastriṣu

नमस्ते दिक्षु सर्वासु त्वं हि सर्वपरायणम् ।
नमस्ते भगवन्विष्णो त्येकानां प्रभवाव्यय

namaste dikṣu sarvāsu tvaṃ hi sarvaparāyaṇam |
namaste bhagavanviṣṇo tyekānāṃ prabhavāvyaya

त्वं हि कर्ता हृषीकेशः संहर्ता चापराजितः ।
तेन पश्यामि ते दिव्यान्भावान्हि त्रिषुवर्त्मसु

tvaṃ hi kartā hṛṣīkeśaḥ saṃhartā cāparājitaḥ |
tena paśyāmi te divyānbhāvānhi triṣuvartmasu

तच्च पश्यामि तत्वेन यत्ते रूपं सनातनम् ।
दिवं ते शिरसा व्याप्तं पद्भ्यां देवी वसुंधरा ।
विक्रमेण त्रयो लोकाः पुरुषोऽसि सनातनः

tacca paśyāmi tatvena yatte rūpaṃ sanātanam |
divaṃ te śirasā vyāptaṃ padbhyāṃ devī vasuṃdharā |
vikrameṇa trayo lokāḥ puruṣo'si sanātanaḥ

[दिशो भुजा रविश्चक्षुर्वीर्ये शुक्रः प्रतिष्ठितः ।
सप्तमार्गा निरुद्धास्ते वायोरमिततेजसः ॥]

[diśo bhujā raviścakṣurvīrye śukraḥ pratiṣṭhitaḥ |
saptamārgā niruddhāste vāyoramitatejasaḥ ||]

व्यक्ताव्यक्तस्वरूपेण व्याप्तं सर्वं त्वया विभो ।
अव्यक्तं ब्राह्मणं रूपं व्यक्तमेतच्चराचरम्

vyaktāvyaktasvarūpeṇa vyāptaṃ sarvaṃ tvayā vibho |
avyaktaṃ brāhmaṇaṃ rūpaṃ vyaktametaccarācaram

अतसीपुष्पसंकाशं पीतवाससमच्युतम् ।
ये नमस्यन्ति गोविन्दं न तेषां विद्यते भयम्

atasīpuṣpasaṃkāśaṃ pītavāsasamacyutam |
ye namasyanti govindaṃ na teṣāṃ vidyate bhayam

[एकोऽपि कृष्णस्य कृतः प्रणामो
दशाश्वमेधावभृथेन तुल्यः ।
दशाश्वमेधी पुनरेति जन्म
कृष्णप्रणामी न पुनर्भवाय

[eko'pi kṛṣṇasya kṛtaḥ praṇāmo
daśāśvamedhāvabhṛthena tulyaḥ |
daśāśvamedhī punareti janma
kṛṣṇapraṇāmī na punarbhavāya

कृष्णव्रताः कृष्णमनुस्मरन्तो
रात्रौ च कृष्णं पुनरुत्थिता ये ।
ते कृष्णदेहाः प्रविशन्ति कृष्ण
माज्यं यथा मन्त्रहुतं हुताशे

kṛṣṇavratāḥ kṛṣṇamanusmaranto
rātrau ca kṛṣṇaṃ punarutthitā ye |
te kṛṣṇadehāḥ praviśanti kṛṣṇa
mājyaṃ yathā mantrahutaṃ hutāśe

नमो नरकसंत्रासरक्षामण्डलकारिणे ।
संसारनिम्नगावर्ततरिकाष्ठाय विष्णवे

namo narakasaṃtrāsarakṣāmaṇḍalakāriṇe |
saṃsāranimnagāvartatarikāṣṭhāya viṣṇave

नमो ब्रह्मण्यदेवाय गोब्राह्मणहिताय च ।
जगद्धिताय कृष्णाय गोविन्दाय नमोनमः

namo brahmaṇyadevāya gobrāhmaṇahitāya ca |
jagaddhitāya kṛṣṇāya govindāya namonamaḥ

प्राणकान्तारपाथेयं संसारोच्छेदभेषजम् ।
दुःखशोकपरित्राणं हरिरित्यक्षरद्वयम् ॥]

prāṇakāntārapātheyaṃ saṃsārocchedabheṣajam |
duḥkhaśokaparitrāṇaṃ harirityakṣaradvayam ||]

नारायणपरं ब्रह्म नारायणपरं तपः ।
नारायणपरं सत्यं नारायणपरं परम्

nārāyaṇaparaṃ brahma nārāyaṇaparaṃ tapaḥ |
nārāyaṇaparaṃ satyaṃ nārāyaṇaparaṃ param

यथा विष्णुमयं सत्यं यथा विष्णुमयं हविः ।
तथा विष्णुमयं सर्वं पाप्मा ने नश्यतां तथा

yathā viṣṇumayaṃ satyaṃ yathā viṣṇumayaṃ haviḥ |
tathā viṣṇumayaṃ sarvaṃ pāpmā ne naśyatāṃ tathā

तस्य यज्ञवराहस्य विष्णोरमिततेजसः ।
प्रणामं येऽपि कुर्वन्ति तेषामपि नमोनमः

tasya yajñavarāhasya viṣṇoramitatejasaḥ |
praṇāmaṃ ye'pi kurvanti teṣāmapi namonamaḥ

त्वां प्रपन्नाय भक्ताय गतिमिष्टां जिगीषवे ।
यच्छ्रेयः पुण्डरीकाक्ष तद्ध्यायस्व सुरोत्तम

tvāṃ prapannāya bhaktāya gatimiṣṭāṃ jigīṣave |
yacchreyaḥ puṇḍarīkākṣa taddhyāyasva surottama

इति विद्यातपोयोनिरयोनिर्विष्णुरीडितः ।
वाग्यज्ञेनार्चितो देवः प्रीयतां मे जनार्दनः

iti vidyātapoyonirayonirviṣṇurīḍitaḥ |
vāgyajñenārcito devaḥ prīyatāṃ me janārdanaḥ

एतावदुक्त्वा वचनं भीष्मस्तद्रतमानसः ।
नम इत्येव कृष्णाय प्रणाममकरोत्तदा

etāvaduktvā vacanaṃ bhīṣmastadratamānasaḥ |
nama ityeva kṛṣṇāya praṇāmamakarottadā

तस्मिन्नुपरते वाक्ये ततस्ते ब्रह्मवादिनः ।
भीष्मं वाग्भिर्वाष्पगलास्तमानर्चुर्महाद्युतिम्

tasminnuparate vākye tataste brahmavādinaḥ |
bhīṣmaṃ vāgbhirvāṣpagalāstamānarcurmahādyutim

तेऽस्तुवन्तश्च विप्रेन्द्राः केशवं पुरुषोत्तमम् ।
भीष्मं च शनकैः सर्वे प्रशशंसुः पुनः पुनः

te'stuvantaśca viprendrāḥ keśavaṃ puruṣottamam |
bhīṣmaṃ ca śanakaiḥ sarve praśaśaṃsuḥ punaḥ punaḥ

अधिगम्य तु योगेन भक्तिं भीष्मस्य माधवः ।
त्रैलोक्यदर्शनं ज्ञानं दिव्यं दत्त्वा ययौ हरिः

adhigamya tu yogena bhaktiṃ bhīṣmasya mādhavaḥ |
trailokyadarśanaṃ jñānaṃ divyaṃ dattvā yayau hariḥ

विदित्वा भक्तियोगं तं भीष्मस्य पुरुषोत्तमः ।
सहसोत्थाय तं हृष्टो यानमेवान्वपद्यत

viditvā bhaktiyogaṃ taṃ bhīṣmasya puruṣottamaḥ |
sahasotthāya taṃ hṛṣṭo yānamevānvapadyata

केशवः सात्यकिश्चैव रथेनकेन जग्मतुः ।
अपरेण महात्मानौ युधिष्ठिरधनञ्जयौ

keśavaḥ sātyakiścaiva rathenakena jagmatuḥ |
apareṇa mahātmānau yudhiṣṭhiradhanañjayau

भीमसेनो यमौ चोभौ रथमेकं समास्थिताः ।
कृपो युयुत्सुः सूतश्च सञ्जयश्चापरं रथम्

bhīmaseno yamau cobhau rathamekaṃ samāsthitāḥ |
kṛpo yuyutsuḥ sūtaśca sañjayaścāparaṃ ratham

ते रथैर्नगराकारैः प्रयाताः पुरुषर्षभाः ।
नेमिघोषेण महता कम्पयन्ते वसुंधराम्

te rathairnagarākāraiḥ prayātāḥ puruṣarṣabhāḥ |
nemighoṣeṇa mahatā kampayante vasuṃdharām

ततो गिरः पुरुषवरस्तवेरितां
द्विजेरिताः पथिषु मनाक् स शुश्रुवे ।
कृताञ्जलिं प्रणतमथापरं जनं
स केशिहा मुदितमनास्थनन्दत

tato giraḥ puruṣavarastaveritāṃ
dvijeritāḥ pathiṣu manāk sa śuśruve |
kṛtāñjaliṃ praṇatamathāparaṃ janaṃ
sa keśihā muditamanāsthanandata

इति स्मरन्पठति च शार्ङ्गधन्वनः
शृणोतु वा यदुकुलनन्दनस्तवम् ।
स चक्रभृत्प्रतिहतसर्वाकिल्विषो
जनार्दनं प्रविशति देहसंक्षये

iti smaranpaṭhati ca śārṅgadhanvanaḥ
śṛṇotu vā yadukulanandanastavam |
sa cakrabhṛtpratihatasarvākilviṣo
janārdanaṃ praviśati dehasaṃkṣaye

यं योगिनः प्राणवियोगकाले
यत्नेन चित्ते विनिवेशयन्ति ।
स तं पुरस्ताद्धरिमीक्षमाणः
प्राणाञ्जहौ प्राप्तफलो हि भीष्मः

yaṃ yoginaḥ prāṇaviyogakāle
yatnena citte viniveśayanti |
sa taṃ purastāddharimīkṣamāṇaḥ
prāṇāñjahau prāptaphalo hi bhīṣmaḥ

स्ववराजः समाप्तोऽयं विष्णोरद्भुतकर्मणः ।
गाङ्गेयेन पुरा गीतो महापातकनाशनः

svavarājaḥ samāpto'yaṃ viṣṇoradbhutakarmaṇaḥ |
gāṅgeyena purā gīto mahāpātakanāśanaḥ

इमं नरः स्तवराजं मुमुक्षुः
पठञ्शुचिः कलुषितकल्मषापहम् ।
अतीत्य लोकान्मलिनः समामता
न्पदं स गच्छत्यमृतं महात्मनः

imaṃ naraḥ stavarājaṃ mumukṣuḥ
paṭhañśuciḥ kaluṣitakalmaṣāpaham |
atītya lokānmalinaḥ samāmatā
npadaṃ sa gacchatyamṛtaṃ mahātmanaḥ